Polis cinayətin videogörüntülərini yaydı

“ABC News” maraqlı video-görüntülər yayımlayıb. Avtomobili ilə pul çəkmək üçün quraşdırılmış bankomata yaxınlaşan qadın, az sonra silah gücünə maşının baqajına girməli olur.

Hadisə Texas ştatının Arlinqton şəhərində bank hesabından pul çəkən qadının başına gəlib. Maraqlıdır ki, bütün bu proses nəzarət kameraları tərəfindən video-yaddaşa yazılıb. Polis şübhəli şəxs haqqında məlumat əldə etmək üçün, həmin görüntüləri yayımlayıb.

Ağdərili xanımı təhdid edən qaradərili soyğunçu qadının bankomatdan çəkdiyi pulları almaqla kifayətlənməyib. O, öz qurbanını başqa bir bankomata aparıb və qadını məcbur edib ki, oradan da pul çəksin.

Qadın zor qarşısında deyilənlərə əməl edib, ancaq yenidən maşının baqajına girməli olan qadın, bu dəfə daha tədbirli tərpənib və ilk imkan düşən kimi, baqajdan düşərək qaçıb. Yaxınlıqdakı ərzaq mağazasına daxil olan qadın polisə yaxınlaşaraq, başına gələnləri anladıb. Az sonra polis onun maşınını boş tapıb.

Yerli polis bildirib ki, təxminən eyni qaydada bu günlərdə başqa bir vətəndaş soyulub. Böyük ehtimalla cinayəti eyni adam törədib. Hazırda cinayətkarın axtarışı ilə bağlı intensiv istintaq hərəkətləri həyata keçirilir.

Qorxulu anlar yaşamış qadın “ABC News”la öz təəssüratlarını bölüşüb.

Elbəyi Həsənli

|