İsveç və İsveçrə milliləri münasibətlərini aydınlaşdıracaq; Kolumbiya isə İngiltərəni məğlub etmək iddiasındadır
Bu gün futbol üzrə XXI dünya çempionatında son 1/8 qarşılaşmaları olacaq. Saat 18:00-da İsveç və İsveçrə milliləri münasibətlərini aydınlaşdıracaq. Saat 22:00-da isə Kolumbiya və İngiltərə qarşılaşması başlayacaq.

Skandinaviya derbisi

İsveç və İsveçrə millilərinin beynəlxalq arenada qarşılaşmasının tarixi 1920-ci ildən başlayır. Həmin yoldaşlıq görüşündə İsveçrə rəqib meydanda minimal hesabla qalib gəlib.

Bu milli komandalar indiyədək 28 dəfə rəqib olublar. Bu oyunların 10-da İsveç, 11 qarşılaşmada isə rəqibləri üstün olublar. 7 görüşdə isə qalib müəyyənləşməyib. Sonuncu dəfə 2012-ci ildə keçirdikləri yoldaşlıq görüşündə sülhlə ayrılıblar (1:2).

İsveç və İsveçrə mundiallarda ilk dəfədir qarşılaşırlar. Bundan əvvəl isə bir neçə dəfə Avropa çempionatlarının seçmə mərhələlərində üz-üzə gəliblər.

İsveç məlumdur ki, 12-ci dəfədir mundiallarda iştirak edir. Ən yaxşı nəticələri isə 1958-ci ildə dünya ikincisi olmaqdır. Komandanın mundiala da “pley-off” mərhələsindən gəldiyini xatırlatmağın yeri var. Yan Anderssonun komandası İtaliya ilə iki görüşün nəticəsinə görə Rusiyaya vəsiqə qazandı. Yeri gəlmişkən, İtaliyanın dünya çempionatdan kənar qalmasına indi təəssüflənmirəm. Çünki bu komanda da Rusiyada Almaniya, Polşa, İspaniya və Argentina kimi yarıyolda qalacaqdır. Ziyanın yarısından qayıtdılar...

İsveç mundiala öz səviyyələrində yaxşı hazırlaşıblar. Mundialda F qrupunda mübarizə aparan İsveç millisi yalnız artırma dəqiqələrində buraxdığı qolla Almaniyaya məğlub olub. Cənubi Koreya (1:0) və Meksika (3:0) ilə qarşılaşmada isə qalib gələrək qrup lideri olub. DÇ başlayanda bu qrupda İsveçin birinci yer tutacağını demək ciddi qəbul edilməzdi...

İsveçrənin beynəlxalq futbol arenasında xüsusi uğuru olmayıb. Yalnız uzaq 1954-cü ildə komanda mundialın 1/4 mərhələsinə vəsiqə əldə edə bilib. İsveçrə bu mundialda Braziliyadan sonra qrupda 5 xalla 2-ci yeri tutub. Braziliya ilə ilk oyunda milli komanda əzmkar heç-heçəyə nail oldu. Serbiyaya qalib gələn (2:1) skandinaviyalılar son oyunda Kosta-Rika ilə xalları böldülər (2:2).

Hər iki komandanın yaxşı fiziki hazırlığı olduğunu oyunçuların meydanda qət etdiyi məsafə də göstərir. Statistikaya görə, İsveç millisinin oyunçuları üç görüşdə 317 kilometr məsafə qət ediblər. Hər görüşdə təxminən 107 km. İsveçrə futbolçuları isə meydanda 323 km məsafə qaçıb. Təxminən hər görüşdə 109 km...

Hər iki komandanın heyətində ulduz futbolçu yoxdur. Amma heyətdə Almaniya, Fransa və İtaliya klublarının oyunçuları var. Avro-2016-da İsveç qrupdan çıxa bilmədi. Bundan sonra komandanın ulduz futbolçusu Zlatan İbrahimoviç millidəki karyerasını bitirdi. Mundialda Zlatan komandası haqda tikanlı danışdı. “Mən tək bütün komandadan yaxşı oynayaram” kimi... Amma İsveç millisi qrupda ilk yeri tutdu və bu gün qələbəni də bayram edə bilərlər.

Bu gün hər iki komandanın şansı yarıbayarıdır. Ola bilsin, bizi parlaq oyun görməyək. Bukmeykerlər hətta matçın taleyinin penaltilərin həll edə biləcəyini proqnozlaşdırırlar...

Kolumbiya asan təslim olmayacaq

Kolumbiya və İngiltərə milliləri indiyədək 5 dəfə qarşılaşıblar. Bu matçların 3-də ingilislər qələbə qazanıb, 2 görüş heç-heçə bitib. Bu görüşlərdən yalnız biri 1998-ci il dünya çempionatında olub. Bir qrupa düşən komandaların qarşılaşmasında ingilislər 2:0 qalib gəliblər.

Kolumbiya heç şübhəsiz 2014-cü il mundialındakı komanda deyil. Kolumbiya ilk görüşdə Yaponiyaya 1:2 uduzmaqla azarkeşlərini həyəcanlandırdı. İkinci oyunda isə Cənubi Amerika təmsilçiləri gözəl oyun nümayiş etdirərək Polşanın qapısından üç cavabsız top keçirdilər. Seneqalla oyunda isə yalnız oyunun başa çatmasına 15 dəqiqə qalmış qələbə topunu vuraraq qrupda lider oldular. Komandanın ulduz futbolçusu Xames Rodriqesin, eləcə də Radomir Falkaonun bu mundialda əvvəlki oyunu hələ ki alınmır. Seneqalla oyunda zədələnən Xames bu gün meydana çıxmaya bilər. Komandanın baş məşqçisi Xose Pekerman bu gün onlar üçün “ölüm-qalım” oyunu olduğunu deyib. Pekerman Kolumbiya millisinin tərkibində İngiltərədən də güclü oyunçuların olduğunu deyib.

İngiltərə gəncləşmiş komanda olaraq diqqət çəkir. Komanda məhsuldar oynayır. İlk oyunda Tunisə 2:1 qalib gələn komanda Panamanın qapısından 7 top keçirdilər. Mundialın ən məhsuldar oyunçusu da hələ ki 5 topla Harri Keyndir. İngilislərdə gənclərlə yanaşı təcrübəli oyunçular da var ki, onlar Primyer Liqanın ən yaxşı klublarında oynayırlar. Rahim Sterlinq (“Mançestr Siti”), Markuş Reşfold (“Mançestr Yunayted”), Denni Uelbek(“Arsenal”) və təbii ki, Harri Keyn (“Tottenhem”)...

Bu oyunda ingilislərin qələbəsi haqda daha çox proqnoz var. Kolumbiya isə bu gün “ölüm-qalım” deyibsə, asan təslim olmayacaq.