“Balacalıqdan çox dəcəl uşaq olmuşam. Hər zaman oğlanlarla dalaşırdım, futbol oynayırdım. Demək olar ki, oğlanlarla böyümüşəm. Döyüşə hər zaman marağım olub, amma idmana gəlməyimin səbəbi o vaxt səhhətimdə olan problemdir. Həkim qan dövranımın yaxşı hərəkət etməsi üçün daha çox ayaqları hərəkətdə olan bir idman növü məsləhət görüb və mən də taekvondoya yazıldım”.

gundemxeber.az-ın məlumatına görə, bu sözləri “qafqazinfo”ya müsahibəsində yeniyetmələr arasında dünya, gənclər arasında Avropa Çempionu, I Avropa Oyunlarının gümüş medalçısı, Azərbaycanı Olimpiya Oyunlarında təmsil edən birinci qadın taeкvondoçu Fəridə Əzizova deyib.

Fəridə gündəlik həyatı ilə bağlı maraqlı açıqlamalar verib: “Nə makiyaj çəkməyi xoşlayıram, nə də ki bacarıram. Bundan başqa, makiyaja qarşı allergiyam da var. Fotosessiyalara çəkiləndə makiyaj edirlər, sonra 3 gün qaşınıram. Həm də ki, təbii gözəllik daha yaxşıdır. Ətəyi bircə tədbirlərdə geyinirəm. Bilirəm, yaraşmır, xoşlamıram, amma bu öhdəlikdirsə, çalışıram ki, əməl edəm”.

İdmançımızın sözlərinə görə, bəzən insanlar onun adına fikir vermədən, oğlun olduğunu düşünürlər: “İnstaqramda çox şəkil paylaşıram və şəkillər də məşqlərimizdən olur. Adıma heç fikir vermirlər. Elə bilirlər, oğlanam və yaxud qız adı ilə girmişəm. Bəlkə də, bu, dünya görüşünün azlığından irəli gəlir. Axı hamı eyni cür geyinmək məcburiyyətində deyil. Qız saçını kəsdirir, oğlan deyirlər, oğlan saçını uzadır, qız deyirlər. Oğlan stili daha az vaxt tələb edir. Şalvar, kofta bitdi. Həm də bu tərz mənə yaraşır. Mənim bədən quruluşum çox kobuddur. Bizdə elə qızlar var ki, məsələn, Patimat, Günay Ağakişiyeva, idmançı olsalar da, bədən quruluşları incədir. Onlara yaraşır. Amma bizim ailədə genetik olaraq çiyinlər böyükdür, fiziki güclü görünürük. Yaraşmayan bir şeyi geyinib başqa sözlər eşitməkdənsə, yaraşanı geyinib oğlan adlandırılmaq daha xoşdur”.

Fəridə sevgi mesajları almağından da danışıb: “Həddindən çox insan yazır. Mən insanlarla ünsiyyətdə olmağı sevirəm, bu, mənim kənardan görünən səhvlərimi düzəltməyə köməklik edir. Ancaq əfsuslar olsun ki, yazanların çoxu şəxsi maraq güdür. Yəqin ki, fikirləşirlər, idmançıdır, qalib gələndə prezident mükafat, ev verir. Yazanlar sadəcə adi insanlar deyil, tanınmış, yüksək vəzifələrdə olanlardan da sevgi mesajları alıram. Bu səbəbdən məcbur qalıb sosial şəbəkələrdə də münasibətimi nişanlı olaraq qeyd etmişəm. Çünki bu kimi mesajlara yox deməkdən, başqa bir insanın olub-olmadığını izah etməkdən yorulmuşdum”.

Fəridə ona sevgi etirafı edənlərə də zarafatla cavab verib: “Çünki çox vaxt yazırlar ki, digər qızlara oxşamıram və bu, onlara maraqlı gəlib. Amma mən başa düşmürəm, oğlan kimi geyinirəm, davranıram, bir oğlanın oğlan kimi geyinən birindən necə xoşu gələ bilər axı? (gülür)”.

İdmançımız onu sevgi mesajları yazan, tanış olmaq istəyənlər arasında hətta qızların da olduğunu etiraf edib: “Yazırlar qızsız, ya oğlan? Deyirəm, adıma baxın, biləcəksiz. Küçədə gedəndə xoşu gəlib yaxınlaşan çox qız olub. Demişəm ki, mən qızam, çox məyus olublar. İdmançılarımız həmişə mənə deyirlər ki, yarışlarda sən yanımızda gedəndə qızlar bizə baxmır. Düzdür, çox idmançılar tanıyır, ancaq təzə gələnlər bilmirlər. Oğlan idmançılarımızın yanında gedəndə də o qızlar mənə baxır. Onlar da həmişə “bəsdir də Fəridə, bizim yanımızda getmə” deyirlər”.

Fəridə boş vaxtlarında nə işlə məşğul olduğundan da danışıb: “Şəkil çəkdirməyi və çəkməyi sevirəm. Boş vaxtlarımda rolik, velosiped sürürəm, bilyard oynayıram. Daha çox aktiv istirahət edirəm. Həm gələcək fəaliyyətim, həm də marağım böyük olduğu üçün psixoloji, dedektiv kitablar oxuyuram. Mənə görə, psixologiyanı bilmək hamı üçün vacibdir. Bir idmançı kimi mənə bunu demək çətin olsa da, idman bu gün var, sabah yoxdur. Təzə idmançılar gələ bilər, zədə ala bilərik. Bunun üçün də idmançı öz üzərində işləməlidir. Ən azından dünya görüşün, ağlın olmalıdır ki, sən yaşayasan”.

Taekvondoçumuz gələcək planlarından da söz açıb: “21 yaşlı bir gəncin edə biləcəyi çox şeyi etmişəm. Bakıda nə evim, nə də qohumlarım var idi. Tanımadığı insanlarla qalmaq da bir idmançı üçün çox çətindir. Biz vaxtı-vaxtında yatmalı, durmalı, bir sözlə, disiplinli olmalıyıq. Tələbələrlə qalanda da bunu etmək çətin olur. Avropa Çempionu olan zaman prezident mənə ev verdi. Dəfələrlə beynəlxalq yarışların qalibi olmuşam, İdman Akademiyasında oxuyuram. Akademiyanı bitirdikdən sonra hüquq oxumaq istəyirəm, bu, mənim çoxdanki arzumdur. Hüquqlarının tapdanmamasını istəyən hər bir kəs qanun-qaydaları bilməlidir. Daha sonra, polis olmaq istəyirəm”.

Fəridə gələcəkdə ailə qurmasından da danışıb: “İdmanla ailə həyatı çox çətindir. Bu cəhətdən tələsmirəm. Hələ 21 yaşım var və olimpiadadan sonra bu haqda nəsə fikirləşmək olar. Məsələn, Mariya Stadnikin həyat yoldaşı da idmançıdır və bir idmançını ən çox həmkarı yaxşı anlaya bilər”.