İlham Əliyev Azərbaycanın qarşısında müəyyən etdiyi vəzifələri açıqladı: onlar arasında ərazilərin, dağıdılan infrastrukturun bərpası mühüm yer tutur...

Azərbaycan Respublikasının Prezidenti İlham Əliyev və birinci xanım Mehriban Əliyeva Kəlbəcər və Laçın rayonlarına səfər etdi. Bu səfərdən yayılan videomateriallardan da göründüyü kimi, ölkəmizin rəhbərliyi səfəri boyunca rahat tövrləri, yüksək əhval-ruhiyyəsi və bölgənin gələcəyinə dair verdiyi nikbin proqnoz və vədləri ilə fərqlənib. Ermənilər neçə vaxtdır bu ərazilərimizdə gərginliyi artırmağa çalışırlar, hər gün atəşkəs pozulur. Hətta Prezident və xanımının səfəri reallaşan gün də Kəlbəcərlə sərhəddə atışma olması, guya Azərbaycan tərəfinin itki verməsi barədə doğru olmayan məlumat yaydılar.

Lakin Prezident bir səfəri ilə düşmənin bu fəaliyyətini sıfırladı. Mehriban Əliyevanın çəkdiyi videolardan da göründüyü kimi, Azərbaycan artıq Kəlbəcərdə məskunlaşma prosesinə start verib. Artıq Kəlbəcərin yaylaq statusu və funksiyaları qaytarılıb. Yol boyunca arıçılar, heyvandarlar və onların təsərrüfatları müşahidə olundu. Prezident onlarla və təsərrüfatları ilə maraqlandı, artıq hazır olan Kəlbəcər balını nümayiş etdirdi, tarixi ‘’İstisu’’ sanatoriyasında gövdə göstərisi həyata keçirtdi, şəhid vermədən geri ala bildiyi bölgələrin yaxın zamanlarda qurulub-inşa ediləcəyi vədlərini söylədi. Bir daha bəlli oldu ki, Qarabağın digər bölgələri kimi, Kəlbəcər və Laçının da yüksək turizm potensialı vardır. Prezident İlham Əliyevin Kəlbəcər şəhərində dövlət bayrağını ucatması və burada verdiyi mesajların siyasi anlamı olduqca önəmlidir. Dövlət başçısının Toğanalı-Kəlbəcər avtomobil yolu üzərində Murovdağda inşa olunacaq tunelin təməlini qoyması, 110/35/10 kilovoltluq “Kəlbəcər” yarımstansiyasının açılışını etməsi də artıq quruculuq işlərinin başlanmasının göstəricisi sayıla bilər. Bölgəyə işıq gəlir, canlanma gəlir, insanlar, mal-heyvan, həyat gəlir ...

Prezidentin Kəlbəcər-Laçın avtomobil yolu üzərində inşa olunacaq tunelin və Laçın Beynəlxalq Hava Limanının təməlini qoymasının bu bölgə üçün iqtisadi, üstəlik, böyük siyasi əhəmiyyəti var. Heç nəyə baxmadan, Azərbaycan işğaldan azad etdiyi ərazilərdə quruculuq işlərini davam etdirir və bu prosesin başında duran İlham Əliyev Qarabağı dirçəltməkdən ilham alır. Prezident İlham Əliyev Qarabağa səfərlərində bir başqa olur - ürəkli, daha səmimi, yüksək əhval-ruhiyyədə və inamlı. Bütün bu əhval-ruhiyyə də dərhal cəmiyyətimizə inkas olunur və dost-düşmənlərə də pay çatır. Dezinformasiyalar, ideoloji müharibələr hədəfində olan Azərbaycan toplumu sanki özü o bölgələrə səfər etmiş kimi olur və hər dəfə düşmən ölkənin, bədxah qüvvələrin apardıqları kampaniyalar Qarabağdan verilən mesajlarla neytrallaşdırılır.

