İcra başçısı düşməni niyə ağladır, yəqin ki, səbəb hər kəsə bəllidir

Dağlıq Qarabağ müharibəsi zamanı digər ərazilər kimi, Goranboy rayonunun Tap Qaraqoyunlu kəndi də dəfələrlə erməni hücumlarına məruz qalsa da, kəndin qəhrəmancasına müdafiə olunması, məhz düşmən tərəfinin arzusunu gözündə qoydu. Kənd sərhəd zolağına olduqca yaxın ərazidə yerləşdiyindən, istər 1990-cı illərin əvvəllərində, istərsə də sonrakı illərdə ara-sıra ölüm-dirim savaşları baş vermiş və 38 nəfər sakin Tap Qaraqoyunlunun müdafiəsi uğrunda gedən döyüşlərdə canından da keçmişdir. Bəli, bu gün də adı çəkilən kəndin ərazisi cəbhənin ən qaynar nöqtələrindən biri hesab olunur və ara-sıra silahlı qarşıdurmalar da davam etməkdədir. Açıq-aydın onu davurğulayaq ki, düşmən tərəfi gündəlik atəşkəsi pozur və kəndi gülləboran etməkdə davam edir. Bütün bunlara baxmayaraq, sakinlər doğma yurd-yuvalarını tərk etmir və düşmən qarşısında sərasər də dayanırlar.



Bir məqamı da vurğulayaq ki, 14 oktyabr 2010-cu il tarixdə Azərbaycan ərazisində ikinci ən böyük bayrağın, məhz Tap Qaraqoyunlu kəndində açılışı olur. Dövlət Neft Şirkətinin vəsaiti hesabına ərsəyə gətirilən bayrağın uzunluğu 18 metr, eni 9 metr, dayaq hündürlüyü isə 65 metrdir. Dövlətimizin atributlarından olan bayrağımızın işğal altında olan ərazilərdən açıq-aydın şəkildə görünməsi, sanki hər bir azərbaycanlının qürur duyduğu anlar olur.

Belə bir halın varlığına baxmayaraq, əldə etdiyimiz səhih məlumatlara görə düşmən tərəfi üçrəngli bayrağımızı uzaq mənzilli silahlardan atılan atəşlə bir neçə dəfə yararsız hala salır. Belə olan halda, RİH-nin başçısı xoşagəlməz olayların təkrar yaşanmasına, üçrəngli bayrağımızın təhqir olunmasına, deşik-deşik olmasına bir daha yol verməmək üçün, təqribən on-onbir ay bundan əvvəl bayrağın endirilməsi haqqında müvafiq tapşırıqlarını verir.
Onu da qeyd edək ki, düşmən tərəfinin atdığı atəş nəticəsində bayrağımız deşik-deşik olmaqdan əlavə, digər fəsadların əmələ gəlməsinə də səbəb olur. Çünki əkinçiliklə və heyvandarlıq təsərrüfatı ilə məşğul olan kənd sakinlərinə, məhz atılan mərmilər həddən-ziyadə ziyanlıq da gətirir. Belə bir səbəblər üzündən də, kənd sakinlərinin bayrağın endirilməsi ilə bağlı rayon rəhbərliyinə ünvanladıqları bir neçə müraciətləri olub ki, bu da sakinlərin ümumi yaşayışlarının təmin edilməsinə olduqca təsir edib.
Atılan addımların mahiyyətini anlamayan və bir növ icra başçısının uğurlarına kölgə salmaq istəyənlər çox keçmir ki, nankor addımlarını atmağa qərar verirlər. Belə ki, nankorluq edənlər üçrəngli bayrağımızın endirilmiş şəkilini çəkərək, çoxsaylı oxucularını dezinformasiya ilə təmin edən saytlardan birinə göndərirlər. Çox keçmir ki, özündən və redaksiya əməkdaşlarından (əgər varsa) başqa oxucusu olmayan, ictimai fikirə təsir etməyi bacarmayan, dezinformasiya yaymaq bacarığına görə adı daim öncüllər sırasında hallanan sayt rəhbərliyi də, sanki yeni bir xəbər yayırmış kimi belə bir informasiyanı yaymağa qərar verir. Bu cür addımların atılması, həm sayt rəhbərliyinin xəyanətkar mövqelərini ortaya qoyur, həm də düşmən dəyirmanına su tökmüş olur.
Əvvala onu da qeyd edək ki, Tap Qaraqoyunlu kəndindəki bayraq məsələsi RİH-nin başçısı vəzifəsini daşıyan Nizaməddin Quliyevin ən həssas münasibət bəslədiyi məsələlərdən biridir. Çünki, o da adı çəkilən kəndin sakinidir və digər sakinlər kimi Nizaməddin müəllim də, bu kənddə böyüyüb, boya-başa çatıb. Ona məxsus ev də, düşmənə məxsus ağır silahlarla bir neçə dəfə atəşə tutulduğundan, evin dam örtüyü, giriş qapısı və s. yararsız hala da salınıb. Bəli, bəlkə də belə bir vəziyyətin yaşanmasına düşmən tərəfi olduqca sevinir. Amma onu da unutmaq olmaz ki, düşmənin qələbəsi müvəqqətidir, gec-tez Azərbaycan tərəfi dədə-baba torpaqlarına sahib duracaq və nankor qonşumuzun arzusunu gözündə də qoyacaq.
Bir məqama da toxunaq ki, əgər əvvəllər Tap Qaraqoyunlu sakinləri rəhmətə gedənlərini gecə saatlarında dəfn edirdilərsə, bu gün həmin problem aradan qaldırılıb. Çünki, icra başçısının birbaşa təşkilatçılığı ilə kəndin düşmən tərəfindən görünməsinin qarşısını almaq məqsədilə 6 metr hündürlükdə, 1500 metr isə uzunluğunda istinad divarları çəkilir. Ümumi iş yekunlaşdıqdan sonra, kənd sakinlərinin təhlükəsiz hərəkət etmələri tamamilə asanlaşacaq.
Belə bir addımların varlığı bir daha onu söyləməyə əsas verir ki, icra başçısı nəinki Tap Qaraqoyunlu kəndini, ümumilikdə Goranboy rayonunu göz bəbəyi kimi qorumağa hazır olan vəzifə sahibidir. Onun belə bir yanaşması hər bir yerli sakinə gün təki də aydındır. Onu da vurğulayaq ki, Tap Qaraqoyunlu kənd qəbristanlığının yuxarı hissəsindəki erməni “post”u bu gün yerində qalsa da, “Çaylağın” üst hissəsi adlanan ərazidə yerləşən və Tap Qaraqoyunlu kəndi ilə üz-üzə dayanan erməni “post”unda xidmət edən dığalar, ötən ilin aprelində nəzarət etdikləri “post” buraxıb qaçdılar. İndi kənd sakinləri bir qədər də rahat yaşamaqda davam edirlər.

Mirzə