Bir neçə ay əvvəl Ümid Partiyasında baş verənlərin sensasiyalı pərdəarxası


Iqbal AgazadeMillət vəkili İqbal Ağazadənin sədri olduğu Ümid Partiyasında bir neçə ay əvvəl baş verən tələtümün pərdəarxası ilə bağlı AzPolitika.info-ya, sözün əsl mənasında, sensasiyalı məlumatlar daxil olub. Söhbət bu ilin iyun ayının 4-də İqbal Ağazadənin 9 müavinindən 6-nın və partiyanın İcra Aparatı rəhbərinin tutduqları vəzifədən azad edilməsi barədə sərəncam imzalamasından gedir.

Xatırladaq ki, həmin sərəncama əsasən, Ümid Partiyası İcra Aparatının rəhbəri Nəsimi Məmmədli, sədrin siyasi məsələlər üzrə müavini Qasım Həsənov, təşkilati məsələlər üzrə müavini Rəfail Tağızadə, iqtisadi məsələlər üzrə müavini Razi Abasbəyli, xaricdə yaşaya həmvətənlər və diaspora ilə iş üzrə müavini Rüfət Muradlı, humanitar məsələlər üzrə müavini Səməd Hətəmov və sədrin ailə, qadın və uşaq məsələləri üzrə müavini Könül Quliyeva tutduqları vəzifədən azad edilmişdilər. Bir neçə gün sonra isə İ.Ağazadə yeni sərəncamla Taleh Əliyevi İcra Aparatının rəhbəri, Hacı Bakir Həsənbəylini Təşkilat məsələləri üzrə sədr müavini, Rüfət Muradlını İctimaiyyətlə əlaqələr və Xaricdə yaşayan soydaşlarımızla iş üzrə sədr müavini, Razi Abasbəylini Büdcə və iqtisadi məsələlər üzrə sədr müavini, Səməd Hətəmovu Sosial və humanitar məsələlər üzrə sədr müavini, Elman Abbasovu isə İnformasiya və mətbuat məsələləri üzrə sədr müavini vəzifəsinə təyin etmişdi.

İ.Ağazadə partiyadakı bu dəyişikliklərlə bağlı bunları demişdi: “Partiya işi bugünkü səviyyədə həm partiyanın sistemini, həm də fərdi olaraq məni qane etmədiyi üçün bu addımı atmışam. Vəzifədən azad etdiyim şəxslərin öncədən bu barədə məlumatları da yox idi. Rəyasət Heyətini çağırdım və bu barədə qərarımı elan etdim. Qərarım da müzakirəyə açıq deyil, çünki Nizamnamənin konkret bəndi mənə bu səlahiyyəti verir, Məclisin də buna qarışmaq səlahiyyəti yoxdur.”

Saytımıza mötəbər mənbədən daxil olan məlumata görə, İqbal Ağazadənin 4 iyun sərəncamının əsas məqsədi İcra Aparatının rəhbəri Nəsimi Məmmədlini və sədrin ailə, qadın və uşaq məsələləri üzrə müavini Könül Quliyevanı partiyadan uzaqlaşdırmaq olub. Bunu zəruri edən səbəblər isə o qədər ciddi və həssas olub ki, “Ümid” sədri diqqəti yayındırmaq üçün müavinlərinin əksəriyyətini istefaya göndərib. Beləliklə də əsl məqsədini pərdələyə bilib.

Nədir bu ciddi və həssas məsələ?


Bizə verilən məlumata görə, Ümid Partiyasında bu hadisələrdən az əvvəl sədrin ailə, qadın və uşaq məsələləri üzrə müavini Könül Quliyeva dövlətin hüquq-mühafizə qollarından birində (?) saatlarla davam edən istintaq hərəkətləri nəticəsində İqbal Ağazadənin əleyhinə ifadə verib. Bu istintaq hansı iş üzrə aparılıb, Könül Quliyeva hansı statusla dindirməyə cəlb olunub, bu məlum deyil. Lakin maraqlıdır ki, istintaqçıları bir çox digər məsələlərlə yanaşı İqbal Ağazadənin şəxsi həyatı, xüsusən də partiya üzvü olan bir qadınla münasibətləri (!) mövzusu da ciddi maraqlandırıb. Saatlarla davam edən dindirmədə müavininin verdiyi yazılı ifadə (xoşluqla və ya təzyiq altında) İqbal Ağazadənin əleyhinə olub.

