Ermənistan KQB-nin keçmiş sədrindən sensasion Qarabağ açıqlaması

“Bir sıra azərbaycanlı siyasi xadimlərin, ekspertlərin və jurnalistlərin Azərbaycandakı siyasi təqiblərin Moskvanın təşəbbüsü ilə həyata keçirildiyinə dair bəyanatları doğrudur”.
Bu barədə Ermənistan KQB-nin keçmiş sədri David Şahnazaryan bildirib.
Mətbuata müsahibəsində Şahnazaryan deyib ki, bunun üçün Rusiya xüsusi xidmət orqanlarının Azərbaycanın yüksək hakimiyyət eşalonlarında çoxlu rıçaqları var. “Onlar təsəvvür olunandan daha çoxdur” - deyə erməni siyasətçi bildirib. D.Şahnazaryan Rusiyanın Ermənistanda da anoloji rıçaqlara malik olduğunu deyib. O, Rusiyanın Ermənistandakı səfirinin anti-Moskva fəaliyyəti aparan QHT-lərin barəsində ölçü götürüləcəyinə dair bu günlərdə verdiyi qalmaqallı açıqlamanı xatırladıb. Şahnazaryanın fikrincə, Azərbaycan və Ermənistan ictimai xadimlərinin, ekspertlərinin Dağlıq Qarabağ münaqişəsinin dinc yolla həllinə kömək etmək üçün qurduğu təmaslar Rusiyanın maraqlarına cavab vermir.
D.Şahnazaryan Azərbaycanın eks-prezidenti Ayaz Mütəllibovun Sülh və Demokratiya İnstitutunun rəhbəri, “erməni işi”ində adı keçən və istintaqa cəlb edilən Leyla Yunus haqda açıqlamasına da münasibət bildirib. Mütəllibov isə mediaya açıqlamasında demişdi ki, vaxtilə Leyla Yunus və digərləri onu “dinc erməniləri qırmaqda” ittiham edirdilər və Qarabağda erməni yaraqlılarına qarşı aparılan əməliyyatları dayandırmaq üçün kompaniya aparırdılar.
“Mütəllibova gəldiksə isə o, sifariş yerinə yetirir. Əmin olun ki, Mütəllibov bu sətirləri oxuyacaq və düzgün nəticələr çıxaracaq. Mən ona dərindən nəfəs almağı və sakitləşməyi məsləhət görürəm. Əks halda mən onun yaddaşını bir sıra maraqlı epizodlarla zənginləşdirməli olacam”, - deyə D.Şahnazaryan bildirib. D.Şahnazaryan onu da deyib ki, Rusiya Azərbaycanla anlaşıb və bu anlaşmaya görə Bakı Qərblə sıx əməkdaşlıqdan imtina etməli, əvəzində Moskva Dağlıq Qarabağı və ətraf rayonları Azərbaycanın nəzarətinə verməli, öz qoşunlarını Azərbaycan ərazisində yerləşdirməlidir.
“Kremlin bu planı Putinin neoimperialist siyasətinin tərkibinə daxildir. Bu siyasət Qarabağ münaqişəsi ətrafında yeni situasiya yaradıb və bütün münaqişə tərəfləri üçün təhlükəlidir” - deyə o bildirib. D.Şahnazaryan amerikalı həmsədr Ceyms Uorlikin Vaşinqtonda təqdim etdiyi sülh prinsiplərinin Ermənistan üçün son şans olduğunu deyib. Onun sözlərinə görə, Ermənistan bu planı qəbul etməsə Rusiyanın planı işə düşəcək. Şahnazaryan Uorlikin açıqladığı elementlərin 1997-ci ildə tərəflərə təqdim edilmiş “mərhələli həll” planı ilə eyni yanaşmalara və məntiqə əsaslandığını bildirib. D.Şahnazaryan Ermənistanda Uorlikin bəyanatına qarşı çıxanlara və münaqişə ətrafında status kvonu saxlamaq tərəfdarlarına cavab olaraq deyib ki, status-kvo təkcə təmas xətti ilə məhdudlaşmır. Bu, çoxsaylı komponentlərdən ibarət situasiyadır və həmin komponentlərin çoxu dəyişib. Şahnazaryanın sözlərinə görə, birincisi, hərbi balans çoxdan Azərbaycanın xeyrinə dəyişib, özü də əsasən Rusiyanın səyləri sayəsində. İkincisi iqtisadi amildir. Ermənistan KQB-nin keçmiş sədri deyib ki, Azərbaycanla Ermənistanın iqtisadi vəziyyətini 15 il əvvəllə heç cür müqayisə etmək olmaz. “İqtisadi vəziyyət Azərbaycanın xeyrinə durmadan dəyişir. Üçüncüsü, regionda geosiyasi balans bizim xeyrimizə deyil, xüsusən də Ermənistan Gömrük İttifaqına üzv olmağa razılıq verəndən sonra” - Şahnazaryan bildirib.
O, əlavə edib ki, Azərbaycan kifayət qədər müstəqil və çoxyönlü siyasət aparır. Energi təhlükəsizliyinə gəldikdə isə Ermənistan bu sahədə Rusiyadan tam asılıdır, Azərbaycan isə öz enerji müstəqilliyini tam təmin edib. “Ermənistanın beynəlxalq arenada nüfuzu da ciddi şəkildə aşağı düşüb. Xüsusən ötən il sentyabrın 3-dən sonra. Azərbaycan isə öz nüfuzunu qaldırmağa böyük vəsaitlər xərcləyir və artıq ciddi nəticələr əldə edib. Ona görə də statius-kvo daim dəyişir, özü də bizim xeyrimizə yox. Yəni “status-kvonu saxlamaq” iddiaları ancaq Moskvaya Ermənistandakı kriminal-oliqarxik rejimə sərf edir” - deyə Şahnazaryan bildirib.
Keçmiş KQB sədri deyib ki, 1998-ci ildə Robert Köçəryan “status-kvonu saxlamaq” adı altında dövlət çevrilişi yolu ilə hakimiyyəti qəsb etdi və oliqarxiyanı və hakimiyyəti birləşdirmək, xalqı soymaq və milyardlarla dollarlıq sərvətin sahibi olmaq üçün ATƏT-in Minsk Qrupunun mərhələli həll planını rədd etdi. D.Şahnazaryan deyib ki, Ermənisatnda “bir qarış da torpaq qaytarmamaq” tərəfdarlarının əksəriyyəti Moskvanın indiki siyasətini, kriminal oliqarxiyanın və özünün maraqlarını Ermənistanın və Dağlıq Qarabağın maraqlarından üstün tutanlardır.