Bunu Qaynarinfo-ya açıqlamasında Ukrayna ilə Rusiya arasında bu gün keçirilməsi gözlənilən üçüncü görüş barədə danışarkən politoloq Tural Rzayev deyib: 

"Görüş öncəsi Rusiya tərəfi döyüş gedən şəhərlərə humanitar yardımın çatdırılması məsələsində razılığa gəlinmədiyi barədə açıqlama verdi. Bu da ondan xəbər verir ki, Rusiya hmanitar yardım adı altında mühasirədə qalan şəhərlərdəki sakinlərin müqavimətini gücləndirmək üçün silah-sursat daşına biləcəyindən ehtiyat edir. Ona görə də bu məsələdə uzlaşa bulməyiblər”.

Ekspertin fikrincə, yaxın müddətdə Antalyada baş tutacaq İqtisadi Forum çərçivəsində Ukrayna və Rusiya xarici işlər nazirləri arasında görüşün olacağı gözləniləndir:

"Türkiyə tərfi bununla bağlı mesaj verib. Ankara həmin tədbirdə sözügedən görüşün baş tutmasına çalışacaq. Son iki görüş sərhəddə olub, üçüncü də həmçinin orada olacaq. Bu da ondan xəbər verir ki, həmin görüşlər diplomatik kontekstdə aparılan siyasi görüşlər deyil. Burada daha çox humanitar məsələlər, tərəflər arasında diplomatik görüşə qədərki proseslər müzakirə olunur. Real danışıqlar barədə isə yalnız xarici işlər nazirləri, yaxud da dövlət başçıları səviyyəsində görüşlər zamanı danışa bilərik”.

Həmsöhbətimizə görə, üçüncü görüşdə Kiyev yenidən döyüşlər gedən şəhərlərə humanitar yardımın ayrılması məsələsini gündəmə gətirəcək:

"İndiki mərhələdə Ukrayna tərəfi buna çalışır. Moskva isə ehtiyat edir. İkinci görüş sonrası Ukrayna nümayəndələrindən biri öldürüldü. Versiyalara görə, həmin nümayəndə Moskva ilə uzlaşmaya gedilməsini istəyib. Buradan görünür ki, Ukrayna tərəfində Rusiya ilə uzlaşmaya gedilməsini istəyənlər var.

 

Həmçinin, Rusiya tərəfində də müharibə əleyhinə olan qüvvələr var. Hər iki tərəfdə bu tip qüvvələrin olması tərəfləri müəyyən mənada danışıqlara sövq edə bilər. Qərb Ukraynaya dəstək verir. Amma işğal xəritəsinə baxanda, Rusiyanın böyük bir ölçüdə işğal apardığını da görürük”.