BMT müstəntiqi xəbərdarlıq edir ki, Belarusda sistematik və geniş yayılmış repressiyalar insanların vətəndaş və siyasi hüquqlarını pozur. Müstəntiqin hesabatı çərşənbə günü BMT İnsan Hüquqları Şurasının iclasında təqdim edilib. Belarus iclası boykot edib.

Xüsusi məruzəçi Anais Marin Belarusda insan haqlarının vəziyyətinin pisdən pisə doğru getdiyini deyib. O bildirib ki, hakimiyyət öz vətəndaşlarının hüquq və azadlıqlarını əlindən alan qanunlar qəbul edir. Marin cinayət məcəlləsinə ifadə azadlığını, dinc toplaşmaq hüququnu və digər fundamental hüquqları məhdudlaşdırmaq üçün düzəliş edildiyini deyib.

O xəbərdarlıq edib ki, bu hərəkət çox məhdudlaşdırıcı qanunvericiliyin özbaşına tətbiqi nəticəsində yaranan potensial sui-istifadənin narahatedici perspektivini artırır.

Marin deyib ki, Belarusda insan haqları ilə bağlı vəziyyətin pisləşməsi vətəndaş məkanının əhəmiyyətli dərəcədə daralması ilə nəticələnib. O, hökumətin bütün medianı və narazılıq ifadəsini kökündən silmək üçün düşünülmüş siyasət yürütdüyünü bildirib. Marin deyib ki, Belarusda 1214 nəfər siyasi motivli ittihamlarla həbsdədir.

Onun sözlərinə görə, Belarusdakı qorxu və cəzasızlıq mühiti on minlərlə, hətta yüz minlərlə repressiyaya məruz qalan və qorxudulmuş belaruslunu sürgünə məcbur edib.

Marin beynəlxalq ictimaiyyəti dövlət tərəfindən repressiya və hədə-qorxu ilə sürgünə məcbur edilən Belarus vətəndaşlarını dəstəkləməyə və insan hüquqlarını qorumağa çağırır.

Belarus cavab hüququndan imtina edərək çərşənbə günü keçirilən iclası boykot etdi. Görüşdən sonra Amerikanın Səsi ilə əlaqə saxlayan Belarusun Cenevrədəki missiyası heç bir şərh verilməyəcəyini bildirib.