Yevlax rayonunda saraydaxili gərginlik

Yevlax rayon icra başçısı Qoca Səmədov son aylar davamlı olaraq işə çıxmır. İcra başçısının tez-tez istirahətə getməsi və vaxtının çoxunu rayondan keçirməsi isə rayonda müxtəlif şayiələrin yaranmasına səbəb olur.
Yevlaxdan daxil olan məlumata görə, icra başçısının işə çıxmamasının arxasında yaxın günlərdə vəzifəsi ilə vidalaşacağı məsələsi durur. İddiaya görə, Yevlax icra hakimiyyətinin dəhlizlərində söz-söhbət gəzir ki, Qoca Səmədov ya başqa bir rayona icra başçısı gedəcək, ya da vəzifəsi ilə birdəfəlik vidalaşacaq.
Bildirilir ki, icra başçısının qapalı adam olması və bəzi icra başçıları kimi həddini aşmaması, məmurlara qarşı aqressiv olmaması Qoca Səmədov haqqında Yevlaxda bilinməyən adam imici yaradıb. Amma başçının yumşaq xarakteri yuxarı dairələrdə Qoca Səmədov haqqında heç də müsbət imic yaratmayıb. Belə ki, Yevlaxda bir çox məmur uşaqlarının gecələr aftoşluq, xuliqanlıq etməsi və icra başçısının həmin məmurlara qarşı sərt tədbir görməməsi də Qoca Səmədovu yuxarı dairələrin gözündən salıb.
Həmçinin daxil olan məlumatda bildirilir ki, Yevlax rayon İcra Hakimiyyəti başçısının müavini, Sosial-İqtisadi İnkşafın Təhlili və Proqnozlaşdırması şöbəsinin müdiri Namiq Süleymanov münasibəti olduğu hakimiyyətyönlü media qurumlarının bölgədə yerləşən nümayəndələrinə davamlı olaraq yaxın aylarda ətraf rayonların birinə icra başçısı təyinatı alacağı barədə bilgilər ötürür. Bölgədə çalışan media nümayəndələri isə öz növbələrində isə həmin məlumatları yaymaqla Namiq Süleymanovun məqsədinə çatmağına yardımçı olurlar.
Əslində isə məlumata əsasən, Namiq Süleymanovun əsas hədəfi Yevlaxa icra başçısı təyinatı almaq üçün çalışır və bunun üçün müxtəlif əlaqələrini işə salıb. Elə buna görə də verilən məlumatda iddia olunur ki, Namiq Süleymanov icra başçısı Qoca Səmədov haqqında bəzi neqativ informasiyaların dövriyyəyə buraxılmasında iştirakçı və maraqlıdır.
Bildirilir ki, Müstəqim Məmmədovun Tərtərə icra başçısı təyinatından sonra Yevlax şəhərinin və rayonun quruculuq, abadlıq işlərinin aparılması Namiq Süleymanovun nəzarətinə keçib. Buna görə də müavinin gəlir sahələri də hazırda artıb və elə bu üzdən Namiq Süleymanov Yevlaxda tam söz sahibinə çevrilib.
Qeyd edək ki, Namiq Süleymanov gündəmə 7 ay öncə rayon Yaşıllaşdırma İdarəsinin müdirinin oğlu ilə birlikdə Yevlax şəhərində polis işçilərini döydüyünə, təhqir etdiyinə görə və hüquq-mühafizə orqanları tərəfindən 5 saat Polis idarəsində saxlanılmışdı. Həmin insidentdən bir müddət sonra rayon Yaşıllaşdırma İdarəsinin müdiri vəzifəsindən çıxarıldı və icra başçısının müavininə də xəbərdarlıq olunduğu bildirilir. Qarşı tərəfin mövqeyini dərc etməyə hazırıq…
KƏRİM