Vergilər Nazirliyi iş adamına cinayət işi açdı, prokurorluq ittihamdan imtina etdi

Vergidən yayınmaqda ittiham olunan Xaçmaz rayon sakini, 1977-ci il təvəllüdlü Fərhad Məmmədovun cinayət işi üzrə məhkəmə prosesi başa çatıb. İttihama görə, Fərhad Məmmədov Vergi Məcəlləsinin 16.1.1, 16.1.4, 16.1.6, 53.1, 71.1, 72, 77.3, 78.1, 82, 150.2, 152.1, 174, 177.1, 177.2 və 177.6-cı maddələrinin tələblərini pozub. O, vergi orqanına təqdim etdiyi bəyannamələrə təhrif edilmiş məlumatları daxil edib və bəyannamələr təqdim etməmək yolu ilə 579,59 manat sadələşdirilmiş vergi, 12554,87 manat əlavə dəyər vergisi olmaqla, ümumilikdə 13134,46 manat məbləğində vergiləri dövlət büdcəsinə ödəməkdən yayınıb.

Həmçinin Fərhad Məmmədov başqa şəxsə pul vəsaitinin ödənilməsinə dair məhkəmənin qətnaməsini qərəzli olaraq icra etməməklə ədalət mühakiməsinin nüfuzuna xələl gətirib.

Belə ki, Fərhad Məmmədov 2010-cu ilin 3-cü rübü üzrə 27625,25 manat dövriyyəsindən 552,51 manat məbləğində sadələşdirilmiş vergi hesablayıb ödəməli olduğu halda, qeydiyyatda olduğu vergi orqanına təqdim etdiyi bəyannamədə vergi tutulan dövriyyəsini 10000,00 manat, sadələşdirilmiş vergini 200,00 manat göstərib.

O, 2010-cu ilin 4-cü rübü üzrə 56353,50 manat dövriyyəsindən 1127,07 manat məbləğində sadələşdirilmiş vergi hesablayıb ödəməli olduğu halda, vergi orqanına təqdim etdiyi bəyannamədə vergi tutulan dövriyyəsini 15164,67 manat, sadələşdirilmiş vergini

303,29 manat göstərərək 823,78 manat sadələşdirilmiş vergini az hesablayıb.

Fərhad Məmmədov 2011-ci ilin 1-ci rübü üzrə 296,7 manat, 2011-ci ilin 2-ci rübü üzrə 300,00 manat, cəmi 596,7 manat artıq ödənilmiş sadələşdirilmiş vergi nəzərə almaqla, ümumilikdə 579,59 manat sadələşdirilmiş vergidən yayınıb.

Bundan əlavə, Fərhad Məmmədov 1 yanvar 2010-cu il tarixdən 31 dekabr 2010-cu il tarixədək olan dövr üzrə sahibkarlıq fəaliyyətindən vergi tutulan dövriyyəsi 95978,75 manat olduğundan, Vergi Məcəlləsinin 155 və 157-ci maddələrinə əsasən 10 gün ərzində ƏDV-nin məqsədləri üçün qeydiyyata dair ərizə verməli olduğu halda bunu etməyib və müvafiq bəyannamələri vergi orqanına təqdim etməyib. O, 13134,46 manat məbləğində vergiləri dövlət büdcəsinə ödəməkdən yayınıb.

Bundan başqa, Fərhad M.Məmmədov 38721,25 manat məbləğində pulun Nadir Əzimova ödənilməsinə dair Xaçmaz Rayon Məhkəməsinin 30 mart 2012-ci il tarixli qanuni qüvvəyə minmiş qətnaməsini üzürsüz səbəbdən müəyyən olunmuş müddətdə icra etməyib və icra məmurunun qanuni tələblərini yerinə yetirməyib.

Bu səbəbdən o, Xaçmaz Rayon Məhkəməsinin 7 noyabr 2012-ci il tarixli qərarına əsasən İnzibati Xətalar Məcəlləsinin 313-1.1-ci maddəsi ilə təqsirli bilinib. Onun barəsində həmin məcəllənin 21-ci maddəsi tətbiq edilməklə xəbərdarlıq tənbeh növü təyin edilib.

Ona icra üçün yeni müddət təyin olunmasına baxmayaraq hərəkətlərini davam etdirib və məhkəmənin qanuni qüvvəyə minmiş qərarını qərəzli olaraq icra etməyib.

Fərhad Məmmədov Cinayət Məcəlləsinin 213.1-ci (xeyli miqdarda vergiləri və ya məcburi dövlət sosial sığorta haqlarını ödəməkdən yayınma) və 306.1-ci (qanuni qüvvəyə minmiş məhkəmə qətnaməsini, hökmünü, qərardadını və ya qərarını qərəzli olaraq icra etməmə və ya həmin məhkəmə aktlarının icrasına maneçilik törətmə) maddələri ilə ittiham edilib.

Xaçmaz rayon Məhkəməsinin hökmü ilə Fərhad Məmmədov 2 il 11 ay 28 gün müddətinə azadlıqdan məhrum edilib. Hökmdən narazı qalan Fərhad Məmmədov apelyasiya şikayəti verib. O, barəsində ədalətli qərar qəbul edilməsini xahiş edib.

Sumqayıt Apelyasiya Məhkəməsi bir müddət əvvəl onun apelyasiya şikayətinə baxılıb və apelyasiya şikayətinin təmin edilməməsi barədə qərar qəbul edilib.

