Məlumdur ki, rəssamlıq sənəti incəsənətin ən qədim növlərindən biri hesab olunur və bu sahədə fəaliyyət göstərənləri, məhz digər sənət adamlarından fərqləndirən bir çox xarakterik xüsusiyyətlər, özünəməxsus göstəricilər mövcud olur. Çünki, rəssamlar gözlə görünməyən obrazları öz duyğuları, özünəməxsus hissləri, düşüncələrində formalaşdırdıqları təsvirlər əsasında ərsəyə gətirirlər. Faktdır ki, rəssamlıq sənəti çox incə, olduqca maraq doğuran, insan ruhunu oxşayan gözəl bir sənət növü olmaqla bərabər, həm də insanın mənəvi aləmindəki daxili duyğularını cəmiyyətlə bölüşməyin  ən maraqlı, ən unikal yoludur. Bəli, rəssamlıq dərin sənətdir və bu sənət növü bu sahədə çalışanlardan ciddi təxəyyül, istedad, əmək, səbr və mütaliə tələb edir. Hal-hazırda bu sənətin vurğunu olan, rənglərin dili ilə danışmağı bacaran, ömrünü-gününü bu sahəyə bağlayan neçə-neçə tanınmış sənətkarlarımız var ki, qədirbilən xalqımız onların fəaliyyətlərini hər zaman dəyərləndirmişlər. Bəli, bu sahə ilə məşğul onların sənət əsərlərində rəssamın xəyal dünyası, qəlbinin istəyi rənglərin dili ilə özünü göstərir. Eyni zamanda ərsəyə gətirilən sənət əsərləri, sanki insanları xoş ümidlə gələcəyə səsləyir, hər kəsdə nostalji hissləri də oyadır. Hal-hazırda respublikamızın hər bir guşəsində neçə-neçə istedadlı gənclərimiz var ki, onlar daim yaradıcılıq axtarışlarında olurlar, yuxusuz gecələr keçirməklə, məhz bu sənət növünün yaşadılmasına çalışırlar.

Qeyd edək ki, İyulun 5-də AR Elm və Təhsil Nazirliyi, Azərbaycan Milli Elmlər Akademiyası, Xəzər Rayon İcra Hakimiyyəti, Xəzər Rayon Gənclər İdman İdarəsi, Bakı Şəhər Mədəniyyət Baş İdarəsi və Dendrologiya İnstitutunun birgə təşkilatçılığı ilə “Heydər Əliyev İli” çərçivəsində “Gəncliyimiz gələcəyimizdir” adlı rəsm və əl işlərindən ibarət respublika yaradıcılıq müsabiqəsi keçirilib. Müsabiqənin təşkil edilməsində məqsəd Ulu Öndər Heydər Əliyev irsinin təbliği, milli-mənəvi dəyərlərimizin gələcək nəsillərə aşılanması, Azərbaycanın mədəniyyət paytaxtı Şuşanın, Qarabağın çoxəsrlik mədəni-tarixi irsinin daha dərindən mənimsənilməsi, eləcə də Vətən müharibəsində ordumuzun nümayiş etdirdiyi şücaəti gənc rəssamların gözü ilə cəmiyyətə çatdırmaq olub. Tədbirdə könüllü yeniyetmələr ən çox 3 əsər təqdim etməklə iştirak ediblər.

 Seçim zamanı əl işlərinə kənar müdaxilənin olmaması, həmçinin kompozisiyanın motivi və ideyası əsas götürülüb. Müsabiqədən öncə rəsm əsərlərinə və əl işlərindən ibarət sərgiyə baxış keçirilib. Mərdəkan Mədəniyyət Sarayında baş tutan tədbir Azərbaycan Respublikasının Dövlət Himninin səsləndirilməsi ilə başlayıb. Tədbirdə çıxış edən AMEA-nın birinci vitse-prezidenti v.i.e., akademik Arif Həşimov müsabiqə haqqında məlumat verərək bildirib ki, “Heydər Əliyev İli” çərçivəsində keçirilən müsabiqənin əsas məqsədi təməli mərhum prezidentimiz Heydər Əliyev tərəfindən qoyulmuş dövlət gənclər siyasətinin əsasında geniş dünyagörüşünə, milli düşüncəyə malik gənc nəslin yetişdirilməsini, gənclərdə vətənpərvərlik ruhunun gücləndirilməsini və azərbaycançılıq ideologiyasının təbliğini təmin etməkdir. Akademik Arif Həşimov gənclərin inkişafında, bilik və bacarıqlarının artırılmasında mühüm rol oynayan belə müsabiqələrin təşkilinin ənənəyə çevrilməsini müsbət hal kimi dəyərləndirib. 

