“Daha belə yaşamaq olmaz”


Qarabağın işğalında iştirak etmiş bir qrup erməni iyunun 16-sı Yerevanda mitinq keçirəcək. “Media forum” saytına istinadən məlumata görə, “Daha belə yaşamaq olmaz” şüarı altında keçiriləcək mitinqin təşəbbüskarlarının yaydığı bəyanatda deyilir: “Biz Ermənistanda vəziyyəti dəyişmək istəyənləri, partiya mənsubiyyətindən asılı olmayaraq, bu mitinqə dəvət edirik. Bizim əsgərlərimiz yenə millətin müdafiəsinə qalxıb. Hamı bir nəfər kimi Azadlıq meydanına”.
İyunun 5-də işğalçı döyüşçülər bəyanat yaymışdı. Onlara qarşı etinasızlıqdan, problemlərinə məhəl qoyulmamasından şikayət edən işğalçılar 13 tələb irəli sürmüşdülər. Əsas tələblər təqaüdlərin artırılması, ehtiyacı olanların evlə təmin olunması, kommunal xidmətlərə 50% güzəşt, uşaqlarının təhsilinə 50% güzəşt, şəxsi biznes qurmaq üçün güzəştli kreditlər, pulsuz tibbi xidmətdir. Tələblər müdafiə naziri Seyran Ohanyana təqdim olunmuşdu.