Natiq Cəfərli: «İnsanlar öz etirazını hökumətə nümayiş etdirməlidir»

Nemət Əliyev: «Xalq öz varlığını sübut etməsə, qiymət artımı digər sahələrdə də müşahidə olunacaq»

Milli Şuranın 15 dekabr mitinqinə 4 gün vaxt qalır. Qurum BŞIH-ə ayın 6-da müraciət ünvanlasa da, hələ ki, müraciətə rəsmi cavab verilməyib. Buna baxmayaraq Milli Şura mitinq hazırlıqlarını davam etdirir və cəmiyyətin bu mitinqdə kütləvi iştirakını təmin etmək üçün müxtəlif formalarda təbliğat aparır. Xəbər verdiyimiz kimi bu mitinq əsassız bahalaşmaya etiraz mitinqidir və əsasən sosial şüarlarla zəngin olacaq.
Belə fikirlər səslənir ki, bu mitinq daha çox iqtisadi məsələri əhatə etdiyi üçün, mitinqdə tanınmış iqtisadçılar çıxış edəcək və əhaliyə bahalaşmanın yaradacağı fəsadlar haqqında məlumat verəcəklər.
Iqtisadçılar xeyli vaxtdır həyəcan təbili çalmağa başlayıblar. Iqtisadçı Məhəmməd Talıblı öz “facebook” statusunda yazır: “Bu artım təkcə cəmiyyətin nəbz yoxlaması deyil, həm də rəsmi münasibətdir. Ölkədə sosial baxımdan daha həssas qruplar olduğu halda, yüksək əməkhaqqı alan deputatların əməkhaqqlarının artımı ”yaxşı edirəm" demək kimi bir şeydir. Xalqı heçə sayanlara və vulqar münasibətə xalq öz sözünü deməlidir".
Əslində bahalaşmaya start verilən gündən iqtisadçılar faktlarla sübuta yetiriblər ki, qiymət artımının heç bir iqtisadi əsası yoxdur.



“REAL”ın icra katibi, iqtisadçı Natiq Cəfərli hesab edir ki, xalq bahalaşmanın əsassız olduğunu bilməlidir və iqtisadçılar da mitinqdə öz fikirlərini bölüşməlidilər: “15 dekabr mitinqində vacib olan insanların vətəndaş mövqeyini ortaya qoymasıdır. Çünki iqtisadçılar söz deyə biləcəkləri hər yerdə bu bahalaşmanın fəsadları haqqında məlumat veriblər. Mitinqdə əsas məqsəd insanların etirazını hökumətə nümayiş etdirməkdir. Hesab edirəm ki, mitinqdə iqtisadçıların çıxışları da önəmli ola bilər. Iqtisadçılar əhalinin başa düşəcəyi dildə sonrakı mərhələnin daha ağır olacağını və yanacağın qiymətinin artmasının digər sahələrə təsir edəcəyini əsaslı şəkildə xalqa çatdırmalıdır. Vətəndaşlar bu proseslərə qarşı etirazın miqyasını göstərməlidir və mən də bir vətəndaş kimi həmin mitinqdə iştirak edəcəm”.



Iqtisadçı ekspert Nemət Əliyev bildirdi ki, 15 dekabr mitinqində əhalinin bütün təbəqələri, o cümlədən iqtisadçılar fəal iştirak etməlidir: “Bahalaşma əhalinin sosial vəziyyətinə böyük ziyan vurur və bu bahalaşma kütləvi istehlak mallarının qiymətinin artımına səbəb olacaq. Hakimiyyət bütün əndazələri aşaraq xalqla istədiyi formada rəftar edir. Ölkə vətəndaşlarına heç bir məlumat verilmir, insanların rəyi nəzərə alınmır. Çünki hökumət xalqı saymır və onun fikrinə ehtiyac duymur. Hesab edirəm ki, xalq kütləvi şəkildə bu mitinqdə iştirak etməklə həm hakimiyyətə yerini göstərməlidir, həm də öz varlığını sübut etməlidir. Əks halda ölkə vətəndaşlarının vəziyyəti daha da ağırlaşacaq. Ən yüksək vəzifədə oturmaq heç kəsə xalqla istədiyi kimi davranmaq haqqı vermir. Hesab edirəm ki, millətin maraqlarının müdafiəsi xəttində duran hər kəs bu aksiyaya qoşulmalıdır”.