Azərbaycan Xarici İşlər Nazirlyinin Dağlıq Qarabağa qeyri-qanuni səfər etdiklərinə görə, “qara siyahı”ya saldığı şəxslər Almaniyada bununla bağlı toplantı keçirməyə hazırlaşırlar. Modern.az bildirir ki, bu barədə “Azatukun” radiosu məlumat yayıb.

Toplantı barədə anonsu isə Dağlıq Qarabağdakı separatçı rejimin qondarma “prezidenti” Bako Saakyan verib. Saakyan bildirib ki, bu toplantı barədə məlumatı ona Avropaya səfərdə olarkən Almaniya rəsmilərindən biri verib. Saakyan onun adını çəkməkdən imtina edib. Separatçı rejimin rəhbəri yalnız onu deyib ki, yaxın zamanda “qara siyahı”ya adı düşən xarici vətəndaşların belə formatda tədbiri keçiriləcək.

Qeyd edək ki, Xarici İşlər Nazirliyi Azərbaycanın işğal olunan ərazilərinə qanunsuz gəldiklərinə görə "persona non qrata" elan edilmiş şəxslərin siyahısında 335 nəfərin adını salıb.

Siyahıda Böyük Britaniya Lordlar Palatasının üzvü Baronessa Kerolayn Koks, Rusiya Siyasi və Hərbi Təhlil İnstitutunun beynəlxalq münasibətlər şöbəsinin rəisi Sergey Markedonov, Rusiya Dövlət Dumasının deputatı Maksim Mişşenko, Dumanın MDB və həmvətənlərlə iş komitəsi sədrinin birinci müavini, MDB ölkələri İnstitutunun direktoru Konstantin Zatulin, Almaniya Berlin Akademiyasının prezidenti Eckart D.Stratenschulten, Fransa Milli Assambleyasının üzvü Fransua Roşblan, Fransa Milli Assambleyasının deputatları Jorj Kolombye və Valeri Boyer, müğənni Monserrat Kabalye, Avropa İttifaqının Cənubi Qafqaz üzrə keçmiş nümayəndəsi Piter Semnebi və başqalarının adları var.