Ekspertlərin rəyinə görə, terror təşkilatı hər gün neft satışından ən azı 1 milyon avro gəlir əldə edir
İtaliyanın “La Reppublica” qəzeti bu günlərdə İŞİD-in əlində olan nefti İtaliya vasitəsilə bazara çıxararaq əldə etdiyi sərvətlə bağlı maraqlı məqalə yayıb.

Cuilano Foskini və Fabio Tonaççi tərəfindən qələmə alınan yazıda bu vaxta qədər yalnız fərziyyə kimi yürüdülən və rəsmi olaraq təsdiqini tapmayan məlumatların ölkənin maliyyə polisinə bağlı olan valyuta polisi xüsusi idarəsinin gizli hesabatında yer aldığı göstərilib.

“Belə məlum olub ki, terror təşkilatlarının nəzarət etdiyi bölgələrdən idxal olunan neftin son məntəqəsi İtaliyanın neft emalı zavodlarıdır”,- məqalədə qeyd olunub.

Müəlliflər terrorçuların neft qaçaqlmalçılarının xidmətlərindən geniş şəkildə istifadə etdiyini vurğulayırlar.

“Elə isə qaçaqmalçılar hansı marşrut üzrə hərəkət edirlər?” - yazıda sual qoyulub.

Onların fikrincə, ilk cavabı Maltanın cənubundan 60 mil uzaqda tapmaq olar. Burada Aralıq dənizindən gələn neft tankerləri və Liviyadan lövbər qaldıran çən lixterləri (daşıyıcı gəmilər) beynəlxalq suların kəsişmə nöqtəsində bir neçə saatlığa gözdən itirlər:

“Onları sanki Bermud üçbucağı əfsanəsində olduğu kimi nəsə yoxa çıxarır. Əslində isə həmin gəmilər göyərtə transponderlərini qarşılıqlı şəkildə söndürürlər. Bu da onların kənardan və peykdən izlənilməsini mümkünsüz edir. Daha sonra lixterlər həmin tankerlərə yaxınlaşaraq qeyri-leqal nefti böyük çənlərdən boşaldırlar.

Əməliyyat bitdikdən və gəmilər təhlükəsiz məsafəyə qədər aralandıqdan sonra yenidən peyk cihazını işə salırlar. Lixterlər yalnız Liviyaya geri döndükdən sonra monitorda görünür. Ana gəmi isə Sicilya limanlarına, İtaliyanın şimal-şərqinə və Marselə doğru marşrutunu davam etdirir.

Məqalədə bu sistemin Siciliya prokurorluğunun rəhbərliyi altında maliyyə polisi tərəfindən aparılan böyük təhqiqatın predmetinə çevrildiyi qeyd olunub:

“Araşdırma nəticəində bu cür nəqliyyat təminatını təşkil edən və ərəb neftini dünyanın iri şirkətlərinə satışından milyardlarla dollar pul qazanan İtaliya və Maltaya mənsub onlarla broker firmalarıın olduğu təsbit edilib. Bu firmalar arada vasitəçi rolunu oynayaraq saxta sənədlərin köməyi ilə bütün qaçaqmalçılıq şəbəkəsinin pullarının yuyulmasında iştirak edirlər”.

Qəzetin yazdığına görə, maliyyə polisinin əməkdaşları İtaliyanın bir neçə neft emalı zavodunun anbarlarına baş çəkərək oradan nümunələr götürüblər. Təhlillərin nəticəsində məlum olub ki, həmin anbarlarda sənəddə göstərilənlərdən qat-qat artıq Liviya və Suriyadan gətirilən neft var.

“İtaliyanın mafiya ilə mübarizə üzrə milli prokuroru Franko Roberti radikal dini terrorizmlə mütəşəkkil cinayətkar ünsürlər arasında iki potensial təmas xəttini olduğuu qeyd edib- neft və narkotik”, - jurnalistlər qeyd edir.

Qəzet İtaliya polisinin Venesiya və Apuliya şəhərlərində apardığı araşdırmalarla mafiyanın qara qızıl alverinə aşağıda bəhs olunan sxemlə satılmasına böyük maraq göstərdiyini aşkar etdiyini yazır:

“Onlar (mafiya-red) öncə xaricdə benzin satışı üzrə fəaliyyət göstərdiyi qeyd olunan yalançı firmalar yaradırlar. Daha sonra isə adi ixracatçılardan saxta akkreditasiya əldə edirlər. Nefti sifarişçilərə aşağı qiymətə satdıqdan sonra isə firmanı dərhal bağlayırlar”.

Qəzet İŞİD terror təşkilatının neft istehsal olunan yerin yaxınlığında satışından əldə etdiyi gəlirin hər barrelə görə 20-35 dollar civarında olduğunu yazır. Həmin neft isə vasitəçilər tərəfindən başqalarına 60-100 dollara qədər qaldırıla bilir.

Məqalədə hər gün bu yolla 50 min barrel neft satıldığı vurğulanır.

“Bu bir günə milyon avro deməkdir. İŞİD üçün isə əsl xəzinədir!”, - jurnalistlər ən sonda qeyd ediblər./musavat.com