Türkiyədə hakim AKP-nin İstanbul təşkilatının rəhbəri Bayram Şenocak jurnalistlərin qarşısına çıxaraq bu şəhərdə seçkilərin qalibinin Binəli Yıldırım olduğunu elan edib. Baxmayaraq ki, az əvvəl Binəli Yıldırım özü də rəqibi Əkrəm İmamoğlunun 25 mindən çox səs fərqi ilə irəlidə olduğunu təsdiqləmişdi. Habelə Yüksək Seçki Kurumunun məlumatlarına əsasən İmamoğlu 28 minə yaxın səs fərqi ilə öndədir.

Şenocak iddia edir ki, İstanbulda səslərin sayılmasında və nəticələrin protokollaşdırılmasında saxtakarlıqlar, pozuntular olub. O, əllərində belə pozuntulara dair “kifayət qədər faktların olduğunu” bildirib.

AKP təşkilatının rəhbəri deyib ki, etibarsız səslərin sayı 309 mindir. Habelə bəzi məntəqələrdə qutulardan Binəli Yıldırıma verilən səslər Əkrəm İmamoğluna yazılıb. “Bunu açıq deyirəm; İstanbulda nəticələrə təsir edəcək bu cür pozuntulara dair əlimizdə artıqlaması ilə faktlar var. Pozuntuları isbat etməyə hazırıq. İstanbulda bizə görə seçkini AKP və Binəli Yıldırım udub. Bütün etiraz prosedurları tamamlanandan sonra son sözü YSK deyəcək”-Şenocak bildirib.

***

Türkiyədə hakim partiyanın namizədi, ötən gün martın 31-də keçirilən bələdiyyə seçkilərində İstanbul böyük şəhər bələdiyyəsinin başqanı uğrunda mübarizəni Yüksək Seçki Kurumunun açıqladığı rəqəmlərə görə uduzan Binəli Yıldırım təslim olmaq istəmir.

Virtualaz.org Türkiyə KİV-lərinə istinadən xəbər verir ki, ötən gün öz qələbəsini elan və istanbullulara təşəkkür bildirən, lakin daha sonra rəqibinin onu üstələdiyi haqda xəbərlərdən sonra “kölgəyə çəkilən” Yıldırım nəhayət jurnalistlərin qarşısına çıxıb.

O, az əvvəl AKP-nin İstanbul şöbəsinin qərargahında brifinq keçirib və deyib ki, son məlumatlara görə rəqib namizəd Əkrəm İmamoğlu 25 minə yaxın səslə öndə gedir. Lakin aradakı fərqin 10 qatından çox etibarsız səs var. “Bu, çox önəmli detaldır. Şübhəsiz ki, YSK mandatı kimə versə başqan o olacaq. Etibarsız sayılan səslər aradakı fərqin 10 qatıdır. Nəticələri dəyişdirə bilər”-Yıldırım bildirib.

AKP-nin namizədi deyib ki, hazırda İstanbulda səslərin sayılması davam etməkdədir və 14 seçki qutusunda səslər sayılacaq. Habelə bəzi pozuntular, məlumatların xətalı şəkildə daxil edilməsi halları var.

“Etibarsız səslərin sayı 319 minə yaxındır. İstanbul xalqına təşəkkür edirəm, qazanan kim olursa olsun, çox gözəl seçki kampaniyası keçirdik”-Yıldırım bildirib.

* * *

12.05

İstanbul böyük şəhər bələdiyyə başqanı postuna dünənki seçkilərdə kimin seçildiyi barədə müəmmaya nəhayət Yüksək Seçki Kurumunun başqanı Sadi Güven nöqtə qoyub. YSK başqanı az əvvəl jurnalistlərin qarşısına çıxaraq İstanbulda CHP-nin namizədi Əkrəm İmamoğlunun 28 minə yaxın səs fərqi ilə öndə olduğunu deyib. Güven habelə bildirib ki, seçkilərin nəticələrinə dair məlumatların açıqlanmasını müəmmalı şəkildə dayandıran və hələ də Binəli Yıldırımı öndə göstərən “Anadolu” agentliyi məlumatları YSK-dan almır. “Agentlik bizim müştəri deyil, məlumatları haradan əldə edir, bilmirəm. Mənim adımın bu məsələdə hallandırılması yolverilməzdir”-o bildirib.

***

Türkiyədə dünən martın 31-də keçirilmiş bələdiyyə seçkilərinin nəticələri ölkənin ən böyük şəhəri olan İstanbulda əsl müəmmaya çevrilib.

