Molla rejiminin diplomatı Türkiyə ilə Azərbaycanın arasına nifaq toxumu səpir

“Türklərlə azərbaycanlılar arasında məzhəb fərqi var, türklər sünni, azərbaycanlılar isə şiədir”

“Türkiyə pantürkizm ideologiyasını yaymaqla məşğuldur. Bu ölkə Mərkəzi Asiya dövlətləri ilə münasibətdə özünü böyük qardaş kimi aparır. Amma Türkiyə və Azərbaycanda yaşayan xalqların arasında məzhəb fərqi var. Türklər sünnidir, azərbaycanlılar da şiə. Bu ideologiyanı yayanlar Azərbaycanda da fəaliyyət göstərirlər, və hərdən onların təbliğatı digər ölkələrin ərazi bütövlüyünü sual altına qoyur”. APA-nın məlumatına görə, bu fikirləri “khabaronline.ir” saytına müsahibəsində İranın Azərbaycandakı səfiri Möhsün Pak Ayin deyib.
Səfir müsahibəsində Azərbaycan-İsrail əlaqələrinə və bu münasibətlərin İranla əlaqələrə təsirinə də toxunub: “Azərbaycanla İsrail arasında yaxşı əlaqələr var və rəsmi Bakı dəfələrlə bəyan edib ki, bu əlaqələr İrana qarşı yönəlməyib. Biz Azərbaycan rəsmilərə inanırıq. Bu, iki ölkə arasında mövcud olan standart əlaqələrdir”.
Azərbaycan-İran münasibətlərinə toxunan səfir deyib ki, bəzən iki dövlətlər arasında anlaşmazlıq olur, amma bu hallar iki qonşu ölkələri və insanların arasında maneəyə çevirməməlidir: “Bəli, belə hallar olub. Məsələn “Eurovision” müsabiqəsi zamanı belə anlaşmazlıqlar vardı, amma diplomatik səyləri nəticəsində bu məsələ həll olundu. Bizim Azərbaycanla münasibətlərimiz inam üzərində qurulub, bizim hələ çox görəcəyimiz işlər var”.
Dağlıq Qarabağ münaqişəsi ilə bağlı suala cavabında səfir deyib ki İran bu münaqişəsi ilə bağlı öz vasitəçi rolunu təklif etməyə hazırdır: “Azərbaycan və Ermənistan fərqli ölkələrdir. İran 15 ölkə ilə qonşudur. Pakistanla Əfqanıstan arasında ziddiyyətlərə baxmayaraq biz hər iki ölkə ilə əməkdaşlıq edirik. Bizim İraq və Türkiyə ilə də yaxşı əlaqələrimiz var, baxmayaraq ki bu iki ölkə arasında da ziddiyyətlər var. İran Ermənistanla Azərbaycan arasında dialoqda vasitəçi olmağa hazırdır, amma hər iki tərəf Minsk Qrupu formatını seçdilər. Biz düşünürük ki, ATƏT-in Minsk Qrupunun səyləri uğursuz olacaq, çünki həmsədr ölkələr münaqişəni uzun illərdir həll etməyə çalışsalar da, bunu etmək üçün güclü iradələri yoxdur. Bəlkə də, Minsk Qrupuna həmsədr ölkələr danışıqlar prosesini uzatmaq istəyirlər ki, Azərbaycan və Ermənistandan müəyyən imtiyazlar qopara bilsinlər”.
İran səfirini bu acıqlaması əlbəttə, Azərbaycana məhəbbətdən irəli gəlmir. 30 milyon azəri türkünü əsarətdə saxlayan, onların ən adi hüquqlarını belə tanımayan dövlətin təmsilcisindən əslində bunu gözləmək də absurddur. Ancaq səfirin başını səlahiyyətinə aid olmayan işlərə soxması, iki qardaş millət və dövlət arasına düşmənçilik toxumu səpməyə çalışması diqqətdən kənarda qala bilməz. Ortaya məzhəb ayrılığı söhbəti atanların niyyətləri heç vaxt təmiz olmayıb. Tarixdə bunu sübut edən istənilən qədər fakt tapmaq olar.
Adını İslam dövləti qoyan bir ölkənin rəsmisinin də dili bir, DİNİ bir, soyu bir, sadəcə dövləti ayrı olan TÜRK millətlərinin arasına nifaq toxumu səpmək niyyətinin də arxasında məhz həmin hadisələri təkrarlamaq niyyətinin dayandığına şübhə etmirik. Ançaq səfir unudur ki, zaman da, insanlar da dəyişib. İndi Azərbaycan türkləri kimin həqiqi dost, kimin saxta dost olduğunu ayıracaq qədər təfəkkürə malikdir. Bir neçə faktı deyək: Azərbaycana dost deyib, onun ərazisini 20 faizini işğal altında saxlayan Ermənistanla “can bir qəlbdə olan” Türkiyə deyil, məhz İrandır.
Hər fürsətdə Azərbaycan torpaqlarına qarşı iddialar irəli sürən də Türkiyə deyil, məhz İran rəsmiləridir. Və ən əsası tarixi Azərbaycan torpaqlarının böyük hissəsini-Güney Azərbaycanı özünə ilhaq edən də Türkiyə deyil, məhz İrandır.
Ona görə də İran səfirinin ortaya məzhəb söhbəti atıb da, “suyu bulandırmağa” cəhd etməsini arxasında çırklı niyyətlərin dayandığını əminliklə deyə bilərik. Ancaq Möhsün Pak Ayin ona da əmin olsun ki, ətlə dırnaq arasına girənlər həmişə İYLƏNİB çıxıb.
R. Əliyev