Prezident İlham Əliyev doğma azərbaycan və qardaş türk dilindən başqa, rus, ingilis, fransız dillərini mükəmməl bilir və eyni zamanda, hansı ölkələrə gedirsə, həmin ölkələrin liderlərini poliqlotluq qabiliyyəti ilə heyran edir. Həm getdiyi əsas böyük ölkələrin öz dillərində danışır, həm də siyasi baxışlarını tam izah edə bilir. Bu da qarşıdakı dinləyici həmkarlarını mat vəziyyətinə salır. Belə situasiyalarda İlham Əliyevin güclü siyasi bacarığa malik olmasını aydın şəkildə görmək olur. 

Bu gün reallıq odur ki, İlham Əliyevin ölkə daxilində qarşısına çıxacaq alternativi yoxdur. Düzdür, ölkədə iqtisadi-siyasi və sosial vəziyyət arzuolunan səviyyədə olmasa da, Prezident hakimiyyəti düzgün idarə etməyi bacarır. Daxili siyasətdə qabaqlayıcı addımları vaxtında ata bilir. Ona görə də Azərbaycan müxalifəti səsini çıxartmağa belə macal tapmır. 

Əlbət ki, çox dil bilmək şərt deyil, hamı ilə “dil tapmaq” şərtdir. Lider, ölkə başçısı üçün əsas məsələ güclü siyasətçi olmaqdır. Bunların da hamısını Azərbaycan Prezidenti özündə cəmləşdirib və bu günün və gələcəyin perspektivli lideri olduğuna inam yarada bilib. Diqqət etdikdə onu da görmək olur ki, İlham Əliyev qeyd etdiklərimizə rəğmən çox şanslı adamdır. Baxın, 30 il işğal altında olan ərazilərimizin azad edilməsi, Təbrizdə konsulluğumuzun yaradılması, Türk Birliyinə nail olunması və digər qürurverici hadisələrin baş verməsi, məhz İlham Əliyevin prezidentliyi dönəmində olmuşdur.

İlham Əliyevin xarici səfərləri də söz-söhbətlərə səbəb olur. Məsələn, Əliyevin Əlcəzairə son səfəri xainləri narahat etməkdədir. Xüsusilə də bu səfər İranı, Fransanı, Rusiyanı və Ermənistanı narahat etməyə bilməzdi. Çünki, burada Əlcəzairin və Azərbaycanın oxşar taleyə malik olmaları da əsas şərtlərdən biridir. Misal üçün deyə bilərik ki, Fransanın Əlcəzairdə apardığı siyasətlə Ermənistanın 30 ilə yaxın işğal altında saxladığı Qarabağda yürütdüyü siyasət arasında paralellər aparmaq olar. Rəsmi Parisin ermənipərəst siyasətinin kökündə həm də bu yanaşma dayanır. Ərazisinə görə Afrikanın və ərəb dünyasının ən böyük ölkəsinin 11 milyondan çox vətəndaşına vaxtilə muxtariyyət belə verməkdən imtina etmiş Fransa indi Qarabağda yaşayan 15-20 min erməniyə müstəqillik tələb edir. Eyni zamanda, Fransa ordusu öz azadlığını tələb edən əlcəzairlilərə qarşı kütləvi qətliamlar, çoxsaylı müharibə və insanlıq əleyhinə cinayətlər törədib. Eyni cinayətlər Qarabağda yaşayan və erməni işğalına qarşı çıxan azərbaycanlılara qarşı da həyata keçirilib. Məsələn, 1832-ci ildə Əlcəzairin Fransa tərəfindən işğal edilməsinə qarşı çıxan El-Uffia qəbiləsi gecə yatdığı yerdə qılıncdan keçirilib. Bu hadisənin bənzərini biz 1992-ci ildə Xocalıda müşahidə etdik. Bu gün Fransa tərəfindən dəstəklənən Ermənistan o vaxt Xocalının dinc əhalisinə qarşı, özü də gecə vaxtı soyqırımı törətdi. Bundan əlavə, həm Fransa, həm də Ermənistan müharibə zamanı Cenevrə konvensiyalarının tələblərini pozaraq qadağan olunmuş silahlardan istifadə ediblər. Bu cür işğalçı siyasət həyata keçirən ölkələr, əlbəttə ki, Türkiyəyə qardaş olan Azərbaycan Prezidentinin siyasətini heç vaxt qəbul edə bilməzlər. Amma buna baxmayaraq, artıq dünya düzəni dəyişir və dünyanın müxtəlif hissələrində Türk Birliyi iri addımlarla irəliləyir. Bunun da nəticəsi olaraq, Güney Azərbaycanda Təbriz, Ərdəbil və digər şəhərlərdə küçələrə Azərbaycan Prezidenti İlham Əliyevin fotosu olan posterlərin vurulması İran hakimiyyətini ciddi narahat edib. Fotonun üzərində isə “Güney Azərbaycan Sizin arxanızdadır, cənab Prezident” yazısı qeyd olunub. Belə bir vəziyyətin yaranması güclü və bütöv Azərbaycandan xəbər verir.

GundemXeber.Az