Akif Çovdarov və işçisi Akif Əliyev Eldar Mahmudovun adını cinayətlərdə hallandırır

Zərərçəkmiş Fuad Zülfüqarov: “Akif Əliyev dedi ki, nazirimizi saymamısınız, Eldar Mahmudov üçün pay ayırmamısınız”

“50 min manatı Eldar Mahmudov üçün istədi”

Sabunçu rayon Məhkəməsinin inzibati binasıda ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edib.



Bakı Hərbi Məhkəməsinin hakimi Həbib Həsənovun sədrlik etdiyi prosesdə təqsirləndirilən Akif Əliyevin epizodu üzrə zərərçəkmiş “Met-ak” MMC-nin maliyyə işləri üzrə direktoru Fuad Zülfüqarov ifadə verib və istintaqa verdiyi ifadəsini təsdiqləyib.

Fuad Zülfüqarov bildirib ki, dayısı Alik Kərimov 1997-ci ildə “Met-ak” MMC-ni təsis edib: “2012-ci ildən həmin MMC-nin icraçı direktoru dayım oğlu Aydın Kərimovdur. 1997-ci ildən Alik Kərimovun yanında işləyirəm, 2012-ci ildən isə MMC-nin maliyyə işləri üzrə müdir vəzifəsində icra edirəm. İstehsalat müdiri Əzizov Mübariz Səlimxan oğludur. MMC-nin əsas fəaliyyəti plastik boru və fitinqlərin istehsaslı və topdan satışıdır. MMC-nin ofisi və istehsal sahəsi Bakışəhəri, Nərimanov rayonu, Böyük Şor 15a, dalan 2 ünvanında yerləşir”.

Zərərçəkmişin sözlərinə görə, 2015-ci ilin fevral ayından etibarən onun istifadəsində olan 050-210-77-47 nömrəli telefonuna mütəmadi olaraq MTN-nin əməkdaşı Akif Əliyev 050-211-16-05 nömrəli telefonla zənglər edib: “Akif Əliyev məni MTN-nə dəvət etid, bəzi maliyyə məsələlərinə aydınlıq gətirilməsi üçün verilən suallara cavab verməyimi istədi. Bu barədə dayım Alikə məlumat verdim”.

“Eldar Mahmudovu indiyənə qədər saymamısınız”

Fuad Zülfüqarov əlavə edib ki, bu ilin fevral ayının əvvəllərində Akif Əliyevin qəbuluna gedib: “Səhər saat 09:00-da MTN-nin inzibati binasına getdim, Komendaturanın qarşısında məni Akif Əliyevin idarəsinin işçisi qarşıladı və binanın 2-ci mərtəbəsinə apardı. Məni orada axşam saat 19:00-dək saxladılar. Həmin vaxt ərzində məni bir necə nəfər dindirdi, hədələdi və yazılı izahatı aldıqdan sonra saat 16 radələrində Akif Əliyev otağa daxil oldum. Akif Əliyev söhbət əsnasında bildirdi ki, uzun illərdirki işləyirsiniz nazirimiz Eldar Mahmudovu indiyənə qədər saymamısınız, bir dəfə də olsun əldə etdiyiniz gəlirdən Eldar Mahmudov üçün pay ayırmamısınız. Sizin maliyyə dövriyyəniz əlimizdədir. İşiniz ancaq pul qazanmaqdır, 50.000 manat pul verməlisiniz, həmin pulu verməyəcəyimiz təqdirdə sizə işləməyə imkan verilməyəcəkdir”. Mən isə Akif Əliyevə bildirdim ki, tələb olunan 50.000 manatın verilib-verilməməsini məsələsini MMC-nin təsisçi Alik Kərimov həll edə bilər, onunla danışıb, söz deyə bilərəm”.

“Dayım 10 min manat verilməsini istədi”

Fuad Zülfüqarovun sözlərinə görə, Akif Əliyev ilə bu məzmunda söhbətdən sonra axşam saat 19 radələrində onu MTN-dən buraxıblar: “Səhəri günü dayım Alik Kərimovla MMC-nin ofisində görüşdük, baş verənləri birlikdə təhlil etdik. Hər hansı bir qanun pozuntuları və ya qanunsuz fəaliyyətlərimiz olmadığına

görə Alik Kərimov rahat işləmələri Akif Əliyevin tələb etdiyi 50.000 manatın əvəzinə 10.000 manat verilməsini məndən istədi. Mən də MMC-nin xəzinəsindən rəsmi qaydada 10.000 manatı götürdüm. 11 fevral 2015-ci il tarixdə Akif Əliyevin istifadəsində olan telefonuna zəng etdim. Həmin gün MTN-nin yaxınlığında yerləşən “Sultan” kafesində Akif Əliyevlə görüşdüm və həmin pulu əlbəəl ona verdim. Bundan sonra Akif Əliyev bizi narahat etmədi”.

