«The Sunday Times»dən şok iddia: “Tehran İsrail üzərinə hücum edərsə, Yerusəlim də Azərbaycanda mənzillənmiş nəhəng dronları havaya qaldıracaq”

Azərbaycanda mənzillənmiş «Eitan» dronları (pilotsuz təyyarələri) İran raketlərini vurmağa cəhd göstərəcək. Bunun üçün Amerikada istehsal olunmuş X-diapazonlu radarlardan istifadə nəzərdə tutulur. Bu radarlar raketlərin mühərriklərinin işə düşməsini dərhal qeydə alır. Məlumatı dərc etmiş «The Sunday Times» qəzeti aydınlıq gətirir ki, Tehran İsrail üzərinə hücum edərsə, Yerusəlim də İrana qonşu Azərbaycanda mənzillənmiş nəhəng dronları havaya qaldıracaq. Bu pilotsuz təyyarələr isə İran raketlərini onlar hələ havaya qalxmamış vuracaqlar.
«The Sunday Times» yazır ki, bu sistemin işləməsi üçün İsrailin Nevatim hərbi-hava bazasında qurulmuş Amerika istehsalı olan X-diapazonlu radardan istifadə ediləcək. Bu radar sistemi İran raketlərini, artıq onların start platformalarında aşkar edəcək. İsrailə 13 dəqiqə öncədən xəbər siqnalı göndəriləcək. Qəzetə məlumat verən İsrail mənbəyi bildirib ki, «biz raketləri qızışma mərhələsində, yəni onların mühərrikləri işə düşən anda məhv etməyə çalışacağıq».
Bəzi xəbərlərə görə, belə bir önləyici zərbə Azərbaycanda mənzillənmiş «Eitan» və ya «Heron» adlanan pilotsuz təyyarələrdən atılan Amerika istehsallı «Hellfire» raketləri ilə həyata keçiriləcək. «İsrailin məlumatlı mənbəyi» həmçinin bildirib ki, «deyildiyi kimi də asan olmayan bu hadisə baş verərsə, İranın yerdə qalan raketlərinin işini İsrailin Hava Hücumundan Müdafiə Komandanlığı bitirəcək».
«The Sunday Times» qəzetinin dərc etdiyi məqalənin müəllifi Uzi Mahnaimi-dir. O, əvvəllər İsrail Hərbi Hava Qüvvələrinin «Eitan» dronlarından Sudandan Qəzzaya silah daşıyan İran hərbi karvanına zərbə endirdiyi barədə eksklüziv xəbər yaymışdı. «Eitan» 7400 kilometrlik uçuş mənzilinə malikdir ki, bu da İsrail və İran arasındakı məsafədən dörd dəfə çoxdur.
Bu dronlar, həmçinin, 70 saat ərzində havada qalmaq qabiliyyətinə malikdir. Bu isə o deməkdir ki, İranın radar sistemini, hava hücumundan müdafiə batareyalarını məhv etmək üçün İsrailin kifayət qədər vaxtı olacaq. Qanadlarının çarpaz uzunluğu 26 metr olan bu dronlar «Boinq-737» təyyarəsi boyda olmaqla, 5 tonadək yükgötürmə qabiliyyətinə malikdirlər. «The Sunday Times» oktyabrda Sudandakı silah zavodunun məhz bu cür vurulmasınin iddia olounduğunu xəbər verir. İsrail mənbələrinin məlumatına görə, eyni üsulla noyabrda «Həmas»ın «Fəcr-5» raketlərinin saxlandığı böyük anbar məhv edilib.
Hərbi ekspertlər bundan əvvəl də yazırdılar ki, İsrailin İran üzərinə hər hansı mükəmməl zərbəsi üçün məsafələr başlıca maneədir. Bu hücumlar, əslində, İrana çox yaxın platsdarmdan istifadə edilmədən mümkün deyil. İsrail qəzetləri bu məqsədlə Azərbaycandakı hərbi-hava bazalarından istifadə ediləcəyi ehtimalı barədə dəfələrlə yazıb. Qəzetlər Azərbaycan ərazisindən, ən azı, İsrail təyyarələrinin yanacaqla təchizatı üçün istifadə edilə biləcəyindən də yazıblar. Azərbaycan hökuməti bu barədə məlumatları həmişə israrla təkzib edib. Rəsmi Bakı Tehrana bu barədə dəfələrlə qarantiyalar verib.
Hazırda bu mövzuya qayıdılmasına səbəb odur ki, İsrailin İran üzərinə gələn il hücum edəcəyi barədə şayiələr dolaşır. Bu halda İranın «Şahab-3» və digər uzaqmənzilli raketlərlə cavab verəcəyi ehtimal olunur. Ötən ay İsrailin baş naziri Binyamin Netanyahu çıxışlarının birində ölkəsinin «hamı üçün sürpriz olacaq» silaha yiyələndiyini bildirmiş, lakin təfərrüatlara varmamışdı. Bəzi ekspertlər söhbətin məhz «Eitan» dronlarından getdiyini təxmin etmişdilər.

Zülfüqar Rüfətoğlu