Prezident səfər zamanı Azərbaycanın bir qarış torpağını belə Ermənistana güzəştə getməyəcəyini açıq mətnlə bəyan etdi. Bildirdi ki, Kəlbəcər, Laçın istiqamətində dövlət sərhədimizi möhkəmləndiririk: “Bu sərhəd 30 ilə yaxın müddət ərzində ermənilərin əlində idi və biz may ayında qarlar əriyəndən sonra bu sərhədlərə çıxmışıq, öz mövqelərimizi tutmuşuq, Zəngəzurda yerləşmişik və orada möhkəmlənirik. Bu, bizim torpağımızdır. Ermənistan tərəfindən səslənən fikirlər tamamilə əsassızdır. Biz öz torpağımızdayıq, Qaragöl də bizimdir, başqa yerlər də bizimdir. Biz gəlmişik. 30 il bu ərazi ermənilərin əlində idi. Əgər o sərhəd onların dediyi yerdən keçirdisə, durardılar o sərhəddə. Durardılar, deyərdilər ki, sərhəd budur. Nə oldu bəs? Biz gələndən sonra, durandan sonra dedilər ki, yox, biz düz yerdə durmamışıq. Biz düz yerdə durmuşuq, harada lazımdır, orada durmuşuq və əgər istəsək, harada lazım bilsək, orada da duracağıq. Onu heç kim unutmasın. Ona görə indi Müdafiə Nazirliyinin və Sərhəd Qoşunlarının xətti ilə bütün sərhəd boyunca - Murovdağdan ta Araz çayına qədər bütün sərhəd infrastrukturu, hərbi hissələr yaradılır, biz bu sərhədlərdə möhkəmlənirik”.

Azərbaycan torpaqlarını azad etdiyi 8 ayda dövlət sərhədini möhkəmlətmək hədəfini önə çəkib. Prezidentin verdiyi məlumatdan aydın olur ki, sərhəd boyu sərhədçilərimizin yerləşməsi üçün zəruri olan 700 kilometr uzunluğunda yolların çəkilişi prosesi gedir: “Mən hələ əsas şəhərlərarası yolları kənara qoyuram, o layihələr haqqında kifayət qədər məlumat verildi. Bizim sərhədlərə gedən 700 kilometr yolların çəkilişi prosesi gedir və artıq qış gələnə qədər bu işin təqribən 80 faizi görüləcək. Yəni torpaq, çınqıl örtüklə döşənmiş yollar və bu, bizə imkan verəcək ki, həm hərəkət üçün, həm hərbi nöqteyi-nəzərdən bu bölgələrdə daha da möhkəmlənək. Əlbəttə ki, Azərbaycan-Ermənistan sərhədində biz söz sahibiyik. Bu, təbiidir və bundan sonra da söz sahibi olacağıq. Ona görə, bu məsələ ilə bağlı bəzən hansısa xarici dairələrdə də qeyri-adekvat fikirlər səsləndirilir. Buna ehtiyac yoxdur. Biz harada lazım bilmişiksə, orada da durmuşuq və əgər bu kimisə narahat edirsə, əgər kimsə əsəbləşirsə, necə deyərlər, getsinlər, su içsinlər”.

Laçın-Kəlbəcər səfərində İ.Əliyev Azərbaycanın, özünün qarşısında müəyyən etdiyi vəzifələri açıqladı: onlar arasında ərazilərin, dağıdılan infrastrukturun bərpası mühüm yer tutur. Amma əsas diqqət, əlbəttə, azad olunmuş ərazilərdə möhkəmlənməkdir: “İndiki mərhələdə bizim əsas vəzifəmiz müharibənin nəticələrini möhkəmləndirməkdir, azad edilmiş torpaqlarda möhkəmlənməkdir. Azərbaycan-Ermənistan sərhədində bundan sonra da mövqelərimizi gücləndirməkdir. Yenidənqurma, bərpa işlərinə artıq start verilib, bu da əsas vəzifələrdən biridir. Keçmiş məcburi köçkünləri azad edilmiş torpaqlara tədricən qaytarmaq da gündəlikdə duran məsələdir. Mən artıq bildirmişəm, Zəngilan rayonunda bir neçə aydan sonra artıq birinci qrup keçmiş köçkünlər yerləşəcək. Eyni zamanda, Ağdam, Cəbrayıl, Füzuli və Xocavənd rayonlarında da pilot kəndlər seçildi. Artıq işlər gedir ki, o kəndlərin bərpasına start verək və vətəndaşları oraya qaytaraq. Ağdam şəhərinin baş planı təsdiqləndi, digər şəhərlərin baş planının təsdiqlənməsi yaxın aylarda nəzərdə tutulur.

Beləliklə, biz bundan sonrakı əsas hədəfləri düzgün müəyyən edərək, bu hədəflərə çatmağa da nail olacağıq. Biz bu gün buradayıq, Kəlbəcərdəyik, Azərbaycanın çox gözəl guşələrindən biri olan Kəlbəcərdəyik və biz bundan sonra burada əbədi yaşayacağıq".

