Deputat Əliağa Hüseynov yenidən Salyanın icra başçısı olmaq istəyir;
Tahir Kərimov əleyhinə kompaniya aparmaqla istəyinə nail ola biləcəkmi?

Deputat Əliağa Hüseynov yenidən Salyanın icra başçısı olmaq istəyir. Rayona bir müddət rəhbərlik etmiş deputat təzədən öz doğma yurduna qayıtmaq fikrindədir. Hazırda Salyanın icra başçısı prezidentin şəxsi mühafizə xidmətinin rəhbəri Bəylər Əyyubova yaxınlığı ilə tanınan Tahir Kərimovdur.
T.Kərimov rəhbərliyi dövründə Salyanı kosmetik şəkildə şirələyib. Rayonda digər bölgələr kimi üzdən, başdansovdu işlər görülüb ki, prezidentə abadlıq-quruculuq işləri getdiyi nümayiş etdirilsin. Bununla belə, T.Kərimov Ə.Hüseynovla müqayisədə kəskin fərqlənir. İndiki başçı B.Əyyubova güvəndiyi üçün tam arxayın şəkildə siyasət aparır. Ə.Hüseynov isə yerli adam olduğu üçün açıq-aşkar idarəçiliyə üstünlük verib. Bu da tezliklə onun vəzifədən kənarlaşdırılması ilə nəticələnib. Odur ki, onun yenidən rayon rəhbərliyinə qayıtmaq perspektivləri üfüqdə belə görünmür.
Deputat işıq ucu kimi ümid edir ki, bəlkə T.Kərimovla bağlı mətbuatda kompaniya apara və onu gözdən salmağa nail ola, bu halda prezident tərəfindən Salyana rəhbər təyin oluna. Amma ehtimallarla bərabər imkanlar çox məhduddur.
Salyandakı mötəbər qaynaqdan “Gündəm-xəbər”ə sızan məlumatda qeyd olunur ki, Ə.Hüseynov başçı vəzifəsindən uzaqlaşdırılandan sonra T.Kərimova qarşı hücuma keçib. Mətbuata onun haqqında xəbərlər ötürməyə başlayıb.
Deputatla icra başçısı üzbəüz gələndə səmimi münasibətlər sərgiləsə də, arxa planda gərginlik yaşanır. İcra başçısı da bilir ki, deputat onun əleyhinə iş aparır. Ancaq bunu açıq şəkildə hiss etdirmir. T.Kərimov prezidentə arxalandığını və deputatın onun postuna gələ bilməyəcəyini hesab edir.
Mənbənin qeydlərindən çıxan nəticə ondan ibarətdir ki, son vaxtlar Salyanda baş verənləri medianın ictimailəşdirilməsi və icra başçısına yönəlik ittihamlar deputat tərəfindən sifariş olunur. Mənbə iddia edir ki, Əliağa Hüseynovun icra başçısı olmaq şansları tükənib.
COŞQUN