Rusiya artıq NATO ölkəsinə də raket zərbələri endirməyə başlayıb. Belə ki, Rusiyanın ötən gün Ukraynaya atdığı çoxsaylı raketlərdən ikisi Polşa ərazisinə düşüb. Mərmilər Ukrayna ilə sərhəddə yerləşən Pşevodov kəndindəki fermaya tuş gəlib. Nəticədə iki dinc sakinin öldüyü bildirilir. Bəzi məlumatlarda isə həmin raketlə Avropa Birliyindən Ukraynaya elektrik enerjisi verən magistral xəttin vurulduğu bildirilir. Bu isə onu göstərir ki, Kreml Ukraynanın enerji infrastrukturunu məhv etməyi düşünür. Yəni Rusiyanın bu hərəkəti heç də onun NATO-nu da müharibəyə cəlb etmək niyyətindən qaynaqlanmır. Moskvada da yaxşı anlayırlar ki, NATO-nun birbaşa müharibəyə cəlb olunması Rusiyanın məğlubiyyətini daha da sürətləndirəcəklər. Bu səbəbdən də atılan raketdə məqsədin məhz magistral xətti dağıtmaq olduğu barədə səslənən versiya daha məntiqlidir.  

Yaranmış vəziyyətlə bağlı olaraq Polşa hökuməti Milli Təhlükəsizlik Şurasının təcili iclasını çağırıb. Polşa Xarici İşlər Nazirliyinin yaydığı açıqlamada bildirilir ki, faktla bağlı Rusiyanın Varşavadakı səfiri Sergey Andreyev izahat üçün nazirliyə çağırılıb. Polşa Prezidenti Anjey Duda hadisə ilə bağlı açıqlama verib. Prezident bildirib ki, NATO döyüşə hazır vəziyyətdədir: "Bu gün söhbət etdiyim bütün liderlər 5-ci maddə daxil olmaqla nizamnamənin bütün müddəalarına hörmətlə yanaşaraq məni müttəfiq dəstəyində əmin ediblər. Bu məsələni birlikdə müzakirə edəcəyik”.

O qeyd edib ki, Polşa silahlı qüvvələrinin, o cümlədən hava hücumundan müdafiə sisteminin hazırlığı artırılıb: "Təyyarələrimiz müttəfiqlərin təyyarələrini dəstəkləyəcək. Biz sakit və hesablı şəkildə davranırıq”.

Eyni zamanda, Polşa lideri raketin kimin buraxdığına dair qəti sübutun olmadığını açıqlayıb: "Faktla bağlı araşdırmalar aparılır. Çox güman ki, bu, Rusiya istehsalı olan raket idi”.

Polşalı ekspertlər yaranmış vəziyyətdə NATO nizamnaməsinin 5-ci bəndinin icrasının gündəmə gələ biləcəyini istisna etməyiblər. 

GundemXeber.Az qeyd edir ki, bu bənd üzv dövlətlərin ərazisinin bütün alyans dövlətləri tərəfindən birgə müdafiəsini nəzərdə tutur. Moskvanın bu addımı fonunda NATO-nun adekvat addım atacağı elə də ağlabatan deyil. Amma bu hadisə ABŞ başda olmaqla NATO-nun Ukraynaya daha müasir ən güclü silahları verməsini sürətləndirəcək. Bu istiqamətdə həmin ana qədər gözləmə mövqeyi tutan qurumdakı bəzi üzvlərin tərəddüdünə son qoyacaq.  

Rusiya tərəfi isə səhvi boynuna alıb, ən azından üzr istəmək əvəzinə, baş verən təxribatı yenə də Kiyevin üzərinə atıb. 

Bu gün Polşanın tələbi ilə NATO səfirləri Alyansın nizamnaməsinin 4-cü maddəsi əsasında iclas keçirməlidir. Bu maddə NATO üzvü olan ölkələrdən biri onun ərazi bütövlüyü, siyasi müstəqilliyi və ya təhlükəsizliyinin təhdid altında olduğunu hesab edərsə, tərəflərin məsləhətləşmələr aparmasını nəzərdə tutur.

Ukrayna Prezidenti Volodimir Zelenski isə Rusiyanı NATO üzvü olan Polşaya raket zərbəsi endirməkdə ittiham edib. "Bu, Rusiyanın kollektiv təhlükəsizliyə raket hücumudur. Bu, çox əhəmiyyətli eskalasiyadır. Hərəkət etmək lazımdır”, deyə Zelenski bildirib. Görəsən, Rusiyanın NATO ölkəsinə raket atmasına qurum hansı formada cavab verəcək. 

Prosesin gedişi birmənalı şəkildə olayın araşdırılamsından asılı olacaq. Rusiyanın bilərəkdən buna getdiyi öz təsdiqini taparsa, bu halda sözsüz ki, NATO Rusiyaya son xəbərdarlığını edəcək. Amma ilk belə insident fonunda NATO-nun da Rusiyaya adekvat cavab verəcəyi versiyası o qədər də ağlabatan deyil. Düzdür, yaranmış situasiyada Polşa, Baltikyanı ölkələr çalışacaq ki, NATO 5-ci maddəni işə salsın. Bu isə artıq prosesə NATO-nun birbaşa qoşulması demək olacaq. Amma digər NATO ölkələrinin hələlik 5-ci maddənin işə salınmasında maraqlı olmadığı bllidir. Onlar prosesin sonrakı gedişini gözləməyi məsləhət görürlər. Ona görə də əsas gözlənilən variant odur ki, NATO indilikdə Rusiyaya sadəcə nota verməklə kifayətlənəcək.   

Digər tərəfdən, bu olay NATO-nun Ukraynaya rus raketlərini dəf etməyə qadir daha güclü silahlar verməsini sürətləndirəcək. Digər tərəfdən, Polşa və Baltik ölkələrinin ərazisində qurumun müdafiə qüdrətini daha da gücləndirmək istiqamətində addım atmağa sövq edəcək. 

Səlim Əhmədov