Azərbaycan Şərq Tərəfdaşlığının birgə bəyannaməsində Belarusla bağlı bəndi öz qeyd-şərti ilə qəbul edib, Azərbaycan Xarici İşlər Nazirliyi (XİN) bildirib.

Qurumun mətbuat xidmətinin rəhbəri Leyla Abdullayeva BBC News Azərbaycancaya bildirib ki, sənəddə Belarusla bağlı əks olunmuş fikirlərin Azərbaycanın xarici siyasət prinsiplərinə uyğun olmaması səbəbindən Azərbaycan onu "öz qeyd-şərti ilə" qəbul edib.

"Yəni, Azərbaycan Belarusla bağlı 11-ci bənddəki mövqeyi bölüşmədiyini bildirib", Leyla Abdullayeva deyib.

Birgə Bəyannamə Şərq Tərəfdaşlığının (ŞT) dekabrın 15-də Brüssel şəhərində keçirilən 6-cı Zirvə toplantısında qəbul edilib.

Digər qeyd-şərtlər

Azərbaycan XİN rəsmisi həmçinin toplantıda qəbul edilmiş birgə bəyannamədəki digər qeyd-şərtlərə də aydınlıq gətirib.

Leyla Abdullayeva bildirib ki, birgə bəyannamədə, həmçinin pandemiyanın qarşısının alınması, onun nəticələrinin yumşaldılması və aradan qaldırılmasında qlobal həmrəylik, gücləndirilmiş əməkdaşlıq və çoxtərəfliliyə çağırış edilib.

"Bu, ölkəmizin Qoşulmama Hərəkatına sədrliyi çərçivəsində COVİD-19 ilə mübarizə istiqamətində fəaliyyət prioritetləri ilə uyğunluq təşkil edir", - o deyib.

Leyla Abdullayeva həmçinin vurğulayıb ki, sənəddə Azərbaycan üçün əhəmiyyət kəsb edən bir sıra məsələlər də əks olunub.

"Aİ bütün tərəfdaş ölkələrin, o cümlədən Azərbaycanın ərazi bütövlüyünü onun beynəlxalq səviyyədə tanınmış sərhədləri çərçivəsində dəstəkləyib, Azərbaycan - Aİ yeni ikitərəfli saziş layihəsi üzrə davam edən danışıqlar alqışlanıb, Aİ-yə qaz təchizatı mənbələri və marşrutlarının şaxələndirilməsinə verdiyi töhfə baxımından Cənub Qaz Dəhlizi layihəsinin yekunlaşdırılması alqışlanıb".

Azərbaycanın hər zaman Şərq Tərəfdaşlığı proqramının qarşıdurma məzmununda qurulmasının "əleyhinə olduğunu deyən" qurum rəsmisi, bu prinsipin birgə bəyannamənin özündə də əks olunduğunu diqqətə çatdırıb.

Leyla Abdullayeva bu məsələdə Azərbaycanın mövqeyinin "Aİ üzv ölkələri və tərəfdaş ölkələrin üçüncü ölkələrlə münasibətlərində müşahidə olunan çağırış və çətinlikləri ŞT proqramına gətirməməsi" olduğunu nəzərə çatdırıb.

"Digər tərəfdən, ŞT proqramı yalnız tərəfdaş ölkələrin Aİ ilə münasibətlərinə deyil, eyni zamanda onların özləri arasında münasibətlərinin inkişafına xidmət etməlidir. ŞT proqramı tərəfdaş ölkələrin üçüncü ölkələrlə bu proqramdan kənarda qurduğu yüksək səviyyəli münasibətlərə xələl gətirən siyasət yürütməməlidir", - o deyib.

Azərbaycanın digər qeyd-şərti Birgə Bəyannamənin texniki əlavəsində "münaqişənin təsirinə məruz qalan ərazilər"lə bağlı olub.

"Sənəddə bildirilir ki, Aİ paytaxtlardan kənarda, münaqişənin təsirinə məruz qalan ərazilərdə fəaliyyət göstərən təşkilatlara dəstək verəcəkdir. Azərbaycan isə verdiyi qeyd-şərtdə həmin ərazilərdə fəaliyyətin ərazinin məxsus olduğu ölkənin müraciəti və razılığı ilə həyata keçirilməsinin zəruriliyini vurğulamışdır. Bu mövqe isə bilavasitə beynəlxalq hüquqa və dövlətlərin suveren hüquqlarına əsaslanır", Qurum rəsmisi bəyan edib.

GundemXeber.Az