Sosial şəbəkə istifadəçiləri Rusiyanın Ukraynanın Xarkov şəhərinə havadan desant atdığına dair görüntüləri yayıblar. virtualaz.org xəbər verir ki, Xarkov səmasında çoxsaylı desant paraşütlərinin uçduğu görüntülərdə əks olunur. Habelə şəhərdə atəş səsləri eşidilir.

Bundan əvvəl Rusiya hərbi dəniz qüvvələrinin Azov dənizi və Qara dənizindən də hücuma keçdiyi, Odessaya dəniz desantının çıxarıldığı xəbər verilmişdi.

Ukrayna mənbələri xəbər verir ki, səhər saatlarından etibarən ölkənin 10 regionu Rusiyanın raket zərbələri altındadır. Yerli vaxtla səhər saat 05.00 radələrindən başlayaraq Dobetsk, Zaporojye, Luqansk, Odessa, Herson, Nikolayev, Poltava, Çerniqov, Jitomir və Kiyev vilayətlərinə raket zərbələri endirilir. Bundan əlavə Melitpolda və Jitomir vilayətinin Ozernoe kəndində iki təyyarə partladılıb. Beloserkov rayonunda silah anbarı vurulub. Odessada dövlət orqanlarının binalarında partlayışlar baş verir.

Ukrayna hakimiyyəti ölkənin şərqindən əhalinin total təxliyyəsini elan edib. Sakinlərdən Dnepr şəhəri istiqamətində hərəkət etmək xahiş olunur. O cümlədən Luqansk vilayətinin bütün sakinlərinə dərhal evlərini tərk etmək tövsiyə edilib. Şəhər administrasiyası sakinlərə öz avtomobilləri və digər mümkün nəqliyyat vasitələri ilə Dnepr şəhəri istiqamətində hərəkət etməyi göstəriş verib.

GUNDEMXEBER.AZ