İranın dini lideri Əli Xameneyinin inqilabın lideri Ruhullah Xomeyninin ölümündən qısa bir müddət sonra yeni liderin seçilməsi üçün keçirilən müşavirədə etdiyi çıxışın yazısı ortaya çıxıb. Videoda Xameneyi bu vəzifəyə uyğun olmadığını deyib.

Dini liderlik İranın ən ali siyasi və dini məqamıdır. Ölkəylə bağlı mühüm qərarları almaq hüququna malik olan dini lider, seçildikdən sonra bu vəzifəni ömürlük davam etdirir. Dini lideri, Mütəxəssislər Məclisi seçir.
1979-ci ildə baş verən İran inqilabından sonra sürgündən gələrək qurduğu rejimin dini lideri olan Xomeyni, 1989-ci ildə vəfat edib.
Xomeyninin ölümünündən sonra toplanan Mütəxəssislər Məclisi, Əli Xameneyini yeni dini lider olaraq seçib. İran İslam Respublikasının ikinci dini lideri olan Xameneyi, 1989-ci ildən bu vəzifəni davam etdirir.
Xomeyninin ölümündən sonra toplanan Mütəxəssislər Məclisinin toplamtısında çəkilən video yazı ilk dəfə bu gün ortaya çıxıb.
Videoda Xameneyinin Məclis toplantısında etdiyi çıxışında, dini liderlik vəzifəsi üçün kifayət qədər hazırlıqlı olmadığını dediyi görülür.
Xameneyi, həmin toplantıdakı çıxışında dini liderlik vəzifəsinə müctəhidin (Şiəlikdə nümunə götürülməli olan, bağlı məsələlərdə fətva alınan səlahiyyətli şəxs) və ya böyük ayətullah səviyyəsində olan birinin gətirilməsi lazım olduğunu bildirir.
Xameneyi özünün bu səviyyədə olmadığı üçün vəkalətən olsa bilə dini liderlik vəzifəsinə təyin edilə bilməyəcəyini vurğulayır.
Xameneyi, "Mənə bu vəzifənin müvəqqəti olsa belə təklif edilməsi, texniki və əsas olaraq qanunlara ziddir" deyir.
Özünün bu vəzifəyə layiq olmadığını deyən Xameneyi, "Mənim rəhbərliyim ancaq kağız üstündə mümkün olar, həqiqi liderlik olmaz. Konstitusiyaya görə, bu vəzifə üçün kifayət qədər yüksək səviyyəli deyiləm və dini baxımdan da burada yerləşən bir çox adam (məndən daha təcrübəli olduğundan) mənim sözümü eşitməz. Belə bir liderlik necə ola bilər"? deyə, söyləyib.