V.Putinin 2002-ci il 14 noyabrda imzaladığı 325 saylı sərəncamda əks olunmuş maddə buna imkan verir

Milli Şuranın vahid namizədi Rustəm İbrahimbəyovun Rusiya vətəndaşlığından çıxarılması ilə bağlı məsələ tez bir vaxtda və sadə şəkildə həll oluna bilər, Modern.az qalmaqalla bağlı qonşu ölkənin qanunvericiliyini araşdırıb.

Belə ki, V.Putinin 2002-ci il 14 noyabrda imzaladığı “Rusiya Federasiyası vətəndaşlığına dair məsələlərə baxılması Qaydaları” haqqında 1325 saylı sərəncamda əks olunmuş maddə buna imkan verir.

Həmin sərəncamın 59-cu bəndində vaxtilə SSRİ vətəndaşı olmuş şəxslərin bununla bağlı hazırkı hüquqi statusu şərh edilib. “SSRİ vətəndaşı olmuş şəxslər əgər Rusiya Federasiyasının vətəndaşlığı almayıblarsa, bu qanunun qüvvəyə minmədiyi dövr ərzində bu vətəndaşlığı təsdiq etməyiblərsə, onlara özlərinin sərbəst formada yazdıqları ərizəyə müvafiq olaraq Rusiya vətəndaşı olmadıqlarını təsdiq edən arayış verilə bilər”-deyə Putinin imzaladığı sərəncamda göstərilir.

Qeyd edək ki, R.İbrahimbəyov “Yeni Müsavat” qəzetinə müsahibəsində hazırda daşıdığı Rusiya pasportunun ona SSRİ-dən miras qaldığını demişdi. O, vurğulayıb ki, həmişə Azərbaycan vətəndaşı olub.

“Mən həmişə Azərbaycan vətəndaşı olmuşam. Ölkədən heç vaxt çıxıb getməmişəm. Mənim Azərbaycanda teatrım olub. Bir sözlə, mən öz yaradıcılıq işlərimi həmişə Azərbaycanda davam etdirmişəm”-deyən R.İbrahimbəyov bildirib ki, sadəcə olaraq seçkilərdə iştirak etmək qərarı ilə bağlı Rusiya təbəəliyindən imtina etməyə qərar verib.

Qeyd edək ki, Rusiyada vətəndaşlıq məsələləri ilə bağlı bir neçə qanun dəyişdirilib.

1991-ci il 28 noyabrda SSRİ-nin süqutu ilə Rusiya Ali Soveti tərəfindən “RSFSR vətəndaşlığı” haqqında Qanun qəbul edilib. Bu qanun 1992-ci il fevralın 6-da qüvvəyə minib. Dövlətin adından “sovet sosialist” sözlərinin çıxarılması ilə əlaqadar 14 iyul 1993-cü ildə qanunun adı “Rusiya Federasiyası” adı ilə əvəzlənib.

1997-ci ildə Rusiya Prezidenti yanında vətəndaşlıq məsələləri üzrə Komissiya qanunun yeni redaksiyada hazırlannması barədə qərar qəbul edib. 1991-ci ildə qəbul olunmuş qanunun keçid dövründə dövlətçiliyin formalaşdırılması məqsədilə hazırlandığı bildirilib. Lakin həmin qanunun 1993-cü Konstitusiyası ilə uyğunlaşmadığı məlum olub. Bununla yanaşı, Rusiyanın 1997-ci ildə qoşulduğu “Vətəndaşlıq haqqında Avropa Konvensiyası” bu dəyişikliyi labüd edib.

2002-ci il iyunun 31-də Dövlət Duması “Rusiya Federasiyası vətəndaşlığı haqqında” qanun qəbul edib. 2002-ci ilin iyulun 1-dən bu qanun Rusiyada qüvvədədir.

Əlavə edək ki, vətəndaşlığa qəbul və ondan çıxarılma ilə bağlı məsələlər barədə qərarı prezident qəbul edir. Bunun üçün Prezident yanında Vətəndaşlıq məsələləri üzrə Komissiya yaradılıb. Rusiya qanununa görə, vətəndaşlıqdan imtina edilməsi ilə bağlı ərizə müvafiq quruma baxılmaq üçün təqdim edilən gündən qəbul edilmiş sayılır. Ərizəyə baxılma müddəti iki aydır. Bu müddət ərzində ərizəyə baxılmalıdır.

Azərbaycana qayıdışının pasportdan asılı oldğunu deyən Rüstəm İbrahimbəyov cibində hansı pasportu gəzdirdiyini açıqlamalıdır. Əgər R.İbrahimbəyov 2002-ci ildə qəbul edilmiş qanuna əsasən, Rusiyada vətəndaşlıq almayıbsa, o zaman rus pasportu onun Bakıya qayıtmağında ciddi əngələ çevrilməməlidir.