Komissiya əlillik statusu almaq istəyən vətəndaşdan
qəbul etdiyi sənədləri hara göndərdiyini bilmir?!

Redaksiyamıza müraciət edən Cəlilabad rayonunun Göytəpə şəhər sakini Rufullayeva Zeynəb Şakir qızı 30 N-li Tibbi Sosial Ekspert Komissiyasının fəaliyyətindən narazılıq edir.
Oğluna əlillik qrupu almaq istəyən vətəndaş, süründürməçiliyə məruz qaldığını, qanunsuz tələblərlə üzləşdiyini və aldadıldığını iddia edir. Biz vətəndaş müraciətini olduğu kimi təqdim edərkən ümid edirik ki, dövlət orqanlarının nüfuzuna xələl gətirən, ona ictimai etimadı azaldan bu hallar tezliklə aradan qaldırılacaq: “2012-ci ilin mayında azyaşlı xəstə oğlum Rufullayev Adil Famil oğlunun sənədlərini Cəlilabad rayon 30 N-li Tibbi Sosial Ekspert Komissiyasına təqdim etdim. Komissiyadan bildirdilər ki, uşağa I qrup əlillik statusu veriləcək və arayış rayon üzrə Əhalinin Sosial Müdafiəsi Mərkəzinə (ƏSMM) təqdim olunacaq. Elə o vaxtdan başlayaraq məni “get-gəl”ə salıblar. Səlim Müslümov nazir təyin edilən kimi TSEK sədrini tutduğu vəzifədən azad etdi. Bu, ailəmizi ümidləndirdi ki, indən belə işimizə düz baxılar.
Müraciətimizi dinləyən komissiyanın yeni sədri həkim Xoşbəxt Ağayeva bildirdi ki, köhnədən qalma sənədlərin hamısını nazirliyin göstərişi ilə Cəlilabad rayonu üzrə ƏSMM-ə təqdim edib, ola bilsin ki, sizin də sənədləriniz ora verilib. Gedib ƏSMM-dən soruşanda, bizə bildirdilər ki, Adil Rufullayevlə bağlı bura heç nə göndərilməyib. İndi bilmirəm mən sənədlərimi harada axtarım?
Məgər TSEK hara, hansı sənəd göndərməyini qeydə almırmı ki, ora-bura göndərməklə məni əziyyətə salır? İndi mən oğlumun sənədlərini haradan tapım ki, onun işinə baxılsın?” Bölgə müxbirimiz məsələ ilə əlaqədar Cəlilabad rayon ƏSMM-də olub. Burada ona da rufullayevlər ailəsinə verilən cavab təkrar olub. Müxbirimiz araşdırmanı davam etdirərək, Cəlilabad rayon 30 N-li TSEK-ə gedib. Həftənin 1 ci günü olduğundan komissiyanın fəaliyyət göstərdiyi inzibati binanın qarşısında yüzlərlə vətəndaş dayanaraq nöbə gözləyirmiş. Müxbirimiz çətinliklə də olsa, giriş qapısı önündə dayanan mühafizəçiyə yaxınlaşaraq, jurnalist olduğunu bildirib və xahiş edib ki, onun Xoşbəxt xanımla görüşməsinə imkan yaratsın. Mühafizəçi isə cavabında bildirib ki, Xoşbəxt xanm bizə qəti tapşırıq verib ki, heç bir jurnalisti içəri buraxmayaq.
Belə olan halda bölgə müxbirimiz TSEK-in daxili telefonu olan 252 45 44 02 nömrəsinə zəng vuraraq, jurnalist olduğunu və bir sorğuya cavab almaq istədiyini bildirib. Telefon zəngidən bir neçə dəqiqə sonra binanın ikinci mərtəbəsindən bir nəfər ağ xalat geyinmiş kişi (sonradan öyrənib ki, bu adamın adı Rəhmandır) pəncərədən onu müşahidə edib.
Heç iki dəqiqə çəkməmiş həmin şəxs qapının ağzında növbəyə dayanan yüzlərlə xəstəni kobud şəkildə itləyə-itləyə onların arasından çıxıb müxbirmizə yaxınlaşıb. “Niyə imkan vermirsiniz işimizlə məşğul olaq? Bizə rəhbərlik tərəfindən tapşırıq verilib ki, heç bir mətbuata açıqlama verməyək. Gedib bizm respublika üzrə mətbuat mərkəzindən icazə alıb gəlin, ondan sonra sizi qəbul edərik.” Bölgə müxbirmiz TSEK qarşısında növbə gözləyən digər vətəndaşlarla da söhbətləşib. Bu barədə ayrıca bir materialı yaxın günlərdə təqdim edəcəyik. Hələlik gözləyək görək, Rufullayev Adil Famil oğlunun itən sənədlərinin tapılması istiqamətində rəsmi qurumlar nə tədbir görəcək.
N.KƏRİMLİ