Ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edəcək.

Akif Çovdarovun törətdiyi cinayətlərin əksəriyyəti hərbi cinayətlər olduğub üçün onun və onunla birlikdə ittiham olunan şəxslərin cinayət işi baxılması üçün Bakı Hərbi Məhkəməsinə göndərilib. Cinayət işi məhkəmənin sədri Həbib Həsənovun sədrlik etdiyi kollegiyada araşdırılır.

Məlumat üçün bildirək ki, Bakı Hərbi Məhkəməsində təhlükəsizlik tədbirləri güclü olmadığı üçün Akif Çovdarovun işinə Sabunçu rayon Məhkəməsinin inzibati binasında baxılır.

Buna səbəb isə bu məhkəmədə təhlükəsizlik tədbirlərinin güclü olmasıdır. Amma prosesə jurnalistlər buraxılmır. Bunu da belə əsaslandırırlar ki, Akif Çovdarovun cinayət işində dövlət əhəmiyyətli sirlər var.

Bu sirlərdən əsası birdə ondan ibarətdir ki, MTN-nin agentura şəbəkəsinə ayrılan pullar və şəbəkənin üzvlərinin ictimayyətə açıqlanmaması üçün nəzərdə tutulur.

Noyabrın 17-də keçirilən prosesdə bəzi maraqlı məqamlar ortaya çıxmışdı. Akif Çovdarov və onun vəkillərinin məhkəməni uzatmaq niyyətləri baş tutmadı. Artıq həmin gün məhkəmə istintaqı başlandı. Prokuror Akif Çovdarov və onun işçilərinin törətdiyi qanunsuz əməlləri rəsmi olaraq açıqlamağa başladı. Bu cinayət işi üzrə proses noyabrın 17-də davam edəcək. Həmin gün Akif Çovdarov ifadə verməsi gözlənilir.

Sonuncu məhkəmə iclaslarında Akif Çovdarov şantaj dolu çıxışlar etsə də, o, törətdiyi cinayətlərə toxunmamışdı. Həbsdəki general “mən danışmağabaşlasam daha pis vəziyyət yaranacaq”, “mən danışmaq istəmirəm”, “mən danışa bilmirəm” kimi açıqlamalar verməklə azadlıqda olan cinayətkar şəbəkəsini şantaj etməklə məşğul olur.

Amma Akif Çovdarovun bu tip şataj dolu açıqlamaları heç bir nəticə vermədi və məhkəmə istintaqı başladı. İndi diqqət qapalı keçirilən prosesdə Akif Çovdarovun nə danışmasına yönəlib...