Bu dəqiqələrdə rus ordusunun Krıma hərbi müdaxıləsi başlayib.

hal-hazırda 5 hərbi "İL-76" təyyarəsi “Qvardeysk” aerodromuna enib. Bundan əlavə, 10-dan çox rus “BTR”i Simferopol tərəfə hərəkət edir. Artıq “BTR”lər Simferopolun 40 kilometrliyindədir.







* * * 20:48

Ukrayna Prezidenti səlahiyyətlərini icra edən Ali Radanın spikeri Aleksandr Turçinov Mixail Kutsini Baş Qərargah rəisi - Hərbi Qüvvələrin baş komandanı vəzifəsinə təyin edib.

Trend-in "İnterfaks"a istinadən verdiyi məlumata görə, müvafiq fərman dövlət başçısının saytında dərc olunub.

Qeyd edək ki, daha əvvəl A.Turçinov Yuri İlyini Baş Qərargah rəisi - Hərbi Qüvvələrin baş komandanı vəzifəsindən azad etmişdi.

Y.İlyin 2014-cü il fevralın 19-da V.Yanukoviç tərəfindən bu vəzifəyə təyin edilmişdi.

Dünən Y.İlyinin ürək tutmasından xəstəxanaya yerləşdirilməsi barədə məlumat yayılmışdı.

* * * 17:14

Ukrayna Milli Müdafiə və Təhlükəsizlik Şurası Krımdakı vəziyyətin yoluna qoyulması üçün plan hazırlayıb

APA-nın “RBK Ukraina” agentliyinə istinadən verdiyi məlumata görə, bunu şuranın iclasından sonra keçirdiyi brifinqdə qurumun katibi, son hadisələr zamanı Maydanın özünümüdafiə qüvvələrinin komandiri olmuş Andrey Parubiy deyib. “Biz separatçı ssenariyə yol verməmək üçün fəaliyyət planı hazırlamışıq”, - deyə o, söyləyib.

A. Parubiy plan haqda danışmayıb, çünki bu, həmin planın həyata keçirilməsini çətinləşdirə bilər. O, problemin həlli üçün beynəlxalq tərəfdaşların cəlb olunması ilə bağlı da plan olduğunu qeyd edib. A. Parubiyin sözlərinə görə, müəyyən olunub ki, kiçik qruplar istisna olmaqla, Krımdakı münaqişədə krımlılar iştirak etmir və hadisələrin əsas iştirakçıları Rusiyanın Qara dəniz donanmasının geyimlərini dəyişmiş əsgərləri və Rusiya “spesnaz”ıdir: “Rusiya Federasiyası və onun ordusu tərəfindən aktiv fəaliyyət başlasa və birbaşa işğal halında sözsüz ki, Ukrayna ordusu və Ukrayna sərhədçiləri tərəfindən ən adekvat addımlar atılacaq”.

Milli Müdafiə və Təhlükəsizlik Şurasının katibi Krımda fövqəladə vəziyyət elan olunması variantının da nəzərdən keçirildiyini, lakin bunun yerinə daha effektiv vasitələrə üstünlük verdiklərini açıqlayıb. A. Parubiy Krımdakı ssenarinin hüquq-mühafizə orqanları tərəfindən lokallaşdırıldığını nəzərə çatdırıb: “Məlumat var ki, xarici xüsusi xidmət orqanları tərəfindən Krımda cızılan ssenari Ukraynanın başqa vilayətlərində inkişaf etdirilməli idi. Ukraynanın bütün strateji obyektləri Ukrayna Silahlı Qüvvələrinin mühafizəsi altındadır. Artıq bütün lazımi tədbirlər görülüb”.

A. Parubiy 2010-cu ildə Ukrayna ilə Rusiya arasında (Viktor Yanukoviç və Dmitri Medvedev tərəfindən) imzalanmış və Rusiyanın Qara dəniz donanmasının Ukrayna ərazisində yerləşməsi və statusunu müəyyən edən Xarkov razılaşmasına yenidən baxılması məsələsini də müzakirə etdiklərini diqqətə çatdırıb. O, konkret qərarlar qəbul olunduqdan sonra ictimaiyyətin bu haqda məlumatlandırılacağını söyləyib. Qeyd edək ki, Xarkov razılaşmasına əsasən Rusiya donanmasının Ukrayna ərazisində qalma müddəti 25 il uzadılıb.

* * * 14:49

Krıma yeridilmiş Rusiya Baş Kəşfiyyat İdarəsinin xüsusi təyinatlı dəstələri bir-birinin ardınca strateji əhəmiyyətli obyektlərə nəzarəti ələ keçirir.

Virtualaz.org saytı Ukrayna qaynaqlarına istinadən xəbər verir ki, Sevastapol aeroportunun tutulmasının ardınca xüsusi təyinatlılar Krım yarımadasının hava məkanına nəzarət edən “Krımaerorux” Dövlət Müəssisəni də tutublar. Silahlanmış və üzləri maskalı, ancaq hərbi geyimlərinin üzərlərində tanınma nişanları olmayan rus xüsusi təyinatlıları müəssisənin giriş-çıxışını bağlayıb. Bununla da yarımadanın üzərində aviasiya naviqasiyasını tənzimləyən müəssisə rusların nəzarətinə keçib.

Hərbi qaynaqlardan məlum olub ki, Sevastapol aerportunu və müəssisəni ələ keçirənlər Rusiyanın Qara dəniz donanmasının hərbçiləri yox, Rusiya Baş qərargahının nəzdindəki Baş Kəşfiyyat İdarəsinin (QRU) xüsusi təyinatlı döyüşçüləridir. Onlar Krıma Rusiya ərazisindən yeridilib. QRU “spesnaz”nı daşıyan təyyarə Qara dəniz donanmasının Qvardeysk qəsəbəsində yerləşən hərbi aerodromuna enib.

