“Neftçi”nin qapıçısı Aqil Məmmədovun “Report”a müsahibəsi

– Premyer Liqanın III turunda “Qarabağ”ı 2:1 hesabı ilə məğlub etdiniz. Qələbə qazana biləcəyinizi oyundan əvvəl gözləyirdiniz?

– İlk növbədə, futbolçuları təbrik edirəm, yaxşı mübarizə apardılar. Avropa Liqasının II təsnifat mərhələsində Türkiyə “Qalatasaray”ı ilə oyundan sonrakı yorğunluğa baxmayaraq, böyük komandaya qarşı belə oynamaq yaxşı haldır. Oyunçuları bir daha təbrik edirəm. Səfər matçına ən azı uduzmamaq üçün getmişdik. Nə yaxşı ki, qələbə qazana bildik.

– “Neftçi” nəyin hesabına “Qarabağ”ı məğlub edə bildi?

– Komandamız xarakterin hesabına qələbə qazandı.

– “Qalatasaray”la görüşdən sonra çempionata köklənmək nə dərəcədə çətin idi?

– Bizim üçün bir az çətin oldu. Sağ olsunlar, azarkeşlər dəstək oldular. Oyunçular olaraq, hamımız yığışdıq, söhbət etdik. “Qalatasaray”la oyunu yaddan çıxarmaq və “Qarabağ”a qarşı köklənmək lazım idi. Ən azı heç-heçə etmək istəyirdik, amma qələbə ilə döndük.

– Türkiyə təmsilçisinə 1:3 hesabı ilə uduzduğunuz görüşdə nə çatmadı?

– “Qalatasaray” böyük komandadır, Avropada təcrübələri daha çoxdur. Həm maddi, həm də oyunçuların keyfiyyətinə görə bizdən üstündürlər. Futbolçular əllərindən gələni etdilər, vuruşdular, döyüşdülər. Bacardığımız və əlimizdən gələn bu idi. “Qalatasaray”ı unudub, Premyer Liqa oyunlarına baxmaq lazımdır. “Qarabağ”ı məğlub edə bildik, qarşıdakı oyunlara hazırlaşacağıq.

– Sanki futbolçularda bir az həyəcan hiss olunurdu, siz də səhvlər etdiniz. Rəqibin adı sizi qorxutmurdu?

– Həyəcan deyəndə ki, “Qalatasaray”a qarşı oynayırsan. Bütün millət bizdən çox rəqibi dəstəkləyirdi. Hamının fikrində “Qalatasaray” var idi. Stadiona azarkeş buraxsaydılar, 90 fiazi Türkiyə klubunun fanatları gələrdi. “Neftçi”ni ürəkdən sevən insanlar 10 faiz təşkil edərdi. Mənə elə gəlir ki, insanlar bir oyuna görə tez qərar verirlər.

– Onların azarkeşinin daha çox olması da sizə təsir etdi?

– Əlbəttə. Qardaş ölkənin komandasıdır, Azərbaycana gəlib. Amma Azərbaycana gəlibsə də, “Neftçi”yə dəstək olmaq lazım idi. “Neftçi” bu ölkənin klubudur. Görünürdü ki, çoxları rəqibə azarkeş edir. Bu da istər-istəməz insana təsirsiz ötüşmür. Ruh düşkünlüyü yaranır, elə bil ki, biz İstanbulda oynayırıq.

– “Qalatasaray”la matçda səhv etdiniz. Bu, müzakirələrə və tənqidlərə səbəb oldu. Bu barədə nə deyə bilərsiniz?

– Qapımıza üçüncü qolun vurulduğu epizodda ötürmə verəndə səhv etdim. Bu, mənim səhvimdir, danılmaz səhvdir. Ötürmə verəndə top ayağıma yaxşı oturmadı və rəqib oyunçunun önünə düşdü. Azarkeşlərdən və “Neftçi”sevərlərdən üzr istəyirəm.

– “Neftçi” Aqil Məmmədova görə uduzdu” fikri ilə razısınız?

– Xeyr, bununla razı deyiləm.

– Digər qol barədə fikirlər var ki, topu tutmalı idiniz, amma qaytardınız…

– Həmin topu tuta bilməzdim, çünki mən öz oyunçumla toqquşurdum, Tutsaydım, topla içəri girəcəkdim. Mən qaytardıqdan sonra rəqib təkrar zərbə ilə vursaydı, bu, mənim səhvim olardı. Amma mən topu qaytarandan sonra rəqib əlavə ötürmə edib. Belə danışıq düşüncəsiz, futbolu yaxşı bilməyən insanlara məxsusdur.

– “Qalatasaray”ı keçmək olardı?

– Onları keçmək çox çətin idi.

– Bir müddət “Neftçi”də oynamadınız, amma sonra əsas qapıçı oldunuz. Nə baş verdi ki, Səlahət Ağayev ehtiyatda qaldı, siz oynamağa başladınız?

– Səlahətin qolunda bir az problem var. İnanıram ki, tez sağalacaq və ona da şans veriləcək. Özümə gəldikdə, baş məşqçi Füzuli Məmmədov şans verir, mən də oynayıram. Çalışırıq ki, əlimizdən gəldiyi qədər komandaya köməklik edək. Mənə elə gəlir ki, Azərbaycanda bir səhvə görə insanı tez sındırırlar, tez qərar verirlər. Düzdür, səhv etmişik. Düşünürəm ki, Azərbaycanda futbolçu yetişmir, yetişdirmək çətindir. Yetişənləri də çalışırlar ki, tez sındırsınlar. Biri var səhvini boynuna almayasan, amma mən səhvimi qəbul edirəm. Deyirəm ki, mənim səhvimdir, üzr istəyirəm. Bu normal haldır, biz robot deyilik, insanıq.

– Milli komandadan dəvət gözləyirsiniz?

– Yığma barədə düşünmürəm. Millinin futbolçularına uğurlar arzulayıram.

Gundemxeber.Az