Müsavat aksiyaya ciddi hazırlaşır; partiyadan Sərdar Cəlaloğlunun antimitinq açıqlamasına reaksiya gəldi
Xəbər verdiyimiz kimi, dekabrın 15-də demokratik qüvvələrin Milli Şurası qiymət artımına etiraz olaraq mitinq keçirmək haqda qərar verib. Artıq Milli Şuranın mitinqi ilə bağlı yer ayrılması üçün Bakı Şəhər İcra Hakimiyyətinə müraciət göndərilib. Milli Şuranın üzvü Tural Abbaslı bildirib ki, məktubda Milli Şuranın dekabrın 15-i saat 16:00-dan 18:00-a qədər aksiya üçün ayrılmış müvafiq ərazilərdən birində mitinq keçirilməsi üçün şərait yaradılması tələb olunur.

Aksiyanın əsas şüarı “Bahalaşmaya son!”, “Qiymətlər endirilsin”, “Dövlət əhaliyə xidmət etmək üçündür” və s. olacaq. Qeyd edək ki, aksiya üçün tələb olunan ərazilər Yasamal Rayonunda yerləşən “Məhsul” stadionu, Nəsimi Rayonu 1-ci mkr-da Asim Məhərrəmov küçəsində yerləşən parkdakı meydança, “Ulduz” metro stansiyası qarşısındakı Araz küçəsindəki park, Binəqədi Rayon Dərnəgül stansiyasının dəmiryol tərəfindəki çıxışında və Nərimanov Rayonunda yerləşən Nərimanov parkıdır.



Artıq müxalifət partiyaları mitinq hazırlıqlarına başlayıb. Müsavat Partiyası başqanın müavini Gülağa Aslanlı “Yeni Müsavat”a açıqlamasında bildirdi ki, aksiyaya yüksək səviyyədə hazırlıq davam edir. Müsavat funksionerinin bildirdiyinə görə, yerli təşkilatlar 15 dekabr aksiyasına hazırlıqlara başlayıblar: “Mitinqə hazırlıq həmişə olduğu kimi, davam edir. Müsavat Partiyasının bütün strukturları mitinqə hazırlıqları davam etdirirlər. Hazırda bir neçə texniki məsələlər var, həmin məsələlər də yəqin ki, sədrlər şurasının növbəti toplantısında müzakirə olunacaq. Əgər çatışmazlıqlar olarsa, onlar da yoluna qoyulacaq. Müsavat Partiyasının mitinqə hazırlaşması üçün bəzən iki-üç gün belə kifayət edir. Hazırda da təşkilatımız həmin səviyyədədir”.

Qeyd edək ki, bəzi fikirlərə görə, hazırda Milli Şura daxilində partiyalar arasında fikir ayrılıqlarının mövcud olması aksiyanın təşkilinə və kütləviliyinə təsir edə bilər. Gülağa Aslanlı bunu qətiyyətlə inkar edir. Onun dediyinə görə, təmsil etdiyi təşkilat daxilində bu mövzuda hər hansı bir narazılıq və ya fikir ayrılığı mövcud deyil: “Müsavat Partiyası tərəfindən aparılan mitinq hazırlıqlarının hazırda davam edən debatlara, müzakirələrə heç bir aidiyyəti yoxdur. Düşünürəm ki, Milli Şura daxilində davam edən polemikaların aksiyanın təşkilinə heç bir mənfi təsiri olmayacaq. Təşkilat daxilində hazırlıqlarla bağlı ruh yüksəkliyi yerindədir”.



Bu arada ADP sədri Sərdar Cəlaloğlu mətbuata müsahibəsində bildirib ki, müxalifətin sosial tələblərlə aksiya keçirməsi doğru deyil. Sosial tələblərlə aksiyanı QHT-lər keçirməlidir. Müxalifətin aksiyaları siyasi tələblərlə olmalıdır. Gülağa Aslanlı S.Cəlaloğlunun fikirlərində həqiqətin olduğunu etiraf etsə də, hazırda QHT-lərin bu aksiyanı keçirmək üçün ciddi imkanlarının olmadığını düşünür: “Sərdar bəyin dediklərində haradasa bir həqiqət var. Ancaq nəzərə almaq lazımdır ki, Azərbaycan cəmiyyətində müstəqil QHT-lər çox azdır. İkinci tərəfdən, aksiya təşkil etmək üçün onların imkanları və təcrübələri azdır. Əlbəttə, sosial şüarlarla aksiyaların xalqın özü və ictimai təşkilatlar tərəfindən başladılması daha məqsədəuyğun olardı. Amma Azərbaycan reallığında bu məsələ hələ ki yetkinləşməyib. Aksiya ilə bağlı müraciətdə mitinqdə 10 min nəfərin iştirak edəcəyi yazılıb. Ancaq şəxsən mənim gözləntilərim daha çox sayda insanın iştirak etməsidir. Çünki əhali ilə söhbətlər zamanı aksiyaya daha böyük marağın olduğunun şahidi oluruq. Vaxtı ilə aksiyalara laqeyd qalan insanların bir çoxu indi aksiya ilə maraqlanır, etirazlara qoşulacaqlarını bildirirlər. Hər şey mitinqə hazırlığın necə aparılmasından, şüarların, çağırış vərəqələrinin yayılmasından, sosial şəbəkələrdə təbliğatdan da asılı olacaq. Hələ ki başlanğıcdayıq, hazırlıqlar davam edir, yəqin ki, bir-iki günə hazırlıq ən yüksək səviyyəyə çatdırılacaq. Gələn həftənin sonunda biz aksiyanın təbliğatını yüksək səviyyəyə çatdıracağıq”.