İyulun 15-də Bakı Gənclər Mərkəzində “Tanrının xilas əli” bədii-sənədli filminin təqdimat mərasimi keçirilib.

 Film 1958-ci ildə Bakıda, Xəzər dənizində batan azyaşlı uşaqları xilas edərək qəhrəmanlıqla həlak olan məktəbli Tofiq Hüseynovun şücaətindən bəhs edir. 

Təqdimat mərasimində filmin yaradıcı heyəti, mədəniyyət xadimləri, Tofiq Hüseynovun ailə üzvləri, eləcə də digər ictimaiyyət nümayəndələri iştirak ediblər.

Tədbiri giriş sözü ilə açan filmin ssenari müəllifi və rejissoru Babək Abbaszadə ötən əsrin ortalarında adı bütün respublika ərazisinə yayılmış, sorağı keçmiş SSRİ-nin mərkəzi Moskva şəhərində rəsmi dairələrə qədər çatmış, Bakı şəhərinin indiki adı ilə 132-134 nömrəli təhsil kompleksinin şagirdi olmuş Tofiq Hüseynov haqqında filmin çəkilməsində əsas məqsəd qısa ömrünə böyük qəhrəmanlıq sığdıran 17 yaşlı məktəblini müasir dövrün gənclərinə tanıtmaq, xatirəsini əbədiləşdirməkdir. 

Tofiq haqqında ilk ekran işinin hələ SSRİ dövründə, 1972-ci ildə görkəmli rejissor, Xalq artisti Eldar Quliyev tərəfindən ərsəyə gətirilən “Var olun, qızlar...” bədii filmi olduğunu deyən B. Abbaszadə “Tanrının xilas əli” sənədli filmi ilə növbəti dəfə, daha real faktlar və şahid xatirələri ilə qəhrəmanın həyatına işıq tutmağa çalışdıqlarını bildirib.

Daha sonra “Tanrının xilas əli” sənədli filmi tamaşaçılara təqdim olunub. Ekran işində Tofiq Hüseynovun qısa, lakin mənalı həyatı, qəhrəmanlıq hekayəsi bədii-sənədli formada təqdim edilib. 65 il ərzində ilk dəfə olaraq, canlı şahidlər hadisə ilə bağlı öz xatirələrini bölüşüblər. 

Nümayişdən sonra Tofiq Hüseynovun obrazını səsləndirmiş Əməkdar artist Şövqi Hüseynov, baş rolun ifaçısı Ceyhun Abasov və gənc qəhrəmanın ailə üzvləri, yaxınları çıxış edərək filmi yüksək qiymətləndirmiş, böyük mənəvi əhəmiyyəti olan ekran işi kimi daha geniş nümayiş olunması təklifini irəli sürüblər.

Qeyd edək ki, filmin ssenari müəllifi, rejissoru və prodüseri Babək Abbaszadə, operatoru Anar Seyidov, məsləhətçisi Əməkdar incəsənət xadimi Cəmil Quliyev, icraçı prodüseri Qənirə Qurbanlıdır. Filmdə Tofiq Hüseynov rolunu Ceyhun Abasov ifa edir.

Gundemxeber.az