“10 min manatı Amkif Əliyevə bağışlamaq istəyirəm”

Bu epozod üzrə ifadə verən digər zərərçəkmiş Alik Kərimov bildirib ki, 1997-ci ildən bəri bu şirkətin rəhbəridir və iş adamı kimi fəaliyyəti dövründə bir çox problemlərlə və süni əngəllərlə qarşılaşıb. Bu epizoda gəlincə isə, Akif Əliyevi və digər təqsirləndirilənləri ilk dəfə gördüyünü deyib: “Akif Əliyevə baxıram və görürəm ki, pis adama oxşamır. 10 min manat elə də böyük məbləğ deyil və onunla şirkətin əməkdaşı arasında sonradan münasibət də olub. Mən 10 min manatı Amkif Əliyevə bağışlamaq istəyirəm. Şəxsən mənə Akif Əliyevin heç bir pisliyi dəyməyib. Bilmirəm, hüquqi cəhətdən bu nə dərəcədə düzgündür, hüquqşünas deyiləm, amma imkan olarsa, şikayəti geri götürərəm”.

Daha sonra təqsirləndirilən Akif Əliyev epizodla bağlı ifadə verib. O, zərərçəkmişlərin səsləndirdiyi ifadəslərinin əksər hissəsini təsdiqləyib. Qeyd edib ki, “METAK” MMC-nin əməkdaşı nazirliyə daxil olan operativ məlumatın araşdırılması üçün dəvət olunub. Təqsirləndirilən dövlət ittihamçısının sualını cavablandıraraq bildirib ki, heç kimdən 10 min manat pul almayıb.

“Akif Çovdarovun pul tələb etdiyini dedi”

Zərərçəkmiş Şahmar Qurbanovun epizodu üzrə şahid qismində İradə Vəliyeva dindirilib. İradə Vəliyevanın sözlərinə görə, tanışı

Şahmar Qurbanov 2007-ci ildə ondan Milli Təhlükəsizlik Nazirliyinin əməkdaşı Akif Çovdarovun istədiyi külli miqdarda pulu verməsini tələb etdiyini deyib: “Buna görə də Şahmar Qurbanov məndən borca pul istədi. Mən də Şahmara özümdə olan puldan 70.000 ABŞ dolları verdim”.

O, həmçinin ifadəsində qeyd edib ki, Şahmarın həmin ərəfələrdə öz evini, avtomaşınlarını, obyekini və sair əmlaklarını sataraq Akif Çovdarova külli miqdarda pul və brilyant verdiyini eşidib.

“Borclu olması barədə söhbət getdi”

Cinayət işi üzrə şahid kimi adı keçən Akif İsgəndərovun adamı İsgəndər Hüseynovun həyat yoldaşı Xədicəxanım Hüseynova bildirib ki, 2007-ci ildə onun həyat yoldaşı İsgəndər Hüseynovun yaxın dostu Şahmar Qurbanovun Qriş adlı Hindistan vətəndaşına olan borcunun əvəzinə onun adına mənzil alınıb: “Bu barədə razılığa gəlinərək söhbət aparılmasını bilsəm də, tərtib olunan müqavilənin mənim tərəfimdən imzalanıb-imzalanmadığını, konkret hansı mənzilin verildiyini xatırlamıram. Təxminən 8-9 il bundan qabaq Qriş İsgəndər və Şahmarın tanışı kimi yaşadığım evə gəldi. Evdə Şahmarın Qrişə borclu olması barədə söhbət getdi. Şahmar da Qrişə pulunun olmadığını bildirdi, Qriş isə onun barəsində öz ölkələrinin səfirliyinə şikayət edəcəyini söylədi. Şahmar borcun qaytarılması əvəzinə Qrişə ev təklif etdi və bundan sonra evin kimin adına alınması məsələsi ortaya çıxdı. Şahmar evin mənim adıma rəsmiləşdirilməsi və sonra satılması barədə razılığa gəlinmişdi. Daha sonra Şahmarın Qrişlə aralarında olan borc söhbətinin nə ilə nəticələndiyini bilməmişəm və bu barədə maraqlanmamışam”.

Onu da əlavə edək ki, İsgəndər Hüseynov noyabrın 23-də keçirilən prosesdə ifadə verib.

Proses dekabrın 5-də davam edəcək.

gundemxeber.az