“Müsavat Partiyası mütləq gedəcəkdi. Milli Şura yaranarkən bu partiyanın sərgilədiyi ikili münasibət, vahid namizəd məsələsini yubadaraq qurumu seytnota salmaları, Rüstəm İbrahimbəyovun fəxri sədrliyi ilə bağlı məntiqə və siyasi etikaya sığmayan mövqeləri onların qurumun fəaliyyətində maraqlı olmadıqlarını göstərirdi”.

Bunu APA-ya açıqlamasında El Hərəkatı Ali Məclisinin sədri Eldəniz Quliyev deyib.

E. Quliyev bildirib ki, Milli Şura məsələsində Müsavat Partiyasının mövqeyi ilə hakimiyyətin mövqeyi üst-üstə düşdüyü üçün partiya qurumdan çıxmağı ləngidib: “İndi isə onlara lazımi yerdən mesaj gəlib. Belə getsə, ya Müsavat Partiyası haqqında keçmiş zamanda danışacağıq, ya da bu partiya hakimiyyətyönlü olacaq. Yəni Müsavat Partiyası parlamentdə də təmsil olunacaq, qərargahları da olacaq. Ancaq bu partiyanın 1918-ci ildə yaranmış Müsavat Partiyası ilə bağlılığı olmayacaq”.

“El” Hərəkatının Milli Şuranı tərk etməyi planlaşdırmadığını deyən E. Quliyev sözlərinə görə, kənardan görünən mənzərə budur ki, müxalif düşərgədə vəziyyət çox pisdir, bu vəziyyətdən çıxmaq üçün yeganə nərdivan isə ancaq Milli Şuradır: “Nə “El” Hərəkatının, nə AXCP-nin, nə də digər qüvvələrin Milli Şuranın parçalamasına yol vermək olar. Bu zərbəni dəf edib, daha sıx, sağlam cərgə ilə qabağa getməliyik. Milli Şuranın öhdəsinə götürdüyü missiya yerinə yetirilməyib. Cəmiyyət deyir ki, ya bir yerdə olmalısınız, ya da sizinlə vidalaşacağıq”.

O, Müsavat Partiyasının atdığı son addımdan sonra “El” Hərəkatının Müsavat Partiyasının təklif etdiyi əməkdaşlıq sazişinə cavabının da artıq bəlli olduğunu dilə gətirib: ““El” Hərəkatının Müsavat Partiyası ilə əməkdaşlığa cavabı “yox” olacaq”.

* * * 14:38

Müsavat Partiyası Milli Şuradan çıxması barədə bəyanat yayıb.

Virtualaz.org-un məlumatına görə, bəyanatda bildirilir ki, Müsavat Partiyası Milli Şuranın strukturları formalaşarkən heç bir iddia irəli sürməyərək, hətta siyasi qüvvələrin bu qurumda öz güclərinə adekvat olmayaraq təmsilçiliyinə razılıq verib, Milli Şuranın seçkilərdə vahid namizədlə iştirakı təmin edildikdən sonra, Müsavat Partiyası Məclisi tərəfindən prezidentliyə namizədliyi ilin əvvəlində irəli sürülmüş İsa Qəmbərin namizədliyindən imtina edib, Milli Şuradan asılı olmayan səbəblərdən Rüstəm İbrahimbəyovun seçkilərdə iştirak edə bilməyəcəyi aydın olduqdan sonra Milli Şurada təmsil olunan bir sıra siyasi qüvvələrin ciddi müqavimətinə və pozucu fəaliyyətinə baxmayaraq, tarix elmləri doktoru, professor Cəmil Həsənlinin prezidentliyə namizəd kimi irəli sürülməsi və dəstəklənməsi nəticəsində müxalifət qüvvələri seçkilərdə iştirak etmək imkanının təmin olunması Müsavat Partiyasının birmənalı və təkidli mövqeyi nəticəsində mümkün olub.

“Ziyalıların seçki prosesində iştirak faizi, kütləvi aksiyalarda iştirak edənlərin sayı və digər amillər göstərdi ki, sadəcə demokratik qüvvələrin bir araya gəlməsi və vahid namizədin müəyyənləşməsi cəmiyyətdə köklü siyasi dəyişikliklərə nail olmaq üçün yetərli deyil, bunun üçün yeni üsullar və metodlar, fərqli mübarizə taktikasının seçilməsi zəruridir.

Müsavat Partiyası bunu nəzərə alaraq, Azərbaycanda fəaliyyət göstərən real siyasi qüvvələrlə müttəfiqlik və əməkdaşlıq müqavilələri bağlamaq, onlarla birgə yeni siyasi şəraitə uyğun olaraq həm Milli Şura daxilində, həm Milli Şuradan kənarda funksional əməkdaşlığın səmərəli yollarını birgə müzakirə etmək təklifini irəli sürdü.

Müsavat Partiyasının bu xoşməramlı təklifinə bəzi siyasi qüvvələrin adekvat olmayan reaksiyası, müttəfiqlik münasibətlərinin qurulmasından imtina edilməsi, əksinə müttəfiqlik təklif etdiyimiz bəzi qüvvələr tərəfindən Müsavat Partiyasına qarşı böhtan və təhqir kampaniyasına start verilməsi partiya strukturlarında böyük təəssüf və narahatlıqla qarşılanıb.

