Bu gün böyük gülüş ustası, Azərbaycanın görkəmli teatr və kino aktyoru, Xalq artisti, "Şöhrət” ordenli Hacıbaba Bağırovun anadan olmasının 90-cı ildönümüdür. Bununla əlaqədar Azərbaycan Dövlət Akademik Musiqili Teatrı silsilə tədbirlər həyata keçirir. 

Teatrın kollektivi öncə mərhum aktyorun II  Fəxri Xiyabandakı məzarını ziyarət edərək əklillər və gül-çiçək dəstələri qoyublar. 

Ziyarətdə iştirak edən Akademik Musiqili Teatrının direktoru, Əməkdar incəsənət xadimi, fəlsəfə doktoru Əliqismət Lalayev, Mədəniyyət Nazirliyinin incəsənət şöbəsinin teatr sektorunun müdiri Könül Cəfərova, Xalq artistləri Afaq Bəşirqızı, Fatma Mahmudova, rejissor, Əməkdar incəsənət xadımı Cəmil Quliyev, Əməkdar artistlər Ələkbər Əliyev, Çingiz Əhmədov, gənc aktyor, Prezident Mükafatçısı Hüseyn Əlili, tanınmış mədəniyyət və incəsənət  nümayəndələri mərhum sənətkarın həyat və yaradıcılığından söz açaraq, onunla bağlı xatirələrini bölüşüblər. da tədbirdə nazirliyin nümayəndəsi olaraq çıxış edib.

Rejossör Cəmil Quliyev böyük sənətkarla bağlı vurğulayıb: 

"Hacıbaba müəllimin yaradıcılığını sevən, onu daim qəlblərində yaşadan insanlar bu gün sənətkarımızın məzarı başında toplaşıb. 12 iyun təqvimi mənim üçün həm kədərli, həm də şərəfli gündür. Şərəflidir ona görə ki, böyük sənətkarımızın dünyaya göz açmasının 90 illik yubileyidi. Qəmliyəm, çünki belə bir incəsənət xadimi aramızda yoxdu. Mənim üçün Hacıbaba Bağırov yalnız ustad sənətkar deyil, həm də  təvəzökar, insansevər, qayğıkeş, çətin anlarda hamıya bacardığı köməyi əsirgəməyən böyük insan idi. Bu gün Hacıbaba müəllimi yad edən hər kəsə öz təşəkkürümü bildirirəm". 

Uzun müddət Akademik Musiqi Dram Teatrında Hacıbaba Bağırovla tərəf müqabili olan aktyor Çingiz Əhmədovda xatirələrini dilə gətirib: 

"Teatra 2-ci qayıdışımın əsas səbəbkarı Hacıbaba müəllim olub. O, həmişə onun üçün təyin olunan aparıcı rollara məni irəli çəkər və lojada əyləşib ifa etdiyim obrazlara səbrlə, sevgiylə tamaşa edərək deyərdi: "Rolları ifa edərkən mənim etmədiyim ştrixləri həyata keçirirsən. Ona görə də bu rollara layiqsən". Peşəkar sənətkarlıq hər kəsin bacarıq-qabiliyyətini kənardan görüb, qiymətləndirmək idi. Hacıbaba Bağırov məhz belə sənətkar idi. Hər dəfə teatrda olanda Hacıbaba müəllim kimi sənətkarlar üçün burnumun ucu göynəyir. Məkanı cənnət olsun. İnşallah, axirətdə də böyük sənətkarımızla görüşüb, yarımçıq qalmış söhbətlərimizi edəcəyik". 

Akademik Musiqili Dram Teatrının direktoru Əliqismət Lalayev də sənətkarla bağlı fikirlərini bölüşüb: 

"Hacıbaba Bağırov aktyor, sənətkar, teatr rəhbəri kimi incəsənətimizdə böyük iz qoyub. Teatrımızın texniki işçilərindən tutmuş, böyük sənətkarla tərəflə müqabili olmuş aktyorların hamısı bu gün onun məzarı başına toplaşıb. O bütün teatr nümayəndələrinin xatirəsində tək unudulmaz aktyor yox, həm də gözəl insan kimi iz qoyub. Nə qədər ki, tearımız, incəsənətimiz yaşadıqca Hacıbaba Bağırov da yaşayacaq".

Qeyd edək ki, bu gün saat 19:00-da isə Akademik Musiqili Teatrda Hacıbaba Bağırovun 90 illik yubileyinə həsr olunmuş "Mən dəyərəm min cavana"  (F.Sücəddinov, T. Vəliyeva) tamaşası nümayiş olunacaq.

Xatırladaq ki, bu tamaşa illər öncə H.Bağırovun sağlığında onun 75 illik yubileyi münasibətilə hazırlanmışdı. Tamaşanın premyerasına az qalmış, 2006-cı ilin oktyabrında aktyor vəfat etdiyinə görə 2007-ci ildə “Mən dəyərəm min cavana” tamaşası mərhum sənətkarın xatirəsinə ithaf olaraq onu sevənlərə bir hədiyyə kimi təqdim edilir.  

Tamaşadan öncə foyedə aktyorun səhnə geyimləri də göstəriləcək. “O olmasın, bu olsun” tamaşasında Məşədi İbad (1998), “Bankir adaxlı”da Atakişi (2002), “Adamın adamı”nda  Əli Əyrizadə (2005), “92 dəqiqə gülüş” konsert-kompozisiyasında isə Sonqulu (2004) obrazlarının geyimləri sərgilənəcək.

Abdulla İsmayıloğlu