Ermənistan KİV-ləri parlamentdəki “Hayastan” blokundan olan bir qrup deputatın dünən Qarabağa gəldiyi barədə xəbər yayıb. Erməni deputatların Laçın keçid məntəqəsindən geri qaytarıla biləcəyi qorxusuna rəğmən, onlar sərhəddi maneəsiz keçərək, Azərbaycan ərazisinə daxil olublar. Deputatlar səfərin təfərrüatlarını açıqlamır. Eyni zamanda, Azərbaycan tərəfi Laçın şəhəri, Zabux və Sus kəndlərində qanunsuz yaşayan ermənilərin avqustun 25-nə kimi çıxmalarını tələb edib. Hazırda həmin ərazilərdə yır-yığış başlayıb və ermənilər köçməyə hazırlaşırlar.

Ermənistanlı deputatların bölgəyə gəlişində məqsəd nədir?

Gundemxeber.az bildirir ki, Orta Doğu Araşdırmalar Mərkəzinin rəhbəri, politoloq Sədrəddin Soltan Editor.az-a açıqlamasında bildirib ki, “Hayastan” bloku Ermənistanın keçmiş prezidenti Serj Sarkisyanın dəstəklədiyi blokdur:

” Blokun başında Ermənistanın keçmiş müdafiə naziri Seyran Ohanyan dayanır. O isə Azərbaycan vətəndaşı olub və Xocalı soyqırımının törədilməsində iştirak edib. “Hayastan” bloku Ermənistanda müxalifət sayılır və onlar Rusiya tərəfindən idarə olunur. Nikol Paşinyan növbəti dəfə baş nazir seçildikdən və 44 günlük müharibədən sonra parlamentdə təmsil olunan “Hayastan” bloku Paşinyanın istefasını tələb edir və Qarabağda müharibənin günahkarı kimi mövcud hakimiyyəti görür. “Hayastan” bloku bir müddət öncə guya Qarabağa ermənilərin buraxılmasında maneələrin olduğunu iddia edirdi. Hətta bu yaxınlarda Ermənistanın keçmiş xarici işlər naziri Raffi Ovanesyan Qarabağa gəlişinin qarşısı alınıb. Qarabağa Ermənistan vətəndaşları yalnız dinc məqsədlə gələ bilər. Orada hər hansı pozuculuq fəaliyyəti, cinayətkar əməllər törədiləcəksə, gəlişinə qadağa qoyulmalıdır. Əslində Laçın dəhlizinin missiyası Qarabağdakı Azərbaycan vətəndaşı olan ermənilərin sərbəst şəkildə İrəvana səfər etmələrinə şərait yaratmaqdır. Eləcə də Ermənistan vətəndaşı olan ermənilərin Qarabağda öz qohum-əqrabalarını görmələrinə imkan yaradır. Bu dəhliz Azərbaycan tərəfindən son dərəcədə humanistcəsinə atılmış bir addımdır. “Hayastan” bloku deputatları da Qarabağ ərazisinə gəlişi ilə guya vəziyyəti dəyərləndirirlər. Bu yaxınlarda onların mitinqi keçirilməlidir. Məqsəd bu mitinqdə əhaliyə doğru məlumat verməkdir”.

S. Soltan qeyd edib ki, Azərbaycan Qarabağda quruculuq işləri ilə yanaşı, həm də 2020-ci il 10 noyabrda imzalanan Üçtərəfli Bəyanatdan doğan tələblərin yerinə yetirilməsi ilə məşğuldur:

“Ərazilərimizdə ermənilər qanunsuz yerləşiblər, tarix boyu orada erməni yaşamayıb. Oradakı ermənilər sonradan gəlmədir. Azərbaycan Qarabağda qanunsuz erməni terrorçularının zərərsizləşdirilib tərk-silah etməsi istiqamətində əməliyyatlar keçirir. Bundan başqa 10 noyabr bəyanatının 4-cü maddəsində rus sülhməramlılarının Azərbaycan ərazisinə daxil olması ilə paralel erməni silahlılarının da çıxması nəzərdə tutulub. Ötən iki ilə yaxındır ki, Ermənistan və onun təminatçısı kimi Rusiya bu öhdəliyə əməl etməyib. Hesab edirəm ki, erməni deputatların Qarabağa gəlişində digər məsələ isə həm də Rusiya yönlü münasibəti dəqiqləşdirməkdir. Çünki Rusiya bölgədə Ermənistanın xeyrinə ciddi işlər görüb. Son zamanlar Ermənistanda Rusiya sülhməramlıların öz mandatına zidd fəaliyyət göstərməsi ilə bağlı fikirlər səslənir. Hayastan blokunun deputatları səfərdən sonra ölkələrində Rusiya sülhməramlılarının təbliği ilə bağlı geniş kampaniya aparacaqlar. Onlar hesab edir ki, rus sülhməramlılar Azərbaycan ərazisində müddətsiz yerləşməlidir”.

Gundemxeber.az