* * * 14:30

Bu gün səhər Sevastopolda 8 Rusiya hərbi vertolyotu enib.

Virtualaz.org saytı Ukrayna mənbələrinə istinadən xəbər verir ki, vertolyotlar Rusiyanın Soçi yaxınlığındakı Anapa şəhərindən havaya qalxıb. Mənbə istisna etmir ki, həmin vertolyotlardan birində devrilmiş prezident Viktor Yanukoviç də ola bilər.

Krım tatar məclisinin lideri Refat Çubarov da Sevastopola 8 Rusiya hərbi vertolyotunun endiyini təsdiqləyib. Onun sözlərinə görə, vertolyotlardan birində Yanukoviçin ola biləcəyinə dair informasiya hələ təsdiqlənməyib və yoxlanılır. Xatırladaq ki, Rusiya KİV-ləri Yanukoviçin bu gün axşam Rostovda mətbuat konfransı keçirəcəyini xəbər veriblər.

* * * 13:21



Ukrayna Ali Radasının spikeri və müvəqqəti olaraq prezident vəzifələrini icra edən Aleksandr Turçinov Krımda monitorinq keçirmək üçün BMT Təhlükəsizlik Şurasına müraciət edib.

Turçinov bundan əlavə suverenliyin pozulacağı təqdirdə tədbir görməsinidə istəyib.

Bundan əlavə spiker Ukrayna milli təhlükəsizlik və müdafiə şurasının fövqəladə iclasını çağırıb.

* * * 12:22

Dövlət Duması isə tələsik “ölkəyə yeni ərazilərin birləşdirilməsi” qanunu qəbul etməyə hazırlaşır

Krımda yerli parlament və hökumət binalarının Rusiya Baş Kəşfiyyat İdarəsinin xüsusi təyinatlıları olduqları təxmin edilən naməlum silahlı dəstələr tərəfindən tutulmasından sonra yarımadanın ərazisində digər strateji obyektlər də rus hərbçilərinin nəzarətinə keçir.

Virtualaz.org saytı Ukrayna qaynaqlarına istinadən xəbər verir ki, bu gecə saat 3 radələrində 300-ə yaxın yaxşı silahlanmış hərbi geyimli şəxs Sevastopolun Balbek aeroportunu tutub.

Aeroportun növbə rəisi Anatoli Reçenko bildirib ki, onlar rus hərbçiləridir. Belbek aeroportuna gedən yol “kirpilər”lə kəsilib, silahlı şəxslər yola nəzarət edir. Hərbi geyimli şəxslər heç kimi yaxına buraxmır və “dayanın, yoxsa atəş açarıq” xəbərdarlığı edirlər.

A.Reçenko deyib ki, aeroportun ərazisində 3 BTR və hərbçilərlə dolu 10 “Ural” maşını da var. Ehtimal ki, aeroportun rus hərbçiləri tərəfindən nəzarətə götürülməsi Ukraynanın mərkəzi hakimiyyətinin Krıma ordu yeritməsinin qarşısını almaq məqsədi daşıyır.

Ukraynanın daxili işlər naziri Arsen Avakov facebook səhifəsində yazıb ki, aeroportu tutanların geyimində tanınma nişanları yoxdur, lakin onlar Rusiya hərbçiləri olduqlarını gizlətmirlər. Avakovun yazdığına görə gecə yarısı aeroporta əvvəlcə özlərini kazaklar kimi təqdim edilən silahlı şəxslər daxil olub.



Lakin onlar sərhədçilərin və milislərin səyləri ilə aeroportdan sıxışdırılıb. Çox keçmədən içərisində hərbçilər olan nömrəsiz hərbi yük avtomobilləri aeroporta daxil olub. Onlar danışıqlara girməkdən imtina ediblər və silah işlədəcəkləri ilə bağlı xəbərdarlıq ediblər.

“Baş verənlər açıq-aşkar silahlı müdaxilə və işğaldır. Hələlik birbaşa silahlı toqquşmalar baş verməyib, diplomatlara şans vermək lazımdır” - deyə Avakov yazıb.

Rusiya mənbələri isə xəbər verir ki, ölkənin Qərb hərbi dairəsinin 150 min hərbçisinə, 90 döyüş təyyarəsinə, 80 hərbi gəmiyə, 120 vertolyota və 1000-dən çox tanka “1 nömrəli” döyüş hazırlığı əmri verilib. Həyəcan siqnalı ilə qoşunlar “verilmiş nöqtələrə” doğru hərəkət etməyə başlayıblar və daha sonrakı əmri gözləyərək döyüşə hazır vəziyyətdə dayanacaqlar.

Qoşunların vəzifəsinin nədən ibarət olduğunu komandirlər ancaq məxfi məktubu açandan sonra biləcəklər. Bu döyüş hazırlığının Ukrayna ilə bağlı olduğu ehtimal edilir.

Bu arada Rusiya Dövlət Duması ölkəyə yeni ərazilərin birləşdirilməsi prosedurlarının sadələşdirilməsinə dair qanun layihəsini tələsik müzakirəyə çıxarmağa və qəbul etməyə hazırlaşır. Qanun layihəsi minlərlə ukraynalıya qısa müddət ərzində Rusiya pasportlarının verilməsinin yolunu açacaq və çox güman ki, Krımın Rusiyaya birləşdirilməsi üçün hüquqi bazanın hazırlanması məqsədini güdür.