Molla rejimi odla oynayır

Ötən həftə İranda baş verən hadisə bu ölkəni idarə edən rejimin hansı təhlükəli oyuna girişdiyini bir daha aydın etdi. Pilotsuz ABŞ təyyarəsini endirəndən sonra İran Silahlı Qüvvələri öyünür, ölkənin müdafiə qüdrətinin artdığını, dövlətin öz təhlükəsizliyini təmin edə biləcəyini bəyan edirdilər. Amma son hadisə göstərdi ki, İran xalqı böyük təhlükə içərisindədir. İranın hakim molla rejimi nüvə proqramı məsələsində supergüclərlə qarşı-qarşıya gəlməkdə doğru addım atmır. İranın Fordodakı nüvə obyektində partlayış baş verib.
Xəbər saytlarının verdiyi məlumata görə, İran İnqilab Qvardiyasının keçmiş zabiti Reza Kaxlili açıqlamasında bildirib ki, partlayış nəticəsində nüvə obyektinin əksər hissəsi məhv edilib, 250 işçi yer altında daş tələyə düşüb. 1980-90-cı illərdə ABŞ Mərkəzi Kəşfiyyat İdarəsinə casusluq etmiş Reza Kaxlili Fordodakı partlayış barədə məlumatı ona obyektin müdafiəsi ilə məşğul olan təhlükəsizlik orqanındakı mənbədən əldə etdiyini söyləyib. Fordodakı nüvə obyekti hava hücumundan qorunmaq üçün dağın dərinliyində yerləşir. Partlayış obyektdə titrəyişə yol açıb və ərazi də 3 mil radiusunda silkələnib. İran təhlükəsizlik qüvvələri nüvə obyektindən 15 mil uzaqlıqda nəqliyyatın və insanların hərəkətinə qadağa qoyub, Tehran-Qum magistralı isə partlayışdan bir neçə saat sonra bağlanıb.
“Sunday Times” qəzeti yazır ki, İsrail kəşfiyyatı bu barədə xəbəri təsdiqləyib. İsrailin rəsmi şəxsləri bildiriblər ki, İran hələ nüvə obyektində nə baş verdiyini və bunun nə dərəcədə ciddi olduğunu yeni anlamağa başlayıb. Nüvə obyektində partlayışın təxribat, yoxsa bədbəxt hadisə olduğu da hələ müəyyənləşməyib. Xəbər verilir ki, partlayış baş verən zaman obyektin yaxınlığında İsrail kəşfiyyat təyyarəsi görünüb. İsrail rəsmiləri bunu təkzib etməyiblər. Qərbin nüfuzlu media qurumları partlayışda İsrailin əlinin ola biləcəyini ehtimal edirlər. Əslində burda qeyri-adi heç nə yoxdur. Ötən il İsrailin kəşfiyyat servisi İranın nüvə alimlərinə qarşı iki dəfə terror aktı törətmişdilər. Hər iki akt başarılı olmuş, iranlı alimlər öldürülmüşdülər. O zaman Qərb dairələri İran silahlı qüvvələrinin, xüsusi xidmət orqanlarının yarıtmaz işinə tənqid etmiş və bildirmişdilər ki, İranın Qərbi və İsraili hədələməsi daxili ictimai rəyə hesablanmış mənasız ritorikadan başqa bir şey deyil. İran dövləti faktiki olaraq öz vətəndaşlarının, öz xalqının təhlükəsizliyini təmin edə bilmir. Baş verən son hadisə bunu bir daha sübut etdi. Olay göstərdi ki, İran hakimiyyəti nəhayət, tərslikdən əl çəkməli, nüvə proqramına son qoymalıdır. Beynəlxalq imperialist dairələr İranın, bölgənin xaraba qalmasına səbəb olacaq bütün dəhşətli addımlara gedə bilərlər. İranda nüvə obyektinin partladılması bir həyəcan siqnalıdır. İran kimi geridəqalmış bir dövlətin nüvə mərkəzini qoruması sual altındadır. İranın nüvə mərkəzlərində baş verəcək daha bir partlayış ölkənin, bütünlükdə bölgənin məhvinə gətirib çıxara bilər.
Hüseyn Meşkinli