Bunu İsrail baş naziri Benyamin Netanyahu Azərbaycan prezidenti İlham Əliyevlə birgə keçirdiyi mətbuat konfransında deyib.
B.Netanyahunun fikrincə, iki ölkə arasında sıx əlaqələr təkcə silah ticarəti anlamına gəlməməlidir, bu, həmçinin qarşılıqlı hörmət deməkdir.
“İsrail yəhudi, Azərbaycan isə müsəlman dövlətidir. Burada biz həm müsəlmanların, həm də yəhudilərin birgə çalışmasını, hər iki ölkə üçün yaxşı gələcək vəd edəcəyini görürük”, - deyə İsrail hökumət başçısı bildirib.
B.Netanyahu həmçinin iki ölkələri arasında enerji sektoru, kənd təsərrüfatı, təhsil və informasiya texnologiyaları sahəsində əməkdaşlığın genişlənməsini vurğulayıb.



Dekabrın 13-də Azərbaycan Prezidenti İlham Əliyevin İsrail Dövlətinin Baş naziri Benyamin Netanyahu ilə birgə işçi naharı olub.
Sonra Prezident İlham Əliyev və Baş nazir Benyamin Netanyahu 1997-ci ilin avqustunda Bakıya səfəri zamanı Baş nazir Benyamin Netanyahunun ulu öndər Heydər Əliyev ilə görüşdüyü Şəfəq iqamətgahına gəldilər.
Prezident İlham Əliyev və Baş nazir Benyamin Netanyahu burada xatirə şəkli çəkdirdilər.
İsrail baş naziri Benyamin Netanyahu Azərbaycan prezidenti İlham Əliyevlə keçirdiyi görüşün mətbuata açıq hissəsində mehribancasına qəbula görə dövlət başçısına təşəkkür edib.



İsrail KİV-ləri xəbər verir ki, Azərbaycan prezidenti ilə söhbətində Netanyahu son illər Bakıda gedən dəyişikliklərdən təəcübləndiyini gizlətməyib. “Sizin ölkənizdə hər şey necə də dəyişib! Mən bunu təyyarəmiz Bakıya enəndə gördüm”-Netanyahu deyib.
İsrail baş naziri iki ölkə arasında isti münasibətlərin mövcud olduğunu bildirib. O, israillilərlə azərbaycan arasında xeyirxah münasibətlər haqda danışaraq deyib ki, Azərbaycanda böyük yəhudi icması yaşayır. Habelə minlərlə adam Azərbaycandan İsrailə köçüb.
İlham Əliyev isə deyib ki, Azərbaycanda böyük yəhudi icması yaşayır, onlar cəmiyyətin mühüm tərkib hissəsidir. “Bu, bizim ölkələrimiz arasında münasibətlərin inkişafının əsasını təşkil edir. Bu gün Siz Azərbaycandakı yəhudi icmasının nümayəndələri ilə görüşdünüz”-prezident əlavə edib.
Netanyahu öz növbəsində qeyd edib ki, Azərbaycanla İsrail arasında münasibətlər bütün sferalarda inkişaf edir, xüsusən də yüksək texnologiyalar və energetika sahəsində.
Azərbaycan prezidenti İlham Əliyevin İsrail baş naziri Benyamin Netanyahu ilə təkbətək görüşü başa çatdıqdan sonra Azərbaycan-İsrail sənədlərinin imzalanması mərasimi olub.
“Azərbaycan Respublikasının Hökuməti ilə İsrail Dövlətinin Hökuməti arasında standartlaşdırma, uyğunluğun qiymətləndirilməsi və metrologiya sahələrində əməkdaşlıq haqqında” sazişi Azərbaycanın Standartlaşdırma, Metrologiya və Patent üzrə Dövlət Komitəsinin sədri Ramiz Həsənov və İsrailin ətraf mühitin qorunması naziri Zeev Elkin imzalayıblar.
“Azərbaycan Respublikasının Hökuməti ilə İsrail Dövlətinin Hökuməti arasında kənd təsərrüfatı sahəsində əməkdaşlıq haqqında” Sazişi Azərbaycanın kənd təsərrüfatı naziri Heydər Əsədov və İsrailin ətraf mühitin qorunması naziri Zeev Elkin imzalayıblar.
“Azərbaycan Respublikası ilə İsrail Dövləti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanı Azərbaycanın vergilər naziri Fazil Məmmədov və İsrailin ətraf mühitin qorunması naziri Zeev Elkin imzalayıblar.
“Azərbaycan Respublikasının Hökuməti ilə İsrail Dövlətinin Hökuməti arasında Birgə Komissiyasının yaradılması haqqında” Anlaşma Memorandumunu Azərbaycanın xarici işlər naziri Elmar Məmmədyarov və İsrailin ətraf mühitin qorunması naziri Zeev Elkin imzalayıblar.
Azərbaycan Prezidenti İlham Əliyevin İsrail Dövlətinin Baş naziri Benyamin Netanyahu ilə dünən təkbətək görüşü olub.
Prezident İlham Əliyev və xanımı Mehriban Əliyeva Baş nazir Benyamin Netanyahunu və xanımı Sara Netanyahunu qarşıladılar.
Azərbaycan Prezidenti İlham Əliyev və İsrailin Baş naziri Benyamin Netanyahu birgə foto çəkdirdilər.
Görüşdə ölkələr arasında əlaqələrin inkişafı ilə bağlı məsələlər ətrafında fikir mübadiləsi aparılıb.
Dünən İsrailin baş naziri Benyamin Netanyahu Təl-Əvivin Ben-Qurion hava limanından Azərbaycana və Qazaxıstana səfərə yola düşüb.
İsrail KİV-ləri xəbər verir ki, Netanyahunu səfərdə xanımı və çoxsaylı nümayəndə heyəti müşaiyət edir. İsrail kəşfiyyatına yaxın “Debka” saytı xəbər verir ki, Netanyahu Bakıda prezident İlham Əliyevlə danışıqlar aparacaq, təxminən 7 saat sonra Qazaxıstana yola düşəcək. “Netanyahunun hər iki paytaxtda danışıqları ölkələr arasında ticarət razılaşmaların, o cümlədən hərbi sənaye, təhlükəsizlik və kəşfiyyat sahəsində razılaşmaları əhatə edəcək”-sayt bildirir.
Netanyahu özü aerportda jurnalistlərə açıqlamasında deyib ki, onun Azərbaycana və Qazaxıstana səfəri İsrailin beynəlxalq aləmdən təcrid olunmadığının sübutudur. Çünki İsrailin beynəlxalq əlaqələri genişlənir, o cümlədən müsəlman dövlətləri ilə yeni əlaqələr qurur.
“Azərbaycan və Qazaxıstan İsraillə əlaqələrini genişləndirmək istəyir. Bu, bizim Asiya nəhəngləri, Afrika və Latın Amerikası ölkələri ilə əlaqələrimizin möhkəmləndirilməsinin ardınca baş verir”-Netanyahu bildirib. Baş nazir Azərbaycanı və Qazaxıstanı “müsəlman dünyasının iki mühüm ölkəsi” adlandırıb.
Netanyahu Bakıda ilk dəfə 90-cı illərin əvvəllərində olduğunu və prezident Heydər Əliyevlə görüşdüyünü xatırladıb. Bildirib ki, indiki səfər iki ölkə münasibətlərində “mühüm dönüş olacaq”.

gundemxeber.az