Seçki gecəsi Gürcüstanda insidentsiz ötüşüb. Marneulidə baş verən bir neçə saatlıq qarşıdurma nəzərə alınmasa, ölkədə sabitlik olub. Səhərə yaxın Laqodexidə atəş səsləri eşidilib.

GundemXeber.Az bildirir ki, müxalifətin yerli qərargahının yaxınlığında odlu silahdan havaya bir neçə dəfə atəş açılıb. Həmin vaxt qərargahda qələbəlik olub. Az sonra polis həmin şəxsi saxlayıb və fakt üzrə cinayət işi başlanıb.

Səhər saatlarında Mərkəzi Seçki Komissiyası səsvermənin nəticələri ilə bağlı növbəti hesabat yayıb. Səslərin artıq 98,76 faizinin sayıldığını bildirilən hesabatda Zurabişvilinin 59,61, Vaşadzenin 40,39 faiz səs topladığı açıqlanıb. İkinci turda seçici fəallığı birinci turdan 10 faiz yüksək olub.

Ölkədən xaricdəki 55 seçki məntəqəsinin nəticələri də açıqlanıb. MSK xəbər verir ki, dünyanın 39 ölkəsində yaşayan 4.990 seçicinin 64,02 faizi Qriqol Vaşadzeyə, 35,73 faizi Salome Zurabişviliyə səs verib.

Artıq iqtidar qələbəsini bayram edir. Müxalifət isə növbəti addımların müzakirəsinə başlayıb. Bu gün saat 18-də Qriqol Vaşadze Tiflis filarmoniyasının binasında tərəfdarları ilə görüşərək seçkinin nəticələrini dəyərləndirəcək. Mitinqlərin başlanması, yoxsa, erkən parlament seçkisinin tələb edilməsi qərarının həmin məclisdə veriləcəyi gözlənilir.

Eks-prezident Mixeil Saakaşvili ötən gündən başlayaraq bir neçə dəfə videomüraciət yayıb. O, seçkinin nəticələrini tanımadığını və təcili ölkəyə gəlməli olduğunu bildirib.

Noyabrın 29-u axşam saatlarında müşahidəçilərin ilkin hesabatlarını açıqlayaçağı da gözlənilir.