Bu məsələdən xəbər tutan İqbal Ağazadə məlum sərəncamı imzalayaraq, Könül Quliyeva ilə yanaşı Nəsimi Məmmədlini də partiyadan uzaqlaşdırıb.

Bu sensasiyalı məlumatlarla bağlı danışmaq üçün əməkdaşımız hər üç şəxslə – İqbal Ağazadə, Könül Quliyeva və Nəsimi Məmmədli ilə əlaqə saxlayıb.

İqbal Ağazadə sualı dinlədikdən sonra “tarixə qayıtmaq istəmirəm, gələcək planlarımla bağlı suallarınız varsa cavablandırmağa hazıram”, deyə danışmaqdan imtina edib.

Könül Quliyeva isə bir qədər tərəddüddən sonra məlumatımızı təsdiqləyib. Lakin baş vermiş hadisənin təfərrüatını açmaqdan imtina edib. “Bu məsələ ilə bağlı mən tam məlumat vermək istəmirəm. Təbii ki, zamanı gəlincə geniş bir bəyanatla məsələni aydınlaşdıraram. Amma hazırda susmağı üstün tuturam…

Onu qeyd edim ki, partiyadan istefam mənim siyasi fəaliyyətimlə bağlı olub. Təbii ki, mənim müəyyən narahatçılıqlarım olub. Mən yaşadığım həmin hadisələrlə bağlı bir videoçəkiliş aparmışam. Bütün olayları orda qeyd edərək etibarlı mənbələrə vermişəm. Əgər həyatımda hər hansı ciddi təhlükə ilə rastlaşaramsa, o zaman həmin çəkiliş ictimailəşəcək…
Mən hər şeyi göz önünə alaraq siyasətə gəlmişəm. Lakin mənə qarşı müəyyən haqsızlıqlar, siyasi fəaliyyətim, partiyadaxili yaranmış müəyyən vəziyyət məni istefaya məcbur edib.”

K.Quliyeva həmçinin təsdiq edib ki, İqbal Ağazadənin İcra Aparatının rəhbəri Nəsimi Məmmədlini vəzifəsindən uzaqlaşdırmasında da onunla bağlı məsələnin rolu olub.
Xanım siyasətçi bundan artıq danışmaq istəməyib.


Nəsimi Məmmədli isə AzPolitika.info-ya açıqlamasında əvvəlcə baş verənlərdən xəbərsiz olduğunu bildirib. “Əvvəla, Könül xanımın hansısa istintaqa aparılması mənim bildiyim bir məsələ deyil. Amma mən özüm istefa verməmişəm. Sədr tərəfindən iyun ayında belə bir sərəncam imzalanmışdı. Ondan sonra mən təyinat almadım. Bunula da faktiki olaraq partiyanın rəhbərliyindəki iştirakım dayandı. Bu da mənim tərəfimdən narazılıqla qarşılanmadı. O hesab edibsə ki, bu işi başqaları ilə davam etdirmək lazımdır, mən də hesab etmişəm ki, qəbul olunan qərara qarşı etirazım olmasın.”

N.Məmmədli deyir ki, 10 il tutduğu vəzifəsindən uzaqlaşdırılmasının səbəbini öyrənməyə cəhd etməyib. “Bunu İqbal bəydən soruşmaq lazımdır. O mətbuata açıqlama verib, amma mənim özümlə bu barədə bir kəlimə də olsun danışmayıb.”

N.Məmmədli Könül Quliyevanın istintaqda (?) İqbal Ağazadənin əleyhinə ifadə verməsi, hansısa təzyiqlərlə üzləşməsi məsələsi barədə öncə məlumatsız olduğunu desə də, daha sonra işdən xəbərdar olduğunu göstərən bir məqamı açıqlayıb: “Könül xanımın 5 ay öncə başına gələnlərlə bağlı bir videoçəkilişi var. Həmin çəkilişi də bütün səfirliklərə, hüquq müdafiəçilərinə təqdim edib. Bütün həqiqət ordadır…”

Beləliklə, deyilənlər öz təsdiqini tapır – xanım müavini hakimiyyət qollarından birinə İqbal Ağazadənin əleyhinə ifadə verib.

Başqa sözlə, kimlərəsə “Ümid” sədrinin əleyhinə kompromat lazım olub!

KİMƏ VƏ NİYƏ?