Şəmsəli Quliyev belə talançılıq yolu ilə, bu gün böyük bir var-dövlətə və mal-mülkə də sahib olub

Nəqliyyat naziri cənab Ziya Məmmədovun adamı olduğu bildirilən Kürdəmir 5 saylı Dəmir Yolu Sahəsinin rəisi Şəmsəli Quliyev, hal-hazırda qanunsuz olaraq dəmir yolu reyslərini doğratdırıb satdırır və belə bir yolla da, dövlət əmlakını talan etməkdədir. Qeyd olunan dəmir yolu sahəsi, Hacıqabuldan-Ucar rayonunun Alı kənd dəmir yolu stansiyasına qədər məsafəni əhatə edir. Baş İdarə Kürdəmir rayonunda yerləşir. Bu dəmir yolu xətti hələ sovet dönəmində Hacıqabul, Kürdəmir və Ucar rayonlarında fəaliyyət göstərən əksər idarə və müəssisələrə yük daşınması üçün çəkilmişdir. Bu gün həmin idarə və müəssisələrin əksəriyyəti işləmir. Belə olan halda vəzifə səlahiyyətindən sui-istifadə edən Şəmsəli Quliyev, həmin dəmir yolu reyslərini təmir işləri adı ilə qanunsuz olaraq sökdürüb satdırır və əldə olunan gəliri də mənimsəyir. O, hər yerdə bildirir ki, guya ona belə bir tapşırıq Azərbaycan Dəmir Yolları QSC-nin sədri Cavid Qurbanov tərəfindən verilib.



“Gündəm Xəbər” redaksiyasını məlumatlandıran şəxslər bildirirlər ki, söküntü işləri oğurluq hadisəsi olduğundan, yalnız gecə saatlarında aparılır. Kəsilən dəmir yolu reysləri ayrı-ayrı maşınlarla daşınır və üzərinə torpaq qatı da tökdürülür ki, heç bir iz qalmasın. Əraziyə cavabdehlik daşıyan dəmir yolu polisi əməkdaşları isə, haqq aldıqlarından oğurluq cinayətinə göz yumurlar. Şəmsəli Quliyev belə talançılıq yolu ilə, bu gün böyük bir var-dövlətə, mal-mülkə də sahib olub. Buna görə də o, gecə-gündüz Ziya Məmmədova dualar oxuyur.



Baş verən oğurluq və mənimsəmə faktı ilə bağlı Azərbaycan Dəmir Yolları QSC-nin sədri Cavid Qurbanova “Gündəm Xəbər” vasitəsi ilə müraciət edib, xahişimizi çatdırırıq ki, dəmir yolu reyslərini oğurlayıb satan Şəmsəli Quliyev cinayət məsuliyyətinə cəlb olunsun və onun barəsində ciddi tədbirlər də görülsün.



Oğurluqda suçlanan Kürdəmir 5 saylı Dəmir Yolu Sahəsinin rəisi Şəmsəli Quliyevin də mövqeyini dinləməyə hazırıq.



Cəfər