Müsavat Partiyasının Divanı yuxarıda qeyd olunanları nəzərə alaraq, prezident seçkiləri ilində və prezident seçkiləri ilə əlaqədar yaradılan Milli Şuranın bundan sonrakı fəaliyyətində Müsavat Partiyası üzvlərinin iştirakını məqsədəuyğun saymır. Müsavat Partiyası Milli Şurada fəaliyyət göstərən qüvvələrə uğurlar arzulayır və onlarla həm ikitərəfli, həm çoxtərəfli funksional əməkdaşlığa hazır olduğunu bəyan edir”, – deyə bəyanatda bildirilir.

* * * 13:49



Müxalif düşərgədə kompromat savaşı qızışdı

Müsavat başqanının müavini Mehman Cavadoğlu AXCP sədrinin müavini Fuad Qəhrəmanlının partiyanın Milli Şuradan çıxması ilə bağlı səsləndirdiyi ittihamlara cavab verib.

Virtualaz.org-un məlumatına görə, Mehman Cavadoğlu “Qafqazinfo”ya açıqlamasında bildirib ki, Fuad Qəhrəmanlının səsləndirdiyi ittihamlar əsassız ittihamlardır: “Müsavat Partiyası heç vaxt hakimiyyətlə əməkdaşlıqda iştirak etməyib. Bundan sonra da iştirak etməyəcək. İstərdim ki, insanlar fikirlərini ifadə edərkən diqqətli olsunlar”.

Xatırladaq ki, AXCP sədrinin müavinin Müsavat Partiyasının Milli Şuradan çıxması ilə bağlı qərarına sərt reaksiya verib. O mediaya açıqlamasında qeyd edib ki, belə görünür, Müsavat Partiyasına 2015-ci il parlament seçkiləri ilə bağlı hakimiyyət tərəfindən hansısa vədlər verilib və bu vədlərin qarşılığı olaraq, onlara Milli Şuradan ayrılmaq şərti qoyulub.

Müsavat Divanın üzvü İkram İsrafil də facebook səhifəsində AXCP sədrinin müavini Fuad Qəhrəmanlının ittihamlarına cavab verib.

“Fuad Qəhramanlıya xəbərdarlıq edirəm ki, onun yaşı çatmayan vaxtlar partiyasinda nələr olub keçdiklərini bir öyrənsin, sonra danışsın. Bəlkə, mandat alverini Azərbaycan bazarına ilk çıxaranın kimliyini bilmir, bilmirsə öyrənsin. Yox, bilib də özünü bilməmiş kimi göstərmək istəyirsə, onda adama deyərlər saxla, səndən siyasətçi yox, heç cəbhəçi də olmaz”.

* * * 13:07



“Belə görünür ki, Müsavat Partiyasına 2015-ci il parlament seçkiləri ilə bağlı hakimiyyət tərəfindən hansısa vədlər verilib və bu vədlərin qarşılığı olaraq, onlara Milli Şuradan ayrılmaq şərti qoyulub.

Müsavat Partiyası da bu şərti yerinə yetirməklə məşğuldur. Əgər belə deyilsə, buyurub açıqlasınlar ki, hansı əsasa görə, Milli Şuranı tərk etdilər? Necə oldu ki, indiyədək Rüstəm İbrahimbəyovun fəxri sədrliyini əsas gətirib, buna görə Milli Şuradan ayrılacaqlarını bəyan edirdilər, Rüstəm İbrahimbəyov fəxri sədrlikdən getdikdən sonra da eyni qərarı verirlər. Deməli, bütün bunlar bəhanə idi və məqsəd hakimiyyətlə separat danışıqlara gedib, hansısa xüsusi korporativ maraqları təmin etmək müqabilində müxalifətin ən böyük birliyini dağıtmaq olub”.

Virtualaz.org bildirir ki, bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini Fuad Qəhrəmanlı Müsavat Partiyasının Milli Şuradan ayrılmaqla bağlı qəbul etdiyi qərara münasibət bildirərkən deyib.



F. Qəhrəmanlı bildirib ki, Müsavat Partiyasının qərarı təəssüf doğurur. Onun sözlərinə görə, Müsavat Partiyasının Milli Şuradan ayrılmaq qərarı onu göstərir ki, partiyanın indiyə qədər söylədikləri məhz bəhanə olaraq ortaya atılmış iddialar olub: “Deməli, burda Müsavat Partiyasının rəhbərliyinə aid olan məqsədlər var. Bu, Müsavatın siyasi kursunun dəyişməsi anlamına gəlir. Çünki Milli Şura real müxalifətin birliyi kimi fəaliyyət göstərirdi. Milli Şuranın rəhbərliyi ilə bağlı ortada hər hansı fikir ayrılığı olmadan Müsavat Partiyasının bu qurumu tərk etməsi artıq Müsavat rəhbərliyində təmsil olunan şəxslərin praqmatik və korporativ maraqları ilə bağlı qərar hesab oluna bilər. Düşünürəm ki, bu qərar cəmiyyətdə deyil, eyni zamanda Müsavat Partiyasının daxilində də ciddi narazılıqlara səbəb olacaq”.

F. Qəhrəmanlı qeyd edib ki, Müsavat Partiyasının Milli Şuranı tərk etməsi ilə qurum zəifləməyəcək, əksinə güclənəcək: “Son aylar Müsavat Milli Şurada olduğu halda, quruma qarşı əks təbliğat aparmaqla məşğul idi. Əks təbliğat aparan qüvvə Milli Şuradan kənarlaşdıqdan sonra isə bu, Milli Şuranın daxili problemlər olmadan, ciddi şəkildə fəaliyyət göstərməsinə zəmin yaradacaq”.