Əli Kərimli köhnə taktikanı yenidən işə salıb - Müsavata qarşı olanları Milli Şuraya toplamaq...
Bu həftə Milli Şuranın sıralarından daha kimlərin gedib-getməyəcəyinə aydınlıq gələcəyi gözlənilir. El Hərəkatının İdarə Heyəti ötən həftə Milli Şurada fəaliyyəti davam etdirib-etdirməməklə bağlı yekdil rəyə gələ bilməyib. Ona görə də müzakirənin davam etdirilməsini və yekun qərar verilməsini bu həftəyə saxlayıblar.

El-in İdarə Heyətinin üzvlərinin bir-iki nəfər istisna olmaqla Milli Şuradan çıxmağın tərəfdarı kimi çıxış etdiyi deyilir. Milli Şurada qalmaqda isə əsas israr edən El-in Ali Məclisinin sədri Eldəniz Quliyevdir. Ona görə də El-də əsas söz sahibinin Eldəniz Quliyev, yoxsa sədr Eldar Namazov olduğuna da, belə demək mümkündürsə, aydınlıq gələcək.
Milli Şuradan ayrılacağı ehtimal olunan tanınmış təşkilatlardan biri isə KXCP-dir. Bu partiyanın Milli Şura ilə bağlı yanvarın 13-də (bu gün-red.) qərar verəcəyi bəyan edilib.
Milli Şurada fərd olaraq təmsil olunanlardan da bəzilərinin qurumla xudahafizləşəcəyi istisna deyil.

Beləliklə, Müsavat Partiyasının gedişindən sonra Milli Şuranın mövcudluğunun sona çatması ehtimalı yaranıb. Bundan əsas narahatlıq keçirən isə AXCP-dir. Müsavatdan sonra Milli Şurada dominantlığı tamamilə ələ keçirən AXCP-nin rəhbərliyi indiki mərhələdə Milli Şuranın sıradan çıxmasını istəmir. AXCP rəhbərliyi nəyin bahasına olur-olsun qurumu bir müddət saxlamağa çalışır. Müsavatın gedişi fonunda Milli Şuranın sıradan çıxmasını onlar özləri üçün siyasi faciə sayırlar. Ona görə də AXCP sədri Müsavata, İsa Qəmbərə qarşı olan qüvvələri yenidən Milli Şuraya toplamağa çalışır.

Məsələn, “Reytinq” qəzeti isə məlumat yayıb ki, Əli Kərimli bir müddət öncə Milli Şuranı tərk edən Liberal Partiyasını və onun lideri Lalə Şövkəti geri qayıtmağa razı salmaq istiqamətində iş aparır. Əli Kərimlinin bununla bağlı Lalə Şövkətlə danışıqlara başladığı deyilir. Qeyd olunur ki, Müsavata qarşı sərt münasibəti ilə seçilən Lalə Şövkət hələlik razılıq verməsə də Əli Kərimli onu razı salmağa səy göstərir. Məlumatda o da bildirilir ki, Lalə Şövkət təkliflə razılaşmasa, Əli Kərimli Cəmil Həsənlini danışıqlar prosesinə cəlb edəcək. Lalə Şövkətin də məhz bunu istədiyi istisna deyil. Böyük ehtimalla, ALP lideri “Cəmil Həsənlinin xahişini nəzərə alıb Milli Şuraya qayıtmağa razıyam” deyəcək.
Xatırladaq ki, vaxtilə Müsavat Partiyası “Azadlıq” blokundan çıxanda da Əli Kərimli eyni taktika ilə - bloka Müsavata qarşı olanları (Əli Əliyevin sədrlik etdiyi VİP-i) cəlb etməklə birliyin dağılmadığı barədə süni rəy yaratmağa cəhd etmişdi. Ancaq qısa zamanda göründü ki, bu yolla uğurlu nəticə mümkün deyil.