Mehriban Vəzir: “Bir qrup siyasi məsələləri Şura müstəvisinə çıxarmaq istəyir”

Ötən ilin aprel ayında “Mədən sənayesində şəffaflığın artırılması” QHT Koalisiyasına keçirilən seçkilərdən sonra Koalisiya təmsilçiləri arasında ciddi narazılıqlar yaşanmağa başladı. Seçkilər zamanı Milli Şuranın Koordinasiya Mərkəzindən göndərilən məktubda yazılan 400 min manatlıq ittihamı ciddi müzakirələrə səbəb oldu. Qarşılıqlı ittiham isə Koalisiyanın parçalanmasına səbəb oldu.

Bu günlərdə Bakı şəhərində “Mədən sənayesində şəffaflığın artırılması” QHT Koalisiyasının hazırkı və keçmiş üzvləri, Monitorinq Qrupu və Çoxtərəfli Qrupun təmsilçiləri ilə MSŞT-nin beynəlxalq İdarə Heyətinin sədri, İsveçin keçmiş baş naziri Fredrik Reinfeldt və qurumun Beynəlxalq Katibliyinin rəhbəri Yonas Moberqin görüşü keçirilib. Görüş haqqında yayılan məlumatlar isə Şura üzvləri tərəfindən birmənalı qarşılanmayıb. Məlumatlarla bağlı QHT Koalisiyası bəyanat yayıb. Sənəddə görüş haqqında səslənən fikirlərin doğru olmadığı vurğulanıb. Bəyanatda deyilir ki, bu görüş və aparılan müzakirələr barədə “Mədən sənayesində şəffaflığın artırılması” QHT Koalisiyası adından təhrif olunmuş məlumatlar yayılıb. Eyni zamanda, bu görüş barədə açıqlama verilməsi də etik qaydaların pozulması kimi qiymətləndirilib.Bəyanatın sonunda vurğulanır ki, Koalisiya Şurasının bir qrup üzvünün açıqlamaları və Şura adından bu cür təhrif olunmuş məlumatlar verməsi Koalisiyada parçalanmanı dərinləşdirməyə, qrup maraqlarının təmin olunmasına xidmət edir. QHT Koalisiyasından siyasi məqsədlərlə istifadə edirlər.

"Mədən sənayesində şəffaflığın artırılması” QHT Koalisiyasında nə baş verir? Bu kimi məsələləri “Cümhuriyət” qəzetinə şərh edən hüquq müdafiəçisi Mehriban Vəzir deyib ki, 30 apreldən, “Mədən sənayesində şəffaflığın artırılması” QHT Koalisiyasının tərkibi seçildikdən sonra qarşıdurmalar səngimir: “Bu seçkidə bir ədalətsizlik olub deyə bir tərəf digər tərəfə iradlarını bildirir. Qarşı tərəf isə bu iradları qəbul etmək istəmir. Bu günə qədər problemlər davam edir.

Tərəflər arasında mübahisəli olan məsələni aydınlaşdırmaq əvəzinə, ört-basdır etmək, üstündən keçmək istəyirlər. Ona görə də mətbuatda bu cür qarşıdurmalar yaşanır. Ümumiyyətlə, "Mədən sənayesində şəffaflığın artırılması" QHT Koalisiyasının vətəndaş cəmiyyəti qarşısında tutduğu bir tələb var ki, Şuranın fəaliyyətindən heç bir siyasi məqsədlər üçün istifadə olunmasın. Əgər bir nəfər "Mədən sənayesində şəffaflığın artırılması" haqqında yazı yazarsa və bu məsələylə bağlı araşdırmalar zamanı təqiblərə məruz qalarsa, o, zaman bu "Mədən sənayesində şəffaflığın artırılması" QHT Koalisiyasında qaldırıla bilər. Amma digər siyasi məsələlər bu müstəviyə gətirilməməlidir. Beynəlxalq tələb də bundan ibarətdir. Şuranın müəyyən bir mandatı var və bundan kənara çıxmaq olmaz. Bu məsələdəki incə məqam isə bundan ibarətdir ki, bir qrup bu qaydaları müdafiə edir, ancaq digər qrup isə bütün siyasi məsələləri bu çərçivəyə daxil etmək istəyir. Hər iki tərəflərin məqsədini müəyyən qədər anlayışla qarşılamaq olar”.

Mehriban Vəzir bildirib ki, QHT Koalisiyasında qruplaşma var: “Hər kəsin məlumatı var ki, hansı qrup siyasi məsələləri Şura müstəvisinə çıxarmaq istəyir, hansı qrup isə buna qarşı çıxır. İndiki Şuranın 6 və 5 nəfərlik qruplardan ibarət 11 üzvü var. Bir qrupa Qubad İbadoğlu, digər qrupa isə Əliməmməd Nuriyev rəhbərlik edir. Bu qruplar arasında da müəyyən qarşıdurmalar var. Bu qarşıdurmalar bir düşmənçilik, müharibə səviyyəsində deyil, sadəcə fikir ziddiyyətidir”. (cebhe.info)