Hər il Ermənistanda siqaret çəkməkdən dolayı 5,5 min adam ölür. 

Gundemxeber.az “Mir 24” kanalı və armeniasputnik.am saytına istinadən bildirir ki, hər il ölkədə siqaret alüdəliyindən dolayı ölüm sayını azaltmaq üçün Ermənistanda yeni qanunlar qəbul edilib. 

Bu qanuna görə, kafe, restoran və digər ictimai yerlərdə siqaret çəkmək, mağazaların açıq vitrinlərində siqaret satışı qadağan edilib. Qadağa səbəbindən paytaxt İrəvanda fəaliyyət göstərən 20-yə yaxın qəlyanxana böhran keçirir. 

Ölkənin Milli Sağlamlıq İnstitutunun direktoru Aleksandr Bazardjan yeni qanuna bağlı deyib: 

“Siqaret çəkməyi məhdudlaşdıran qanunların tətbiqinin faydasını şüurlu surətdə anlamalıyıq, çünki bununla sağlamlığımıza investisiya qoyuruq”. 

Varfolomey Fanardjan adına Milli Onkoloji Mərkəz də yeni qanunu alqışlayıb. Həmin Mərkəzin kimyaterapevt həkimi Karina Soqomonyan ağciyər xərçənginin siqaret çəkməklə birbaşa əlaqəsi var:   

“Ağciyər xərçənginin başlıca səbəbi siqaretdən istifadədir. Bunun qarşısını almaq üçün profilaktik tədbirlərin görülməsi zəruridir”. 

Xatırladaq ki, Ermənistanda 2020-ci ildən siqaretin satışını, istifadəsini məhdudlaşdıran qanunlar qəbul edilir. 

Abdulla İsmayıloğlu