Həmin qərardan narazı qalan Fərhad Məmmədov kasasiya şikayəti verib. Onun şikayətinə Ali Məhkəmədə baxan hakimlər qərar qəbul edib. Qərara görə, Fərhad Məmmədovun işinə yenidən apelyasiya instansiyasında baxılması barədə qərar verilib.

Sumqayıt Apelyasiya Məhkəməsində növbəti dəfə Fərhad Məmmədovun işinə hakim kollegiyası onun şikayətini təmin edib. Məhkəmə Fərhad Məmmədovun barəsində vergi ittihamı üzrə cinayət işinə xitam verilib. Məhkəmə qərarını icra etməkdən qərəzli şəkildə boyun qaçırma ittihamı üzrə onu təqsirli bilib və ona 1 il 7 ay müddətinə cəza təyin edilib.

Bu dəfə qərardan Baş Prokurorluğunun Dövlət İttihamının Müdafiəsi üzrə İdarəsinin prokuroru Teymur Əsədov narazı qalıb. Prokuror Fərhad Məmmədovun cəzasının ağırlaşdırılması barədə

kasasiya protesti verib. O cümlədən mülki iddiaçı 3 saylı Ərazi vergilər idarəsi də kasasiya şikayəti verib.

Tərəflərin şikayətinə yenə də Ali Məhkəmədə baxılıb. Bu dəfə qarşı tərəfin şikayətləri təmin edilib və Sumqayıt Apelyasiya Məhkəməsinin növbəti çıxardığı qərarda ləğv edilib. İşin yenidən apelyasiya instansiyasında araşdırılması qərara alınıb. Bu dəfə apelyasiya instansiyasında şikayət hakim Şəmsəddin Abasov araşdırıb.

Fərhad Məmmədov Cinayət Məcəlləsinin 306.1-ci maddəsi ilə elan edilmiş ittiham üzrə özünü təqsirli bilib. O, ifadəsində göstərib ki, fındıq alışı ilə məşğul olaraq Rusiya Federasiyasına apararaq satıb: “2010-cu ildə biznes fəaliyyətini genişləndirmək məqsədi ilə tanışım Nazir Əzimovdan 80000 manat məbləğində borc pul istəmişəm. Nazir Əzimov məni uzun müddət tanıdığı üçün həmin məbləğdə vəsaiti bir il müddətinə qaytarmaq şərti ilə borc verdi. Mən də həmin pulu dövriyyəyə buraxdım. Sonradan biznes fəaliyyətimdə iflasa uğradığım üçün Nazir Əzimovdan borc aldığım məbləğdən müəyyən məbləğdə pul qaytara bilmədim. Sonra borc aldığım məbləği tam qaytara bilmədiyi üçün Nazir Əzimov barəmdə iddia ərizəsi ilə Xaçmaz Rayon Məhkəməsinə müraciət etdi. 2012-ci ilin mart ayının 30-da həmin məhkəmə tərəfindən 38721,25 manat məbləğində pul vəsaitinin məndən alınaraq Nazir Əzimova verilməsinə dair qətnamə çıxardı. Tələb olunan 38721,25 manat məbləğində pul vəsaitindən Nazir Əzimova cəmisi 3400 manat məbləğini pul qaytarmışam”.

Fərhad Məmmədovun vəkili Azər Əzizov çıxış bildirib ki, məhkuma Cinayət Məcəlləsinin 213.1-ci maddəsi ilə verilmiş

ittihamın öz təsdiqini tapmayıb. O, apelyasiya şikayətlərinin təmin edilməsini istəyib.

Prosesdə çıxış edən dövlət ittihamçısı Zəfər Ramazanov Fərhad Məmmədovun Cinayət Məcəlləsinin 213.1-ci maddəsi ilə təqsirli bilinməsi barədə cinayət təqibindən imtina edib. O, bildirib ki, Fərhad Məmmədov yalnız həmin maddə üzrə cinayət təqibinə və cinayət işinin icraatına xitam verilməlidir.

Dövlət ittihamçısı hökmün Fərhad Məmmədovun Cinayət Məcəlləsinin 306.1-ci maddəsi ilə təqsirli bilinib və azadlıqdan məhrumetmə cəzasına məhkum edilməsi hissəsində dəyişdirilmədən saxlanılmasını xahiş edib.

Məhkəmə kollegiyasının iclasında zərərçəkmiş kimi tanınan 3 saylı Ərazi Vergilər İdarəsinin nümayəndəsi Slavik Bədəlov Fərhad Məmmədovun Cinayət Məcəlləsinin 213.1-ci maddəsi ilə təqsirli bilinməsi barədə cinayət təqibindən dövlət ittihamçısının imtina etdiyi üçün həmin maddə üzrə cinayət təqibinə və cinayət işinin icraatına xitam verilməli olmasını, digər hissədə isə məhkumə cəza verilməsini məhkəmə kollegiyasının mülahizəsinə buraxdığını bildirib.

Hakim kollegiyası tərəflərin şikayətini dinlədikdən sonra qərar elan edib. Qərara görə, Xaçmaz rayon Məhkəməsinin hökmü ləğv edilib.

Fərhad Məmmədova vergi ilə bağlı verilmiş cinayət işinə xitam verilib. Məhkəmə Fərhad Məmmədovu Cinayət Məcəlləsinin 306.1-ci maddəsi ilə təqsirli bilib və 1 il 6 ay 28 gün müddətinə azadlıqdan məhrum etmə cəzası təyin edilib.

gundemxeber.az