Banklar isə ucuz dollardan da qazanır - Detallar

Dövlət Təhlükəsizlik Xidməti “qara bazar”ı beşiyində boğdu; DTX-nın keçirdiyi əməliyyatlardan sonra manat dollara nisbətən möhkəmlənir...

“Qara bazar”da əli olan məmurların “zərərsizləşdirilməsi” ilə bu proses öz məcrasına düşdü.

Yanvarın sonundan başlayaraq dollara tələb azalıb. Hətta dollara təklifində də artımlar var. Əslində, yanvar və fevral aylarında dollara tələbin azalması gözlənilən idi. Dekabr ayında idxal, borc öhdəliklərin ödənilməsi və eləcə də səfərlərin sayında artımlar baş verir.

Nəticədə ilin son ayında dollara olan artım növbəti ilin ilk ayında azalma ilə müşahidə edilir. Dövlət Neft Fondunun yanvar ayında cəmi 285 milyon dollar satması da həmçinin tələbin azalması ilə bağlı idi.

Ekspertlərin fikrincə, mart ayında Mərkəzi Bankın mövqeyi çox önəmli olacaq. Və əslində 2017-ci ildə Neft Fondunun 14.5 milyard manatlıq büdcəsi fonunda Mərkəzi Bank bazarda aparıcı mövqeyini qoruyub saxlaya bilər.

DTX-nın əməliyyatlarından sonra növbə maliyyə bazarına cavabdeh məmurlara qalıb. Artıq Mədət Quliyev üzərinə düşəni edib. İndi Mərkəzi Bank dollara nəzarət etməlidir.

banklar əvvəlcədən aşağı məzənnə alıb saxladıqları ehtiyat valyutanı qazanc mənbəyinə çeviriblər. Bununla parallel olaraq əhali də manatın möhkəmlənməsindən təlaşa düşərək əllərindəki dolları qısa vaxtda satmağa cəhd edirlər. Bütün bunlar bazarda dollar təklifini artırıb.

Yaranmış situasiyada banklar daha çox qazanc əldə etməyə çalışırlar. Ümumiyyətlə, son aylarda bankların əmanət cəlb etmək, kredit vermək, digər xidmətləri həyata keçirməkdə çətinlik çəkirlər. Ona görə də onlar yeganə gəlir mənbəyi kimi valyuta satışına diqqəti artırıblar.

Nəticədə banklarda dolların alış və satış məzənnələri arasında kəskin fərq yaranıb. Bu gün banklarda ABŞ valyutası 1.7000-1.7500 manata alınır. Bəzi banklarda alış məzənnəsi hətta 1.6800 manatdır. Satış məzənnəsi isə 1.8500-1.9200 manat arasında dəyişir.