Xəbər verdiyimiz kimi, yanvarın 17-də prezident İlham Əliyevə Milli Qəhrəman Çingiz Mustafayev Fondu və ANS Şirkətlər Qrupunun “2013-cü ilin adamı” mükafatının təqdim olunması mərasimi keçirilib.
Mərasimdə çıxış edən dövlət başçısı bir sıra məsələlərə toxunub.

Prezident ölkədə “ASAN xidmət”in fəaliyyətinin genişləndiriləcəyini vurğulayıb. O bildirib ki, bütün bölgələrdə “ASAN xidmət”in yeni ofisləri açılacaq: “Gələcəkdə isə hər bir şəhərdə “ASAN xidmət” olacaq. Bununla bərabər, xidmətin funksiyaları da genişlənəcək. İndi biz fikirləşirik ki, daha hansı xidməti oraya əlavə edək”.

2013-cü ilin sonunda Bakıda “Şahdəniz-2” layihəsinin imzalandığını xatırladan Azərbaycan prezidenti deyib ki, bu məsələ çox gərgin bir şəraitdə reallaşıb: “Uzun illərdən, uzun müzakirələrdən sonra görəndə ki, artıq “Cənub qaz dəhlizi” layihəsi axsayır, Azərbaycan siyasi və iqtisadi məsuliyyəti cəsarətlə öz üzərinə götürdü. “Şahdəniz-2” layihəsi gərgin şəraitdə imzalandı. İctimaiyyət əlbəttə ki, bir çox məsələlər haqqında məlumatlı deyil. Çünki bildiyiniz kimi, bu məsələ kifayət qədər bağlı qapılar arxasında həll edilirdi. Ancaq yalnız bir şeyi deyə bilərəm ki, son həftəyə qədər “Şahdəniz-2” layihəsinin imzalanması hələ də sual altında idi. Baxmayaraq ki, bir neçə ay ondan əvvəl 17 dekabr tarixi də müəyyən edilmişdi. Baxmayaraq ki, qonaqlar da dəvət edilmişdi və bütün tədbirlər də hazırlanmışdı. Ancaq müəyyən müdaxilələr hesabına son həftəyə qədər layihənin imzalanması dəqiq bəlli deyildi. Ancaq bir şeyi qeyd etməliyəm ki, Azərbaycan və onun tərəfdaşları bütün səyləri birləşdirərək bu tarixi layihənin imzalanmasına nail oldular”.

İlham Əliyev 2013-cü ildə həyata keçirilən kadr və struktur dəyişikliklərindən də söz açıb: “Cəmiyyəti ən çox narahat edən sahələrdə kadr dəyişiklikləri edilib. Siz də bunu yaxşı bilirsiniz və işıqlandırmısınız. Təhsil, ordu quruculuğu sahələrində, sosial sahədə çox ciddi islahatlar başlayıb. Bu islahatlar artıq öz bəhrəsini verməkdədir. Dediyim sahələrdə və bütün başqa sahələrdə ictimai nəzarətin gücləndirilməsi əlbəttə, bizə kömək edəcək ki, xoşagəlməz halların qarşısının alınması istiqamətində daha da ciddi addımlar atılsın. Hər halda kadr və struktur dəyişikliyi, işə yanaşmada dəyişiklik artıq reallıqdır. Bunu cəmiyyət də bilir. Mən də əlbəttə ki, bunu qiymətləndirirəm və bu işlərə nəzarət edirəm. Elə etməliyik ki, Azərbaycanda bütün istiqamətlər üzrə ən qabaqcıl metodlar, ən mütərəqqi texnologiyalar tətbiq edilsin”.

Dövlət başçısı 2013-cü ildə BMT Təhlükəsizlik Şurasında fəaliyyətini başa vuran Azərbaycanın bu şuraya üzv olduğu iki ildə göstərdiyi fəaliyyətdən də danışıb: “2013-cü ildə biz BMT Təhlükəsizlik Şurasında fəaliyyətimizi uğurla, ləyaqətlə başa vurduq. İki il bundan əvvəl demişdim ki, biz BMT Təhlükəsizlik Şurasında ədaləti və beynəlxalq hüququ müdafiə edəcəyik. Belə də oldu. Biz hər bir mövzu ilə bağlı prinsipial mövqe ortaya qoymuşuq. BMT Təhlükəsizlik Şurası elə bir qurumdur ki, orada mövqe bildirməmək mümkün deyil. Ona görə, bəzi ölkələr heç can atmır ki, ora üzv olsun. Çünki belə olan halda gərək öz mövqeyini ortaya qoysun. Cəmiyyətdə də, siyasətdə də, xarici siyasətdə də elə insanlar, elə ölkələr var ki, mövqe bildirmək istəmirlər, hamı üçün yaxşı olmaq istəyirlər. Təhlükəsizlik Şurası elə bir qurumdur ki, bu, mümkün deyil və əslində, biz heç vaxt belə yanaşmanı düzgün saymamışıq. Ondan əvvəlki dövrdə də, bu gün də, bundan sonra da hər bir mövzu ilə bağlı Azərbaycanın prinsipial mövqeyi var və bu mövqe bütün hallarda ədalətə, beynəlxalq hüquqa əsaslanır və əlbəttə ki, dövlətimizin maraqlarına söykənir”.

