Obama Pentaqondan Suriyada vurulacaq hədəflərin siyahısını genişləndirməyi istəyib, hərbi əməliyyatda ağır bombardmançılar da yer alacaq

ABŞ prezidenti Barak Obama Pentaqondan Suriyada vurulacaq hədəflərin siyahısını genişləndirməyi istəyib. Virtualaz.org “The New York Times” qəzetinə istinadən xəbər verir ki, söhbət 50 obyektdən ibarət siyahının genişləndirilməsindən gedir.

Vurulacaq yeni hədəflərin siyahısını və koordinatlarını ABŞ-a Fransa kəşfiyyatı verib. Bu hədəflərin arasında Suriya ordusunun hərbi obyektləri ilə yanaşı Əsəd rejiminin yüksək rütbli hərbi komandanlarının yerləşdikləri məntəqələr, strateji obyektlər və s. yer alır. Vurulacaq hədəflərin arasında Bəşər Əsədin özünün də iqamətgahı olacaq.

Qeyd edək ki, Suriya diktatoru hazırda rəsmi iqamətgahında oturmur və tez-tez yerini dəyişdirir, əsasən hərbi bazalarda olur.

Həmçinin məlum olub ki, hərbi əməliyyatlarda əvvəlcə nəzərdə tutulduğu kimi təkcə Aralıq dənizində yerləşən hərbi gəmilərdən atılan “Tomoqavk” raketlərindən istifadə olunmayacaq.



ABŞ administrasiyasındakı mənbə “Tomoqavsk” zərbələrinin ardınca ağır bombardmançı təyyarələrin Suriyaya hücum edəcəyini bildirib.

Gözlənilir ki, əməliyyatlarda Qətərdəki hərbi bazadan qalxacaq və qanadlı raketlər daşıyan “B-1” bombardmançıları, ABŞ-ın Missuri ştatındakı bazadan qalxacaq “B-2” və “B-52” bombardmançıları da iştirak edəcək. Həmçinin Fransa aviasiyası əməliyyatlara dəstək verəcək.

ABŞ Konqresinin Suriya qətnaməsinə sentyabrın 11-dək münasibət bildirəcəyi gözlənilir. Prezident Obama isə hərbi əməliyyatlar başlamazdan əvvəl yenidən xalqa müraciət etməyə hazırlaşır.