Azərbaycan Prezidenti Ermənistanın işğal dövründə törətdiyi dağıntıları, vandallığı görməzdən gələn qüvvələrə də açıq mesaj verdi: “Zaman dəyişir, erməni faşizmi dəyişmir və dəyişməyəcək. Heç kim bunu unutmamalıdır. İndi onların bəzi hallarda göndərdikləri yaltaqlıqla dolu sözlərinə inanmaq olmaz. Buna inanmaq istəyən, bax, bu mənzərəni göz önünə gətirsin, dağıdılmış Ağdamı, Füzulini, Şuşanı, Kəlbəcəri, Laçını, Zəngilanı, Qubadlını, Cəbrayılı göz önünə gətirsin. Erməni vəhşilərin əməlləri göz qabağındadır. Amma onların hamiləri bunu görmək istəmirlər. Amma görməlidirlər və görəcəklər. Onların gözünə soxacağıq. Biz indi kitablar da dərc edirik, göstəriş vermişəm, təqdimatlar da olacaq. Xarici ölkələrdə sərgilər olacaq. Biz göstərəcəyik. Bunu görmək istəməyən məcbur olub görəcək. Görəcək ki, erməni faşizmi, erməni vəhşiliyi nədir”.

Azərbaycan ərazilərindən soyğunçuluq yolu ilə əldə edilən bir qəpiyini belə güzəştə getməyəcək. Prezident İ.Əliyevin Kəlbəcərdən verdiyi mesajlardan biri də bu oldu: “Ermənilər işğal dövründə, eyni zamanda bizim təbii sərvətlərimizi də qanunsuz olaraq talan edirdilər. Bu işlərdə bəzi xarici şirkətlər onlara yardım edirdi. Bu şirkətlərin indi iki yolu var: ya bizə təzminat ödəyəcəklər, ya da ki, beynəlxalq məhkəməyə gedəcəklər. Artıq məhkəmə prosedurları başlamışdır. Buna biz start verdik, tanınmış beynəlxalq hüquq şirkətlərini dəvət etdik və indi məhkəmə işləri hazırlanır. Kəlbəcərdə Söyüdlüdə, Zəngilanda Vejnəlidə, başqa yerlərdə bizim qızıl yataqlarımız xarici şirkətlər tərəfindən istismar edilirdi. O şirkətlər bilmirdilər ki, bu, Azərbaycan torpağıdır? Bilirdilər! Amma buna məhəl qoymurdular. İndi cavab verəcəklər. Biz demişik, əgər istəmirlərsə ki, biz onları dünya miqyasında biabır edək, gəlsinlər, vurulmuş ziyanı bizə ödəsinlər, təzminat ödəsinlər və ondan sonra rahat yaşaya bilərlər”.

Nəinki işğal altında olan ərazilərdə təbii sərvətlərimizi talayanlar, həmçinin Azərbaycan ərazisinə axan çayları çirkləndirənlər belə beynəlxalq məhkəmələrdə cavab verməli olacaqlar: “Bizim meşələrimiz ermənilər tərəfindən məhv edilib. İndi bizim ”Azərkosmos"un fotoları var - işğaldan əvvəl neçə min hektar meşə altında idi və indi nə qədərdir. Ağacla dolu olan altmış min hektara yaxın sahəni, meşə fondunu ermənilər dağıdıblar, yəni kəsiblər. Kəsiblər, talayıblar, aparıblar. Eşitdiyimə görə, orada parket işləri, bu biznes çox sürətlə gedirdi. Bu da talançılıqdır. Bu talançılığa görə də cavab verəcəklər. Bizim çaylarımızı zəhərləyiblər. Oxçuçay nə gündədir? Oxçuçay təbii fəlakətdir və onu zəhərləyən yenə də xarici şirkətdir. O şirkət də cavab verməlidir və verəcəkdir. Dəymiş hər bir ziyan hesablanır. Azad edilmiş bütün torpaqlarda, şəhərlərlə, kəndlərdə indi monitorinq aparılır, pasportlaşdırma aparılır, bütün evlərin pasportları hazırlanır, dəymiş ziyan təsbit edilir və biz beynəlxalq məhkəmələrdə dəymiş bütün ziyanın qaytarılmasını tələb edəcəyik.

Təbii sərvətlər talan edilib, istismar edilib, çaylarımız zəhərlənib, meşələrimiz qırılıb, evlərimiz dağıdılıb, məscidlərimiz sökülüb. Bunu kim edib? Ermənilər! Cavab verməlidirlər və verəcəklər".

Gundemxeber.Az