Eyni zamanda İlham Əliyev qeyd edib ki, Azərbaycanın Təhlükəsizlik Şurasına seçilməyi o qədər asan olmayıb: “Siz də yaxşı bilirsiniz ki, Azərbaycan 16 turdan sonra üzv seçilə bilib. Bunun da səbəbləri var. Bu səbəblər hələ tam açılmayıb. Bəlkə də vaxt çatmayıb. Ancaq deyə bilərəm, siz də bilirsiniz ki, ilk səsvermədə və axırıncı səsverməyə qədər Azərbaycan digər namizədləri böyük fərqlə qabaqlayırdı. Adətən fərq böyük olduqda digər namizədlər öz namizədliyini geri götürür. Ancaq bu dəfə belə olmadı. On altı tur lazım oldu ki, Azərbaycan üzv seçilsin. Deyə bilərəm ki, bizə qarşı ciddi müxalifət fəaliyyət göstərirdi. Ölkədaxili müxalifətdən fərqli olaraq, doğrudan da ciddi müxalifət idi. Ancaq buna baxmayaraq, biz prinsipial mövqe göstərdik, geri çəkilmədik. Hətta belə təklif edilmişdi ki, bəlkə Azərbaycan namizədliyini geri götürsün və artıq bir seytnot vəziyyət yaranmışdı. BMT praktikasında inanmıram başqa bir hadisə olsun ki, bu proses 16 tur və 3 gün davam etsin. Çünki yadımdadır, bizim xarici işlər naziri oraya ezam edilmişdi və mütəmadi qaydada məlumat verirdi. Beşinci gün bu proses dayandı, altıncı, bazar günlərində bəzi ölkələrlə iş aparıldı ki, Azərbaycanın namizədliyini dəstəkləməsinlər. Ondan sonra vəziyyət müəyyən qədər çətinləşdi. Ancaq BMT elə bir təşkilatdır ki, orada təzyiqlə nəyisə əldə etmək mümkün deyil. İki yüzdən çox üzv var və üzvlərin əksəriyyəti o qədər də zəngin ölkələr deyil. Ona görə, BMT-də ədalət, prinsipiallıq daha çox üstünlük təşkil edir, nəinki təzyiq və hansısa başqa metodlar.

Təhlükəsizlik Şurasına seçilməyimiz iki cəhətdən tarixi hadisədir. İlk növbədə, bu, bir tarixdir. Dünyanın bir nömrəli qurumu olan Təhlükəsiz Şurasına Azərbaycan iki dəfə sədrlik edib. İkinci tərəfi ondan ibarətdir ki, biz buna çətin mübarizə şəraitində nail olmuşuq. Biz bu çətin mübarizəyə öyrəşmişik. Burada da qeyd edildi ki, bəzi hallarda Azərbaycana qarşı aparılan qara piara baxmayaraq, bizim beynəlxalq nüfuzumuz da artır, ölkəmizin inkişafı da göz qabağındadır. Bizə qarşı olan hücumların arxasında bir neçə amil dayanır. Mən bu barədə demişəm, siz də bilirsiniz, dünyada prinsipial mövqe sərgiləyən ölkələrə qarşı adətən təzyiqlər olur ki, kimsə onları öz tərəfinə çəksin. Bu istiqamətdə mübarizə gedir. Xüsusilə Azərbaycana - artıq geosiyasi mərkəz kimi formalaşan ölkəyə diqqət həddindən artıq böyükdür.

Sirr deyil ki, bizim mövqeyimizdən ən azı bölgədə gedən proseslər asılıdır. Ancaq hazırda Azərbaycan, eyni zamanda, daha da böyük regionda söz sahibidir. Bizi kənara qoymaq mümkün deyil. Bizimlə hesablaşmamaq olar, ancaq nəticə olmayacaq. Azərbaycanın mövqeyini nəzərə almadan heç bir layihə burada işləməyəcək, icra edilməyəcək.

Ona görə təbiidir ki, bizə qarşı müxtəlif üsullarla təzyiq göstərilir. Biz buna öyrəşmişik, fikir vermirik. Əsas odur sən əmin olasan ki, düzgün yoldasan. Əsas odur ki, Azərbaycan cəmiyyəti aparılan siyasəti bəyənsin, dəstəkləsin. Mənə prezident və siyasətçi kimi ən çox güc verən, deyə bilərəm ki, Azərbaycan xalqının inamıdır, dəstəyidir, nəinki Azərbaycanın iqtisadi müstəqilliyi. Çünki bu inam məni daha da gücləndirir və göstərir ki, siyasi iradə olan yerdə və siyasətə sədaqət olan yerdə istənilən məsələ həllini tapa bilər.

Ötən il keçirilən prezident seçkilərində də göstərilən etimad bir daha onu göstərdi ki, bütün qarayaxma kampaniyalarına baxmayaraq, Azərbaycan xalqı öz seçiminə sadiqdir. Deyə bilərəm ki, Azərbaycan cəmiyyətinin yetkinliyi, savadı, intellektual səviyyəsinin yüksək olması, əlbəttə ki, ictimai proseslərin müsbət istiqamətdə inkişafına xidmət göstərir”.

Çıxışının sonunda prezident İlham Əliyev deyib ki, 2013-cü il Azərbaycanda müstəqil jurnalistikanın inkişafı üçün də uğurlu olub: “Azərbaycanda bütün azadlıqlar - söz, internet azadlığı mövcuddur. Senzura, heç bir müdaxilə yoxdur. Azərbaycanda azadlıqlarla bağlı hər şey lazımi səviyyədə təmin edilir”.