Sərhədlərin delimitasiyası və sülh razılaşmasına hazırlıq haqda sazişlərin imzalanması məqsədilə noyabrın 10-da Rusiya, Azərbaycan və Ermənistan liderlərinin görüşü planlaşdırılmışdı. Amma son anda görüş baş tutmadı və Ermənistan baş naziri Nikol Paşinyan etiraf etdi ki, görüşü o əngəlləyib. O, hökumətin iclasında Zəngəzur dəhlizi haqda da danışıb.

Bir yandan da xəbərlər yayılır ki, Qarabağda separatçı-terrorçular yeni müharibəyə hazırlaşır. Baş separatçı Araik Arutyunyanın bununla bağlı “proqram” xarakterli çıxışından belə qənaət hasil olur.
Bəs Azərbaycan yaranmış vəziyyətlə bağlı hansı mövqeni tutacaq? Ermənilərin - istər İrəvanın, istər “Stepanakert”in - bu davakar və müharibə anonsuna bərabər davranışlarına necə cavab veriləcək? Rusiya və prezident Putin Paşinyanın onun təşkil etmək istədiyi toplantını pozmasına dözümlü yanaşacaqmı?
Politoloq İlyas Hüseynov “Yeni Müsavat”a bildirdi ki, sərhədlərin delimitasiyası və demarkasiyası, eləcə də bölgədəki kommunikasiya xətlərinin açılması ilə bağlı ötən ilin noyabrın 10-da imzalanmış üçtərəfli birgə bəyanatın bir ili tamam olduğu vaxtda üç ölkənin liderləri arasında görüşün keçirilməsi planlaşdırılmışdı: “Əsas məsələlər kimi sərhədlərin tanınması, delimitasiya və demarkasiya ilə bağlı işçi qrupunun formalaşdırılması, həm də nəqliyyat və kommunikasiya xətlərinin açılması ilə əlaqədar işlərin koordinasiyası nəzərdə tutulurdu. Bu iki önəmli tezislə bağlı bir bəyanatın imzalanması da nəzərdən keçirilirdi. Daha sora bu görüşün onlayn formatda keçirilməsinə dair məlumatlar paylaşıldı və bu Rusiya Prezidentinin mətbuat katibi Dmitri Peskov tərəfindən səsləndirilmişdi. Bu görüşün keçirilməsinə əngəl yaradan tərəf Ermənistan və onun baş naziri Nikol Paşinyan oldu. Bunu Paşinyan özü etiraf edib.
Ermənistan bununla kifayətlənmədi və pozuculuq addımlarını davam etdirdi. Laçın rayonu istiqamətində Ermənistan silahlı birləşmələrinin Azərbaycan ərazisinə soxulması açıq təxribat pozuculuq əməli idi. Daha bir pozuculuq istiqamətli addım Ermənistanın müdafiə naziri Arşak Karapetyanın Azərbaycan ərazisi olan Xankəndiyə gəlməsi oldu. Bu da ciddi bir təxribat idi. Bütün bu pozuculuq hərəkətləri və təxribatlar regionda gərginliyin artırılmasına xidmət edir. Üçtərəfli birgə bəyanatın 4-cü maddəsi faktiki olaraq Ermənistan tərəfindən icra olunmur və məsələ Ermənistanın bu davranışı üzündən dalana dirənib. İstənilən halda separatçılar və onların dəstəklədiyi terrorçular intiqam hissi ilə yaşayırlar".
Ekspert qeyd etdi ki, Prezident Vladimir Putinin üçtərəfli görüşün keçirilməsi təşəbbüsü faktiki olaraq Paşinyan tərəfindən pozuldu: “Bu, əslində Putinə qarşı çıxmaq, ona meydan oxumaq kimi də qəbul edilə bilər. Ona görə də Ermənistanın və şəxsən Paşinyanın cəzalandırılacağı gözlənilir. Paşinyan Ermənistanda radikal partiya olan ”SastnaTser"in Rusiya əleyhinə mitinq keçirməsinə də icazə verdi. Bu da Rusiyaya qarşı Paşinyanın daha bir addımı sayıla bilər. Bütün bunlar, şübhəsiz ki, Kreml tərəfindən izlənilir və heç də xoş qarşılanmayacaq. Putinin bu vəziyyətə uzun müddət dözəcəyi inandırıcı deyil. Kreml tərəfindən Ermənistana qarşı ciddi tədbirlər həyata keçiriləcək.
Azərbaycan isə Ermənistana xəbərdarlıqlarını artıq edib. Pozuculuq hərəkətlərinə qarşı çox ciddi tədbirlər görüləcək. Sonuncu dəfə 60 erməni hərbi təxribatçı mühasirəyə alındı. Bu, əslində təxribatçıların ələ keçirilməsi idi. Azərbaycan bu dəfə onları buraxdı. Gələn dəfə Azərbaycan daha sərt addım ata bilər və bu hüququnu özündə saxlayır".
Politoloq Azad Məsiyev isə xatırlatdı ki, üçtərəfli bəyanatın həyata keçirilməsinə qarant kimi Rusiya çıxış edib: “Bəyanatın müddəalarından biri Zəngəzur yolunun açılması, sərhədlərin dəqiqləşdirilməsi müəyyən edilməsidir. Ermənistan tərəfi bu sazişin icrasını ləngitməkdədir. Rusiya Cənubi Qafqazda böyük sülhün imzalanmasında maraqlıdır. Çünki münaqişə uzandıqca Rusiyanın Cənubi Qafqazda strateji maraqları zərbə alır. Ona görə də Rusiya sülh sazişinin imzalanmasında maraqlıdır. Böyük sülh sazişinin imzalanması üçün isə 10 noyabr bəyanatı tam olaraq həyata keçirilməlidir. Ermənistanı bu məsələnin həllindən yayınmağa sövq edən ABŞ-dır. 44 günlük müharibə ABŞ-ın Cənubi Qafqaz planlarını pozub. Buna görə də Amerika Nikol Paşinyana sülh sazişinin imzalanmaması üçün təsir göstərir. Paşinyan da bu istəyi yerinə yetirir və hətta Putinin təşəbbüsünün reallaşmasına mane olur. Nikol Paşinyan ABŞ-la Rusiya arasında ikili oyun oynayır. Bu oyun ona baha başa gələ bilər. Kremlin onun bu oyunundan qəzəbləncəyi ehtimalı get-gedə artır. Paşinyana hansı cəzanın veriləcəyini isə dəqiq söyləmək hələ tezdir”.

Gundemxeber.Az