O, sərgidə nümayiş olunan əsərlərin gələcəkdə Azərbaycan mədəniyyəti xəzinəsində öz yerini tutacağına inamını ifadə edib. Sonra AMEA-nın vitse-prezidenti, akademik İradə Hüseynova çıxış edərək mərhum prezidentimiz Heydər Əliyevin xalqımızı zamanın mürəkkəb tarixi-siyasi sınaqlarından uğurla çıxartdığını və ardıcıl mübarizə apararaq onu müstəqilliyə qovuşdurmuş qüdrətli şəxsiyyət olduğunu bildirib. O, ölkəmizdə gənclərimizlə bağlı dövlət siyasətinin formalaşdırılması və həyata keçirilməsinin məhz Ümummilli Liderin adı ilə bağlı olduğunu vurğulayıb. Heydər Əliyevin elm və təhsilin inkişafına böyük qayğı ilə yanaşdığını deyən akademik İradə Hüseynova bu siyasətin Prezident İlham Əliyev tərəfindən uğurla davam etdirildiyini qeyd edib. Bildirib ki, Azərbaycan Respublikasının Prezidenti, Ali Baş Komandan İlham Əliyevin rəhbərliyi altında 44 günlük Vətən müharibəsində torpaqlarımız işğaldan azad edilib, tarixi qələbə əldə olunub. Vitse-prezident hazırda işğaldan azad edilmiş ərazilərimizin dirçəlişi istiqamətində geniş miqyaslı quruculuq, bərpa və yenidənqurma işlərinin həyata keçirildiyini vurğulayıb. Akademik İradə Hüseynova artıq üçüncü dəfədir keçirilən yaradıcılıq müsabiqəsinin əsas təşəbbüskarının mərhum alim, AMEA-nın müxbir üzvü Tofiq Məmmədov olduğunu diqqətə çatdırıb. O, sərgidə təqdim olunan əsərlərin ulu öndər Heydər Əliyevə, Azərbaycanın müstəqillik tarixinə, şanlı qələbəmizə, eləcə də qələbənin əldə olunmasında qəhrəmanlıqları, misilsiz xidmətləri ilə yaddaşlara həkk olunmuş şəhidlərimizə və qazilərimizə həsr olunduğunu söyləyib. 

Alim növbəti yaradıcılıq müsabiqəsinin işğaldan azad edilmiş ərazilərimizə, həmin ərazilərdə Ermənistanın törətdiyi kütləvi ekoloji terror və fəlakətlərə, Azərbaycanın şanlı tarixinə həsr olunmasını məqsədəuyğun hesab edib. Tədbirdə AMEA-nın Azad Həmkarlar İttifaqının sədri, hüquq elmləri doktoru, professor Habil Qurbanov, Xəzər Rayon Gənclər və İdman İdarəsinin rəisi Vüqar  Əliyev, Xəzər Rayon Mərdəkan Mədəniyyət Sarayının direktoru Cavid Şahbazbəyli, AMEA-nın Qadınlar Şurasının sədri, professor Rəna Mirzəzadə, Dendrologiya İnstitutunun baş direktoru, biologiya üzrə fəlsəfə doktoru, dosent Minarə Həsənova çıxış edərək sərgidə nümayiş olunan əsərlərin məzmun və xaraktercə düzgün seçildiyini, balaca rəssamların Ulu Öndərin əziz xatirəsinə hədsiz hörmət və ehtiramının hər bir əsərdə ifadə olunduğunu vurğulayıblar. Daha sonra məktəblilərin hazırladıqları şeir və rəqs nömrələrindən ibarət kompozisiyalar təqdim olunub. Sonda müsabiqənin Təşkilat Komitəsi qaliblərin adlarını açıqlayıb. İlk üç yerin qalibi diplom və pul mükafatı, digər iştirakçılar isə Fəxri  fərman və təşəkkürnamələrlə təltif olunublar.

Qeyd edək ki, “Gəncliyimiz gələcəyimizdir” adlı yaradıcılıq müsabiqəsinə Bakı, Gəncə, Qazax, Şəki, Qax, Xaçmaz və Lənkəranda yerləşən orta təhsil müəssisələri və Azərbaycan Dövlət Rəssamlıq Akademiyasından ümumilikdə 300-dək rəsm və əl işləri təqdim olunub.

Ümumiyyətlə, rəssamlıq sənəti ilə məşğul olan hər kəsdə xüsusi qabiliyyətin olması əsas şərtlərdən biridir. Çünki, qabiliyyətin varlığı Tanrının bəndəsinə bəxş etdiyi mükafatdır. Digər tərəfdən, bacarığı və istedadı olan hər bir gəncin bu sənətə dərin sevgisi və rəssamlıq ruhu olmalıdır. Unutmaq olmaz ki, istedad təkcə rəsm çəkməklə kifayətlənmir, eyni zamanda bu sənət növü ilə məşğul olan hər kəsdə elm, ruh, sevgi, istək və vəhdət birbirini bağlamalıdır. Belə olan halda mükəmməl rəsm əsərləri yaratmaq, eyni zamanda Azərbaycan rəssamlıq sənətinə lazımi töhfələri bəxş etmək mümkün olar. Bir sözlə, yaradıcı şəxs həm nəzəri, həm də texniki cəhətdən daim axtarışda olmalı, həmçinin məşğul olduğu sənətinə qarşı özündə sevgi hissi də formalaşdırmalıdır.

Bəli, “Gəncliyimiz gələcəyimizdir” adlı yaradıcılıq müsabiqəsində iştirak edənlərin olduqca gənc olmalarına baxmayaraq, yuxarıda qeyd olunan xüsusiyyətləri və lazımi göstəriciləri özündə cəmləşdirən gənclər, məhz ərsəyə gətirdikləri əl işləri ilə nəyə qabil olduqlarını nümayiş etdirdilər. İnanırıq ki, həmin gənclərin hər biri özlərinin yaradıcılıq göstəriciləri ilə, özlərində cəmləşdirdikləri potensialı və s. ilə, yaxın gələcəkdə Azərbaycan rəssamlıq sənətinin ən uca zirvəsini fəth edəcəklər. Odur ki, redaksiyamızın yaradıcı kollektivi adından həmin gənclərə uğurlar diləyib, gələcək fəaliyyətlərində yeni-yeni naliyyətlərə qovuşmalarını arzu edirik!.

Gundemxeber.az