Virtualaz.org Türkiyə KİV-lərinə istinadən xəbər verir ki, bu şəhərin bələdiyyə başqanı postu uğrunda mübarizəni kimin qazandığı hələ də rəsmən məlum deyil. Belə ki, seçkilərin nəticələrinə dair rəqəmləri açıqlayan “Anadolu” rəsmi dövlət xəbər agentliyi müxalifətin namizədi ilə hakimiyyətin namizədi arasında səs fərqinin kəskin azalmağa başlamasından sonra İstanbul üzrə məlumatların yayılmasını müəmmalı şəkildə dayandırıb.

Hərçənd müxalif “Millət ittifaqı” blokunun (CHP, İYİ partiya) namizədi Əkrəm İmamoğlu ötən gün axşamdan etibarən vaxtaşırı olaraq jurnalistlər qarşısına çıxaraq Yüksək Seçim Kurumundan daxil olan protokollara istinadən qalib gəlməkdə olduğunu bildirir. Lakin hakim AKP-nin namizədi, “Cümhur ittifaqı” blokunu təmsil edən (AKP, MHP) keçmiş baş nazir və spiker Binəli Yıldırım isə seçkilərin nəticələrinin açıqlanmasını gözləmədənvə İmamoğlu ilə aralarındakı fərqin aradan qalxdığı haqda rəqəmlərə baxmayaraq hətta qələbə çıxışı edib. Axşam saat 23.30 radələrində Yıldırım tərəfdarları qarşısına çıxaraq o qədər də inamlı olmayan səslə “qalib gəldiyini” elan edib, istanbullulara onu seçdikləri üçün təşəkkür bildirib. Daha sonra Yıldırımın AKP qərargahında geniş qələbə nitqi ilə çıxış etməsi planlaşdırılsa da hakimiyyətin namizədi fikrindən daşınıb. Nəticədə çıxışı yayımlamaq üçün göndərilən canlı yayım maşınları geri qayıdıb.

Bununla belə səhərə yaxın İstanbulun bəzi körpülərində və piyada keçidlərində üzərində Yıldırımın portretləri olan qələbə plakatları asılıb. Əkrəm İmamoğlu növbəti brifinqində bunu Yıldırımın “böyük səhvi” adlandırıb. Bildirib ki, cəmi bir seçki məntəqəsində səslər sayılmamış qalıb və qalan məntəqələr üzrə onun əlində olan rəsmi protokollara görə seçkini 26 min səsdən çox fərqlə udur. Qalan bir məntəqədə isə təxminən 350 səs var ki, bu da nəticələrə təsir edə bilməz. İmamoğlu rəqibindən təbrik gözlədiyini bildirib.

Maraqlıdır ki, prezident Rəcəb Tayyib Ərdoğan ənənəvi “balkon çıxışında” seçkilərdə AKP-nin növbəti qələbəsini elan etsə də İstanbul barədə söz açmayıb. Hərçənd ondan əvvəl Yıldırım qalib gəldiyini elan etmişdi və qələbə münasibətilə istanbullulara təşəkkür bildirmişdi.

Bu saatlara olan məlumatlara “Anadolu” agentliyi İstanbul üzrə nəticələrin yenilənməsini dayandırmış vəziyyətdədir. Agentliyin son məlumatına görə İstanbulda seçki qutularının 99.01 faizi açılıb və Binəli Yıldırım 48.70 faiz səslə “qabaqdadır”. Əkrəm İmamoğlu isə 48.65 faiz səs toplamış kimi göstərilir. Agentlik nəticələrin yenilənməsini niyə dayandırdığını izah etmir. İmamoğlu agentliyi qınayıb və onu seçki manipulyasiyasında iştirak etməkdə günahlandırıb. KİV-lərə səslənib ki, daha agentliyin məlumatlarına deyil, CHP-nin YSK-dan əldə etdiyi məlumatlara istinad etsinlər.

YSK-nın Bakı vaxtı ilə saat 10.20 radələrində yaydığı rəqəmlərə görə İmamoğlu açıq fərqlə öndə gedir. Belə ki, seçki qutularının 99.69-u açılıb və İmamoğlu səslərin 48.80 faizini alıb. Yıldırım isə 48.48 faiz səs toplayıb. Namizədlərin arasında səs fərqi 27 mini keçir və qalan seçki məntəqələri üzrə səslər nəticələrə ciddi təsir etməyəcək.

Bununla belə İmamoğlunun qələbəsi və Yıldırımın məğlubiyyəti hələ rəsmən elan edilmiş deyil. Belə görünür ki, AKP Ankaradan sonra ölkənin ən böyük şəhərini də uduzmasından müəyyən pərtlik keçirir və hakim partiyanın aparıcı üzvlərindən olan Yıldırımın məğlubiyyətini “yavaş-yavaş” etiraf etməkdədir...