Azərbaycan Respublikasının Dövlət Neft Şirkəti (SOCAR) Almaniyaya təbii qaz tədarükü ilə bağlı 10 il müddətinə müqavilə imzalayıb. GundemXeber.Az bildirir ki, bu barədə məlumatı “AzərTac” yayıb.

Məlumata görə müqavilə Almaniya dövlətinə məxsus enerji şirkəti “Securing Energy for Europe” (SEFE) ilə bağlanıb. Razılaşmaya əsasən, SOCAR hər il SEFE-yə qaz tədarük edəcək. Həcmlər mərhələli şəkildə artırılaraq illik təxminən 1,5 milyard kubmetrə çatdırılacaq.

“AzərTac” yazır ki, bu əməkdaşlıq hasilat və infrastruktur sahəsində, o cümlədən qaz kompressorlarının qurulması istiqamətində investisiyaları dəstəkləyəcək, Avropaya boru kəmərləri ilə qaz nəqlini artıracaq və “qitənin enerji təhlükəsizliyinə töhfə verəcək”.

SEFE-nin yaydığı açıqlamasında qeyd olunur ki, müqavilə üzrə qaz tədarükünə bu ildən (2025) başlanacaq. Şirkətin baş icraçı direktoru Eqbert Laqe bu müqaviləni “Almaniya ilə Azərbaycan arasında mövcud olan güclü tərəfdaşlığın göstəricisi” adlandırıb.

“Bu tərəfdaşlıqla Avropaya əhəmiyyətli qaz həcmlərinin çatdırılması üçün yeni marşrut yaradırıq. Bu isə bizim portfelin şaxələndirilməsinə və müştərilərimizin enerji təminatının etibarlılığına xidmət edir”, – SEFE-nin açıqlamasında bildirilir.

SOCAR prezidenti Rövşən Nəcəf də bu razılaşmanı yüksək qiymətləndirərək bildirib ki, müqavilə “Avropanın enerji şaxələndirilməsi və davamlı inkişaf məqsədlərinə töhfə verəcək”.

GundemXeber.Az