Baş prokuror yanında Korrupsiyaya Qarşı Mübarizə Baş İdarəsinin təqdimatına əsasən Maliyyə Nazirliyinin təftiş briqadası Gədəbəyə yollanıb

Təftişçilər rayonun keçmiş icra başçısı Ramiz Yediyarovun işlədiyi dövrdə dövlət büdcəsində rayonun sosial-iqtisadi vəziyyətinin yaxşılaşdırılmasına ayrılan 10 milyonlarla manatın xərclənməsinin icra vəziyyətini araşdırır. Ortaya böyük maxinasiyaların çıxması haqda xəbərlər dolaşır. Baş prokuror yanında Korrupsiyaya Qarşı Mübarizə Baş İdarəsinin təqdimatına əsasən Maliyyə Nazirliyinin təftiş briqadası Gədəbəyə yollanıb. Ramiz Yediyarov rayonda bir çox İdarələrlə əlbir olaraq, bu təyinat üzrə külli miqdarda dövlət vəsaitini talan edtiyi də gələn məlumatlar arasındadır. Qeyd edək ki, Ramiz Yediyarov bu il iyunun 1-də dövlət başçısının imzaladığı sərəncamla vəzifədən azad edilib. Bundan sonra barəsində Baş prokuror yanında Korrupsiyaya Qarşı Mübarizə Baş İdarəsi tərəfindən araşdırmalara başlanılıb. Ramiz Yediyarov külli miqdarda dövlət vəsaitini təyinatı üzrə xərcləməyərək büdcəyə ziyan vurmasına əsaslı şübhələr olduğu üçün onun ölkədən çıxışına qadağa qoyulması ilə bağlı məhkəmə qərarı çıxarılıb. Əldə etdiyimiz digər məlumara görə, İcra başçısı işlədiyi dövrdə sahibkarlara məxsus obyektləri yelə yeksan edib. Həmin sahibkarlardan bəri başdan müəyyən məbləğin ödənilməsi və aylıq tasa otuzdurulması tələbi də qoyulurdu. Bu təklifə razı olmayan sahibkarların obyektləri dərhal bulduzerin qabağına verilərək dağıdılırdı. Mötəbər mənbədən“Gündəm Xəbər”ə verilən məlumatda bildirilir ki, Baş prokuror yanında Korrupsiyaya Qarşı Mübarizə Baş İdarəsi külli miqdarda ziyan dəymiş yerli iş adamlarını da izahat almağa dəvət edəcək.
Ramiz Yediyarov sabiq vergilər naziri Fazil Məmmədovun kadrı hesab olunur. Onun təqdimatı ilə 2012-ci il aprelin 18-dən Gədəbəy Rayon İcra Hakimiyyətinin başçısı təyin edilmişdi. Ondan əvvəl isə Ramiz Yediyarov vergi orqanlarında çalışıb. Belə ki, 1997-ci ildən dövlət vergi orqanlarında müxtəlif ərazi idarələrinə rəhbərlik edib. Sonradan icra başçısı təyin olunanadək Bakı Şəhər Vergilər Departamentinin rəis müavini olub.

GundemXeber.Az