Ermənistan Milli Təhlükəsizlik Xidmətinin əməkdaşları bu gün Dövlət Mühafizə Xidməti rəisinin birinci müavini, general-mayor Vaçaqan Kazaryanı həbs ediblər. Kazaryan daha çox “sürücü Vaço” kimi tanınıb və keçmiş prezident Serj Sarkisyana ən yaxın adamlardan biri hesab olunub.

Vaçaqan Kazaryan Serj Sarkisyanın hakimiyyəti dövründə prezidentin müşaviri vəzifəsinə qədər yüksəlib. İndi məlum olur ki, bu cür başgicəlləndirici vəzifə yüksəlişini “sürücü Vaço” necə təmin edə bilib. Bəzi “bədxah”ların bildirdiyinə görə, Sarkisyan rejiminin dayağı olan korrupsiya sxemlərinin hamısına nəzarəti məhz bu şəxs həyata keçirirmiş.

Kazaryan gəlirləri barədə bəyannamədə yalan məlumat verməkdə və malik olduğu varidatı gizlətməkdə, həmçinin qanunsuz varlanmada ittiham edilir. Yerevanda onun sahibi olduğu deyilən “Yans” restoran kompleksində axtarışlar zamanı 1,1 milyon dollar, 230,5 min avro və 36 milyon dram pul aşkarlanıb.